［純愛短篇番外］以朋友之名嘅愛情，我地各自嘅單相思: 10. 「同居」

張子萊同李穎容落車，李穎容一落車就踩咗個空向前絆咗一下

「喂⋯！」張子萊伸手捉住李穎容，「你睇住啦！」

「嚇死我！」李穎容嘅心都嚇到就嚟跳出嚟一樣

「睇路呀！跌死你呀！」張子萊扶住李穎容企好，李穎容邁步走上行人路

兩人經過附近餐廳嘅時候買咗個飯再番去





「呼⋯」李穎容一入門口就將高踭鞋從腳上除咗落嚟，隨便地放喺鞋櫃前

張子萊嘅鞋放咗喺李穎容對鞋隔離，李穎容望一望張子萊，好似忽然記起啲咩一樣，彎腰將高踭鞋放番好

「洗手食飯～」李穎容行去廁所洗手，「你幾點要番去呀？」

「晏啲啦，11點左右番去。」張子萊將飯盒擺到枱上，「睇下嗰個男人會唔會又嚟㩒鐘。」

食完飯兩人坐喺梳化一齊打機，有張子萊嘅陪伴，李穎容心裏格外踏實，聽到張子萊把聲、張子萊就喺身邊，感覺格外安心





夜晚22:03

本來一臉自在嘅李穎容忽然間就開始坐立不安，坐喺梳化上嘅佢開始郁嚟郁去

「身痕？」張子萊望一望李穎容

「10點啦⋯都唔知嗰個變態佬今晚會唔會又㩒鐘⋯」李穎容不安地講道

「我喺度你驚咩？」張子萊無奈地講道，拎起放喺枱仔上面嘅水杯飲咗啖水





「叮噹～」

門鐘響起，李穎容嚇咗一跳，慌張咁望向張子萊

李穎容起身，輕手輕腳地行去門前從魚眼鏡望出去

「又係佢⋯！」李穎容一臉擔心地對張子萊講道

李穎容慌張地行番去梳化前，張子萊放低手機企起身

「叮噹～叮噹～叮噹～叮噹～」

「點算呀點算呀？」李穎容捉住張子萊嘅手緊張地問道，「佢又嚟㩒鐘啦！今晚又要㩒幾耐呀？」

「我去開門。」張子萊伸手摸摸李穎容嘅頭安慰佢，然後行向門口





「等、等陣！」李穎容捉住咗張子萊，然後將張子萊嘅呔向下扯，再將佢裇衫嘅頸喉鈕解開

「你做咩？」張子萊一臉疑惑地望住李穎容

「叮噹～叮噹～叮噹～叮噹～」

「咁佢咪會覺得呢個單位有男人住囉！」李穎容緊張地講道

張子萊無奈地反咗一下白眼，然後朝門口行去

「咔」一聲將大門打開

「先生你不斷㩒鐘係咩事㗎？」張子萊打開門嘅同時，將手搭喺呔頭，做出一個將呔解開嘅動作





企喺鐵閘外嘅中年大叔見到係張子萊開門時愣了一下，中年大叔向屋內瞄咗一眼，李穎容緊張地坐喺梳化上躲起嚟

「先生？」張子萊又叫咗中年大叔一聲，「你搵邊位？」

「後生仔你住呢度㗎？」中年大叔尷尬一笑，然後下意識又瞄咗單位內部

「係呀，請問有咩事？」張子萊淡定地問道

中年大叔冇講嘢，只係一直朝屋內望去

「先生，你呢幾晚都一直㩒我門鐘，唔知你有咩事呢？」張子萊講道，中年大叔心裏一怯，「你每晚10點幾都喺度㩒鐘，我唔知你咩事，不過善意咁提醒你一句，你咁樣嘅滋擾行為我可以打電話報警拉你。」

「我唔小心行錯單位啫！」中年大叔惱羞成怒，沖張子萊發火般講道，然後轉身走

張子萊閂上大門，然後李穎容先至行嚟門口





「走咗啦？」李穎容問道，但好快又有啲擔心，「但佢聽日會唔會又嚟？聽日佢又嚟嘅話咁點算呀？」

「你想嘅話，我聽日可以過嚟陪你。」張子萊講道

「嗯嗯！」李穎容一副惹人憐愛嘅模樣，搞到張子萊想直接攬住佢

「我留多陣就番去啦。」張子萊伸手放到李穎容嘅頭頂，「陪你打多陣機。」

⋯

張子萊喺11點左右就離開然後番屋企，李穎容諗緊聽晚要點算好

兩人一直獨處，李穎容想要好好咁表現一下自己，佢決定聽晚佢煮飯





「快啲約張子萊同我一齊食飯先～」李穎容興高采烈地拎起手機

翌日中午，張子萊應約嚟陪李穎容，李穎容喺廚房洗洗切切，先將今晚要煮嘅嘅處理好

「你做咩咁好死煮飯比我食？」張子萊行入廚房，自然而然地打開雪櫃拎嘢飲




IG Link: https://www.instagram.com/nd_cotttoncandy/?hl=zh-tw