<<我有嘅超能力竟然係⋯>>: 第八章 啊由

嘟嘟嘟～嘟嘟嘟！

「唉⋯今個月又得翻呢千幾蚊，點捱落去啊頂！」啊由嘆晒氣。

其實我戶口嘅銀碼雖然都有六位數，但我可以用嘅，又只係得四位數。每個月岀糧嘅錢都要留住佢，就係為咗訓咗係病床嘅妹妹。

係香港呢個地方病係一個好奢侈嘅事，你亦都唔會敢將你嘅身體交俾政府醫院，唔係話入面嘅醫生護士無能力，而係因為佢地俾政府無奈嘅政策搞到有心無力。

可能佢地幫緊嘅唔係土生土長嘅香港人，而係其他地方因為唔信任佢地本土嘅技術人員而嚟到香港嘅人。呢班人嘅流量太多，令到醫院無辦法應付晒所有病患。





所以我無辦法之下唯有送妹妹去私家醫院，而私家醫院最重要嘅就係錢。我妹妹得到嘅唔係有爸爸媽媽照顧，可以正常翻學果啲生活，而係只可以睇住醫院天花板，每日無辦法自己食飯去廁所嘅人生。

一場交通意外無奪去佢嘅生命，反而仲送咗好多病痛俾佢，包括無辦法正常講野。而造成車禍嘅司機，雖然被判刑，但佢仲可以正常生活。

「啊妹，今日點啊？睇咗咩戲聽咗咩歌先？」啊由問。

「嗯⋯⋯復仇者⋯⋯日文歌⋯⋯」啊妹慢慢講。

「哇，咁好，你啊哥我都未睇復仇者啊！咁你中意邊個角色先？」啊由問。





「奇異博士⋯⋯可以⋯⋯控制時間」啊妹答。

呢一刻啊由隻眼開始有淚光，「有一日或者你真係做到奇異博士㗎。」啊由明知無可能，但都照同啊妹講。

「請問係咪苗生啊？」一位姑娘問啊由。

「係啊，我係。」啊由答

「咁嘅，病人嘅住院費都拖咗三個月啦，想問下會唔會可以交還埋？」姑娘問。





「呃，唔好意思啊，下個月就可以一次搞掂晒㗎啦，可唔可以通融多一陣啊？」啊由雙手合十拜託。

「苗生，你都知道我無辦法做主意，如果你無辦法交還，我地只可以幫你做轉院手續或者可能其他措施，希望你明白我嘅難處。」姑娘講。

「吓，求下你俾多少少時間啊，我啊妹已經好慘㗎啦。」啊由跪係地上。

「對唔住啊先生，起翻身先啦！呢個係規矩嚟㗎！」姑娘不知所措咁講。

啊由覺得自己好無能，無辦法維持到好嘅環境俾啊妹，好內疚同自責。幫啊妹做咗轉院手續之後，行翻去床邊望住啊妹。

「妹啊，啊哥無用啊，賺唔夠錢幫你租地方。我地要轉翻去政府醫院啊，你唔會怪啊哥㗎可？」啊由問。

「唔⋯會⋯啊哥好⋯辛苦㗎啦⋯⋯」啊妹話。

聽到啊妹咁生性嘅回答，啊由更自責同內疚，探完妹妹嘅佢去咗飲酒發洩。飲到天昏地暗，希望可以用酒精麻醉自己。





「你唔飲得就唔好岀嚟飲啦！阻住個地球轉，唔好以為我地間舖得你一個客先得㗎，翻你個狗窩飲啦！痴鬼線！」兩個男人將啊由丟岀店舖。

「唉⋯就係咁啦，所以我幾晚都訓唔著，想搵你傾訴下咁囉。」啊由對住我講。

原來呢個識咗咁耐嘅兄弟，我竟然一無所知，佢宜家咁辛苦，但我都做唔到啲咩幫佢。我唯一幫到佢嘅就只有一樣。

我送咗啊由翻佢屋企，同佢講咗一句。

「由，我宜家唯一幫到你嘅，就係可以令你訓翻一個好覺，可以幫你洗去你唔想記起嘅事。你想唔記得啲咩？」我問佢。

「你係真唔係啊，咁如果可以俾我唔記得嘅話，就幫我忘記咗我去飲酒嘅事，我就唔會對酒上晒引！可能仲有一個清晰嘅頭腦諗下解決辦法。」啊由講。

我將手擺係啊由嘅額頭，再一次用我嘅能力，用力諗住令佢訓教，即時有一絲感覺進入我嘅右手，然後我進入咗白色世界。





「嗚呼！恭喜你！你開始駕輕就熟啦喎年輕人。」Dr對我講。

眼前岀現咗書架，第二本書岀現咗，打開內文，係啊由嘅回憶，我搵到佢想忘記嘅一頁回憶，大力一扯，頁紙慢慢消失。

「喂～年輕人，記得唔好太快就幫人消除記憶啊，睇清楚先好撕啊。如果唔係，可能現實世界會有少少嘅改動㗎！」Dr似乎好認真咁對我講。

「得啦！我有分數啦！」我唔耐煩咁答。

意識翻翻現實世界嘅我望住已經熟睡嘅啊由，覺得啊由好辛苦，為錢同家人而煩惱，但佢自己好無力。相反我又有無為過家人煩惱呢？好似無。而且連金錢都無，幫唔到呢個兄弟。

我寫底咗一個之前幫助我嘅義工嘅電話俾啊由，希望幫到佢宜家呢個苦況。

翻屋企嘅時候，我嘆咗一啖大氣，我雖然幫唔到大家解決問題，但我作為一個聆聽者，又可以令佢地最少有一覺好訓，仲可以令佢地忘記佢地唔想要嘅回憶。

我做咗一個好大嘅決定⋯⋯辭職。