［愛情純愛］既然忘記唔到佢，不如試下中意我⋯？: 122. 她有毒

「知啦知啦，買比你啦⋯」我無奈地笑道，然後將份測驗卷比番佢，「放喺出面枱前，等媽媽番嚟簽名啦⋯」

嵐嵐即刻、立刻，馬上拎住份卷跑出去，過咗幾秒，佢又跑番入嚟我房

「你又想點？」我望住跑入嚟嘅嵐嵐問道

「哥哥你幾時見姐姐呀？我好耐都冇見姐姐啦⋯」佢有啲失落地扁着嘴講道

「幾乎每日都見佢。」我望住佢一臉失望嘅表情不禁笑咗一笑，「你做咩咁想見佢？」





「我中意呀！」嵐嵐輕輕地哼咗一聲

「打比佢囉。」我將手機遞比佢，見佢好似好想見蔣倩盈咁

佢接過我嘅手機，猶疑咗一下，冇打過去比蔣倩盈，都估到佢唔會真係咁大膽打過去比蔣倩盈

正當我打算從佢手中拎番手機番嚟嘅時候，佢搵到蔣倩盈嘅手機號碼，直接打咗過去

「喂？姐姐！」嵐嵐忽然間好興奮地捉住手機講道





我將手機從佢嘅耳邊拎開，然後㩒咗擴音，怕岑諾嵐陣間又唔知亂講啲咩⋯

「做咩打比我嘅？」蔣倩盈笑一笑問道

就算唔喺佢隔離，但我直覺覺得呢一刻嘅佢，一定係甜甜地笑起嚟

「哥哥同我都掛住你！」嵐嵐大聲地講道，「但哥哥唔好意思打比你，所以叫我打～」

「好似係你話掛住人，我先比手機你⋯」我沒好氣地望住嵐嵐





電話裏頭只傳嚟一陣笑聲，蔣倩盈笑得好開心⋯

「好啦岑諾嵐，你唔好阻住姐姐做功課啦。」我朝我嘅手機伸手，打算拎番部手機

「唔緊要呀～我冇忙緊～」蔣倩盈講道，「傾一陣都可以。」

聽到蔣倩盈咁講，我又默默地將手收回

嵐嵐拎住手機坐到我張床上，得意洋洋地望住我

「姐姐！我連續3次測驗拎100分，哥哥話買公仔比我～」嵐嵐對蔣倩盈炫耀講道

「你洗唔洗周圍講？」我無奈地笑道，「驚死人唔知你叻⋯」

「哼⋯我就係想同姐姐分享呀～」嵐嵐對我做咗個鬼臉講道





我無奈地笑，見佢咁中意蔣倩盈，搞到我都唔知點咁⋯

佢同蔣倩盈傾咗一陣之後，我用功課嚟打發咗佢，叫佢番去做功課

我閂咗擴音，拎起電話貼到耳邊，一將手機放到耳邊就聽到蔣倩盈清脆嘅笑聲

「嵐嵐好可愛～」電話裏頭傳嚟蔣倩盈嘅聲音

「可咩愛呀⋯想話你知佢叻咋⋯」我無奈地講道，「聽日放學之後你得唔得閒？」

「聽日？可以呀～」蔣倩盈講道，「你打算聽日買個公仔比佢？」

「嗯⋯聽日放學去買比佢⋯」我下意識瞄門口一眼，睇下佢係唔係真係出咗去，免得佢又喺度嘈話要跟埋一齊去





⋯

「你知嵐嵐要邊款公仔㗎啦？」蔣倩盈企喺我身旁，微微彎着腰睇緊其他公仔

「知，佢上次話中意呢個狸貓公仔。」我拎起其中一隻狸貓公仔

「哦～可愛～」蔣倩盈伸手摸一摸公仔嘅頭講道

「你都可愛。」我望住蔣倩盈，伸手輕輕地捏咗佢嘅臉頰一下

「嘻⋯」蔣倩盈聽到我咁講之後甜甜一笑，伸手挽住我嘅手臂，臉頰靠喺我嘅膊頭上

佢嘅撒嬌，佢嘅香味，佢嘅可愛⋯真係有毒，會令人上癮⋯

「買唔買埋呢個好呀？」蔣倩盈忽然拎起放喺另一邊嘅一隻熊啤啤，「睇下佢仲綁咗個紅色蝴蝶結，好可愛～」





我直盯着蔣倩盈，佢嘅笑容係有幾甜⋯？好似甜到去我心入面一樣

「岑諾新⋯？」蔣倩盈嘅雙手仍然抱住熊啤啤公仔，佢望住我，有啲疑惑咁叫咗我一聲，「我問你買唔買埋呢個呀～」

「你中意咩？」我輕輕一笑問道

「唔係呀～買比嵐嵐好唔好呀？」蔣倩盈抬頭望住我，「佢咁叻女，測驗連續100分，買比佢當獎勵下佢嘛～」

「你想買嘅話，就買比佢啦⋯」我無奈一笑，岑諾嵐佢好彩啦今次，一次過可以拎到兩份獎勵

蔣倩盈最後真係買咗嗰隻公仔，我都唔知講咩好⋯不過算啦，蔣倩盈係愛屋及烏吧⋯

我同蔣倩盈行出地鐵站，番到去屋企附近，陣間番到去岑諾嵐見到隻公仔，佢真係要開心死





「你快啲拎隻公仔番去比嵐嵐啦～佢應該好心急想要公仔㗎啦～」蔣倩盈喺經過我住嘅屋苑時忽然停咗落嚟講道，「我自己番去就可以啦～」

「都係一陣，唔緊要。」我講道，去佢屋企都係再行多一小段路啫

「唔緊要啦～你日日都送我番屋企，今日睇在嵐嵐份上，我就比你快啲番去啦～」蔣倩盈朝我微微一笑講道，然後將我隻手鬆開

「你要唔要⋯親自送隻公仔比佢⋯？」我喺問嘅時候，不禁吞咗啖口水，「畢竟隻熊啤啤係你揀⋯而且，嵐嵐應該都想見你⋯」




IG Link: https://www.instagram.com/nd_cotttoncandy/?hl=zh-tw