【代糖故系列】《她被寄宿到屋邨男孩的家中》: 九十

最後聖誕假都告一段落，我最唔明嘅都係一樣嘢；有人聖誕節喺度同兩個女人玩頸巾，有人平安夜同補習社女同事玩出火，點解會有隻黐線自稱唔係作家嘅貓大熱天時幻想自己過緊聖誕重寫咗將近六萬字出嚟，睇嚟一定係溫室效應導致地球暖化導致板塊移動導致隻貓飄咗去南半球。
我：「早晨，右女神，好耐無見。」指校服女神。
Q：「早晨，左邊嘅低B仔。」佢面帶不屑嘅笑容。
放完假返嚟，班房又變返嗰個樣，就好似一切都無變過咁，但我知道同隔籬位同學嘅關係已經今非昔比；嗯…無錯！我變得更加折墮…
好在我同佢嘅事係秘密嚟，所以喺班房我哋都會扮到無乜嘢咁。
今年係我第一次做足晒所有長假功課先開學，一樣都無欠交，就連我自己都估唔到，女神實在係功不可沒；正所謂寧可捧蛋，都不可爆蛋，做功課呢啲實在easy job啦。
過兩日就開考，所以今日一整日先生都同我哋溫返以前啲嘢，有啲好人嘅先生直頭講晒邊幾頁一定要背；啱晒，由於我之前都無乜上過堂，所以呢兩日對我嚟講可以話係救命稻草。
健：「喂！做乜今個長假唔見你落中心嘅？」
本來我想慳錢買燒臘飯食甚至乎返屋企自己煮，但話晒咁耐無見，都要同班兄弟食下飯嘅，所以就同佢哋一齊去茶餐廳，而我係食快餐C。
乜話？你問我乜係快餐C？你係咪香港人嚟㗎…




即係咁，A餐九成離不開螢光茄汁或黑椒汁膽拖豬扒雞扒超簿牛扒複式穿火腿餐肉腸，嗱，我唔賭錢嘅，係球場班大哥哥教我㗎咋；B餐就通常係啲唔起眼嘅西飯，例如葡汁雞球飯或者白汁魚柳飯…有無意粉？你係咪kai㗎！所有飯都可以轉意㗎啦；而C餐就係不外乎星洲炒米同揚州炒飯；最後D餐就係無學生食得阿叔食嘅例如土魷肉餅飯或芙蓉蛋飯…吓？！D餐轉意？你有勇氣…咪開口問下囉，我都想知個答案。
好！廢話講完嘅我：「都要溫下書嘅，乜我落唔落去你都知嘅咩？跟蹤我呀？」
健：「鬼得閒跟蹤你，以前落親街都會入去兜個圈睇你喺唔喺度㗎啦，過半數都撞到你嘅。」
我：「又係喎…」
康：「嗯，呢個人相當有嫌疑。」
我：「再嘈加啲橙皮落你碟飯度吖嗱，改過自新溫下書都要質疑我嘅！」
當我哋食到天一半地一半嘅時候，我哋都攞咗部電話出嚟，當然就係傳說對決送飯啦，一路食一路打，咁先有力贏㗎嘛！
健：「細龜你一唔一齊玩呀？」
坐我前面嘅宅男細龜比較孤僻，好似搵唔到人同佢食飯，我咪順便開口問下佢囉；其實佢由一開始坐低就攞住電話喺度㩒，當然唔會對決，而係關愛佢電話入面嗰幾打女女。