【代糖故系列】《她被寄宿到屋邨男孩的家中》: 137

我：「即係…」
馬：「今日就落嚟開工啦！星期六超忙㗎！」
我：「好呀！多謝馬叔叔，我會畀心機！」
馬：「你九點半準時落到嚟啦，到時再講。」
估唔到咁簡單…今次實在係太好彩啦！一落樓下就可以返工，重近過M記，工時又唔使咁長，呢個時間重好啱我，橫掂我平時呢個時間都係喺屋企膠hea打下機；同埋我諗…人工會高過M記掛，聽聞酒樓啲阿姐都唔平，希望馬叔叔對我會一視同仁啦，我目標係每個月搵到千五蚊，咁應該可以夠冚晒QQ啲食飯錢先。
雖然我想佢過得再好少少。
唔理喇，總叫解決咗燃眉之急先，我開心到喺屋企彈下彈下，好想QQ快啲拍完拖返嚟同佢講呢個好消息，順便同佢落樓下食返餐好嘅先，起碼都要去大家樂鋸扒啦！就算加埋紅豆冰都唔使肉痛喇，啦啦啦…
等咗一陣我終於聽到開門聲，QQQQQQ！
我：「Queenie妳返嚟喇？」
Q：「嗱，畀你嘅！」




QQ遞咗個啡色紙袋畀我，我順手接住。
我：「係乜嚟㗎？」我望入去有個膠盒。
Q：「有三隻雞翼同炸魷魚圈，畀你加餸㗎。」
我：「咦，咁好，點解會有嘅？」
Q：「我同條仔食嘢，專登嗌多啲嘢食…咁食唔晒…咪可以打包囉。」QQ面色有啲尷尬咁講。
我：「咁樣…會唔會唔係幾好？」
Q：「是但啦…起碼可以慳返廿蚊吖。」
QQ妳竟然為咗幫我慳錢，厚住面皮做啲咁嘅嘢，我實在係太感動喇！雖然好似有啲對唔住佢男朋友…才不！又有得上床玩埋咁多嘢，重要迫QQ做啲佢唔鍾意做嘅嘢，你活該俾佢食窮㗎，抵死！
我：「係呢，今日玩得開唔開心呀？」
Q：「OK啦，正常，無乜特別。」




我：「佢無再迫妳做嗰啲嘢吖嘛？」
Q：「佢好似有啲驚，今日全日都無對我做過任何嗰方面嘅嘢，可能怕我嬲掛。」
我：「嗯，咁就好，我都有個好消息要話畀妳聽！」我興奮到捉住咗佢嘅膊頭。
Q：「點呀，打到上戰場傳說呀？」
我：「哎呀，嗰啲無謂嘢嚟啫，係我，搵，到，工，呀！」QQ聽完之後一面不可思議咁望住我，兩隻眼凸到好似金魚咁。