一個A0毒L和O4女神的故事: 番外篇 - 小樽之約定 (3)
番外篇 - 小樽之約定 (3)
Athena拿起阿康的手機，打算查看他的WhatsApp信息。阿康之前已在自己的手機上為Athena登記了指紋，Athena可隨時開啟阿康的手機，以代表自己並沒有甚麼事情不可讓Athena知道。
想了又想，Athena又停住了。他們復合只有一個多月，但Athena竟懷疑阿康做了對自己不忠之事，更因此事而擅自偷看阿康的手機。Athena覺得自己很過分，她這個舉動足以打破二人之間的互信。
最終，她選擇相信阿康。
她放下阿康的手機後，便用自己的手機查看關於吻痕的資料。頸上有紅印，而又不是吻痕，最大可能就是皮膚敏感，但認識了阿康已有一段時間，Athena從未見過他有皮膚敏感。
「舒服晒！」阿康洗完澡，赤裸上身步出客廳，樣子仍是一貫輕鬆自如，沒有任何要迴避的感覺。
Athena不可當沒事發生，於是直接詢問阿康。
「喂，你睇下你右面頸，有撻嘢！」
「吓？哦，照下鏡先！」
阿康站在鏡前，尋找Athena所講的那處紅印。
Athena望著阿康，一直留意著阿康的行為舉止。阿康是一個不善於說謊的人，雖然近期他沒有以前的那份老實，行為比以前醒目，但Athena相信自己足以判斷阿康的真假。
只見阿康仔細尋找紅印，終在近肩膀的位置找到。
阿康：「咦，係喎，咁明顯嘅？我成日都冇留意到！」
Athena︰「有啲似咖喱雞！」
「吓，你講咩呀？咩咖喱雞呀？點會呀！」阿康聽見Athena對他作出質疑，開始心怯。
「你，有冇做啲對唔住我嘅嘢？」Athena指著阿康，半說笑地質問他有否做不忠之事。
「吓，我點會咁做呀！唉，點解無端端會有撻嘢喺度㗎，點解嘅？」阿康一邊說，一邊對著鏡子，反覆查看頸上的紅印。
Athena望著阿康，覺得他不似有隱瞞。
Athena︰「講笑喳，我梗係信你啦！我哋尋晚先講過要互相信任㗎嘛！但係點解會無端端有撻嘢呢？等我睇過！」
Athena仔細觀察阿康頸上的紅印，發覺真的很像吻痕。
Athena︰「仲有呀，你聞下你件裇衫！」
Athena覺得不可將對阿康的懷疑藏於心中，決定坦承相對，直接跟阿康說出自己的疑惑。
「吓，有咩味呀？」阿康拿起自己剛才脫下的襯衣，仔細嗅嗅有甚麼氣味。
阿康：「咦，有香水味！」
Athena︰「係囉，不過陣香水味唔係我用開嗰隻囉！」
阿康望著Athena，發覺Athena雖無不悅，但樣子充滿著疑問。
阿康：「Athena，你信唔信我？」
Athena︰「信，但我都要聽到合理嘅解釋㗎嘛！」
阿康：「陣香水味係Vicky嘅，但我同佢冇嘢。我今日同佢喺佢公司做埋啲手尾，佢曾經差錯腳，我扶過佢，佢搭過我膊頭，可能就係咁揩到佢陣香水味。佢今日啲香水味真係幾勁！」
聽罷阿康的解釋後，Athena仍有少許疑惑，一直望著阿康。阿康知道自己的說話仍未令Athena釋除疑慮，顯得一臉無奈。
Athena︰「呢個解釋有啲牽強，同啲電視劇嘅情節好相似。」
阿康：「係真㗎！我一直都喺佢哋公司個會議室做嘢，Vicky只係間唔中入嚟搵我跟啲細節嘢，我同佢嘅接觸都係喺會議室，而且個會議室對住佢哋office嗰面係有窗，出面啲人會望到入嚟，我同Vicky又點會做到啲唔正經嘅嘢呢！」
那個會議室，Athena也曾經來過，知道它真的有窗，而且沒有窗簾可關。當然，如果Athena要懷疑，也可以有無限可能，阿康和Vicky今晚是加班完成工作，他們大可在加班之時進行不軌行為。
「嘻嘻，講笑喳，都話信你咯！我對你好有信心，亦都對自己好有信心！」Athena翹著阿康的手，向阿康投以信心一票。
阿康：「梗係啦，你由頭到腳，由外到內，都完勝嗰個Vicky十萬倍啦！我有個咁正嘅女朋友，根本冇理由要出軌啦！」
Athena︰「係喇係喇！咁你呢撻嘢係咩嚟㗎？會唔會係敏感？」
阿康：「可能啦，我都唔知點解！」
阿康的「咖喱雞」疑雲，暫且告一段落。
**********
第二日，也是北海道之旅出發前的一日。阿康對此旅程期待已久，當然懷著興奮的心情去看待。相反，從Athena的角度來看，她仍未能完全釋懷。
吃午餐的時候，Athena決定找Chloe傾訴心事。
Chloe︰「咁你信唔信阿康？」
Athena︰「信。」
Chloe︰「咁你仲煩啲咩？」
Athena︰「佢解釋唔到佢撻『咖喱雞』係點得嚟！」
Chloe︰「係咪你同佢親熱嗰陣錫到咁㗎？」
Athena︰「痴線啦，如果係我錫，我又點會唔知喎！我最近呢幾日都冇錫過佢條頸！」
Chloe︰「唔好諗咁多啦！既然你選擇信佢，就應該信到底！同埋阿康份人擔屎都唔偷食，我覺得機會就算唔係零，都係好低好低囉！」
Athena︰「我知，我信佢！可能我過多幾日就冇嘢，但依家暫時冇辦法唔諗呢樣嘢！」
Chloe︰「放鬆啲啦！你以前拍嗰幾次拖都冇試過咁樣㗎喎！」
Athena︰「咁就証明我好緊張佢、好愛佢啦！」
Chloe︰「總之我就錄低你頭先呢句，再send俾阿康，等佢知道你有幾鍾意佢啦！哈哈！」
Athena︰「唔玩喇！吖，係呀，條頸巾你教我埋尾吖！」
Athena很想親手編織一條頸巾給阿康，打算在北海道旅行時送給他。但她沒有織頸巾的經驗，所以請教擅長織頸巾的Chloe，用了大半個月的時間，終於在臨出發前完成。
就算現在二人間仍有些不確定的事情，也無損Athena對阿康的心意。
**********
好不容易，終於到出發之日。
由於阿康和Athena近期均有不少公事在身，而且這是他們一個月前才決定的假期，所以他們也未能請太長的假，只有五天的時間。
在清晨出發前往札幌的航班上，Athena將頭伏在阿康的肩膀上。這個畫面，令阿康想起一年多前、二人一起到曼谷公幹時的情景。
阿康：「杜希晴，你記唔記得上次我同你一齊搭飛機嘅時候，你都係咁樣挨喺我膊頭度？」
Athena︰「梗係記得啦！當時你話俾我知阿爸係受害者，我一時間接受唔到呢個事實，有好多嘢諗唔通，所以借咗你個膊頭嚟挨囉！」
阿康：「係呀！原來已經係年幾前嘅事，我哋中間發生咗太多事，經歷咗太多嘢，我真係估唔到，我哋最終可以喺返埋一齊，而我亦都深深感受到，你係好鍾意我！」
Athena︰「咁你呢？你又有幾鍾意我先？」
阿康：「我有幾鍾意你，你唔係唔知㗎！」
Athena︰「我知，但你近排少講嘛，我就嚟唔記得㗎喇！」
阿康聽到Athena向自己撒嬌，便立即想辦法哄她。
他環抱著Athena，將手扣在Athena腰間，然後深情地望著Athena。
阿康：「如果你鍾意我50分，我就鍾意你60分；如果你鍾意我100分，我就鍾意你就110分。」
Athena︰「咁點解唔係我鍾意你50分，你就鍾意我100分，我鍾意你100分，你就鍾意我200分嘅？」
阿康：「我太鍾意你你會有壓力㗎嘛，我要一直都保持住鍾意你多過你鍾意我少少，令你有甜蜜嘅感覺而又唔會有壓迫感，咁段關係先可以細水長流㗎嘛！」
雖然阿康的回答有點牽強，但Athena見他很努力地去回答自己有點任性的提問，Athena決定不再為難他。
Athena︰「知道喇，知道你好鍾意我，又對我好好喇！」
Athena依偎在阿康的胸膛上，沒多久便睡著了。這樣看來，Athena的心情已得到放鬆，準備好好迎接她與阿康的第一次旅行。