回到過去，破我未婚妻個處: （65）

一個著住黑色hoodie嘅男人，拖住一個身穿純白長裙嘅女仔，冒住大雨離開中環高級茶座。

我地淋住大雨，喺街道同人群中穿梭，上左一架唔知去邊嘅巴士。

坐到上層最前排，我嘅頭髮俾啲雨淋濕曬，塌曬落嚟扁曬。

小曼個妝都俾花曬，變到成個「花面貓」咁。

我地望到彼此「落湯雞」咁樣，忍唔住相視一笑。



對望之間，小曼喺我唇邊錫左一啖，我用更熱烈嘅親吻嚟回應，剛才落淚嘅佢已經停住眼淚，而今次輪到我忍唔住流下淚水。

淚水之中，帶著悲痛，亦帶著悔恨。

我恨自己當初嘅懦弱，如果嗰一句「我喜歡你」，可以喺當時講出口，或者事情唔會發展到呢個地步。

全部嘢都我一手造成，係我對唔住小曼。

係我對佢唔住...



大雨停左落嚟，天邊出現美麗嘅彩虹。

巴士駛到中環巴士碼頭總站，我地兩個落到車，行到海旁，望住天上嘅彩虹。

呢一刻嘅我地十分迷茫，唔知點算好。

「對唔住，係我害左你。」我非常內疚。

「哈哈，你知就好啦，一日最衰係你成日話啲道士信唔過，又話全部係神棍，咁我咪以為咪穿越咒、以咒換咒都係吹下水，點知原來係真嘢嚟，一個唔小心就中左伏啦，哈哈！」



諗唔到呢個時候，佢仲有心情講笑。

而我就笑唔出，係笑都係苦笑：「你仲心情講笑嘅，本來我以為可以再穿越一次，等2009年嘅自己同你表白，藉此改寫過去，點知結果卻穿越唔到。」

「或者我地試下對住前面嗌『哈哩路亞 Chance』，話唔定可以穿越返到過去？」

「喂呀，我好認真架，一係我地上大嶼山揾個禿頭道士，話唔定佢仲有其他方法幫我地？」

小曼望住我苦澀咁微笑：「算啦，死結嚟嘅，無得解架啦。」

「點可以就咁算架？唔好等啦，我地一於就即刻去揾個道士！」

事不宜遲，我帶小曼坐船過梅窩，再轉車上大嶼山，嚟到雲中道觀，向個禿頭道士求救。

點知對方一口就話：「幫你地唔到！」



「你咁神通廣大，幫我地再穿越一次啦！一次就夠啦！」我苦苦哀求。

「對唔住，真心幫你唔到，上次我已經話左，你身上有個咒，所以你唔能夠以咒換咒，無得穿越。」

「咁你咪幫小曼解左身上個咒，你實有辦法架！」

「呢個我之前亦都講過，你七次穿越過左，佢身上嘅咒已經無得解。」

「你幫唔到定唔想幫？最多我俾多啲錢你啦！」我繼續哀求。

「對唔住，我真係真係幫你地唔到，請回啦。」

對方搖頭歎氣，表示無能為力。



呢刻我嘅心情跌落低谷，小曼安慰返我轉頭：「或者呢啲都係整定嘅，時候唔早啦，唔好再揦埋口面啦，今日你上嚟我屋企，我落廚整返餐好嘅俾你食！」

返到西灣河，小曼同我落街市買餸，然後返屋企煮左一餐好豐富嘅晚餐。

五餸一湯，有魚有肉有菜有海鮮，色香味俱全，但我卻無心情無胃口。

「係咪唔啱口味？你停曬手唔起筷嘅？」小曼除低圍巾，坐到飯檯。

「唔係…」

「我煮得好辛苦架，唔食即係唔俾面，我嬲架！」

小曼跟手夾一舊雞俾我：「嚟嚟嚟，快啲試下我啲手勢！」

我咬一啖雞，擠出笑容：「嗯嗯，好食呀。」



「哈哈，咁就要同我食曬成圍餸菜啦！係啦，不如我地開支酒囉？」小曼提議。

我順佢意點點頭。