【代糖故系列】《她被寄宿到屋邨男孩的家中》: 143

就係咁，我哋手拖手返到屋企。
我：「QQ，有芒果布甸呀，食唔食呀？」
Q：「吓…咁夜先嚟食甜品會變肥豬㗎喎。」
係喎，畢竟佢都係女神，會對自己嘅外表有啲要求，要知道女神呢個特質係三分靠天生，七分靠努力，十分靠父幹…嗯，雖然佢喺度其實無啖好食應該唔會肥得去邊。
我：「妳唔食咁我食埋佢㗎喇，我啱啱做完嘢都開始又肚餓返。」
講真吖，以前我蒲完夜街都會去便利店整個杯麪甚至整盒意粉㗎，但而家為咗女神我節衣縮食都唔敢咁浪費，有時夜晚都係食兩塊餅乾就算，而家呢兩嚿布甸絕對係一餐偉大嘅宵夜嚟。
我打開個膠兜，已經即刻傳嚟陣陣羅拔臣嘅飄香，雖然雪咗成日塊甸開始收水，但感覺上都重有啲彈性，就好似啲健身美女結實嘅胸前身段咁，我攞住隻鐵羹狠狠咁拮開其中一塊，再傾側個膠兜等啲淡奶浸淫塊甸，慢慢滲透入裂縫，再潷起一大塊放入個口入面。
餓起上嚟，邊得閒理佢硬定軟，有得食就好味㗎啦，芒果布甸而家係中點定大點呢？如果日日係咁都幾賺㗎喎。
Q：「哼！」
QQ坐咗喺我隔籬，搶咗我個膠兜，用我啱啱嗰隻鐵羹分屍另外嗰塊布甸，然後又狠狠咁送咗一大啖入個口度，做乜唔自己攞多隻羹喎…不過，上次同佢飲朱古力都係咁啦，啱啱重更加惜埋添。




結果我一羹你一羹，唔使三分鐘就處理完兩嚿布甸，QQ個傻妹重食到嘴角都係淡奶；我好想抱住佢嘴落去啜走嗰滴淡奶，不過佢可以惜我當然唔等於我可以惜佢…
但呢一刻嘅QQ真係好可愛，善良嘅女仔都會受唔住甜品嘅誘惑將自己最真實嗰一面表露無遺；我好想永遠對住眼前呢個女仔，一直陪住佢，度過生命中嘅每分每秒，細味生活中嘅點點滴滴，直到一刻我哋之間不分我同妳，我想向流星許願。
其實又唔使許，因為現實就係我確實咁要日日由朝對住佢到晚，除咗佢要拍拖嗰日，而我嘅銀行戶口早就不分彼此…QQ，可以有機會照顧妳，實在係我嘅福氣。
我伸手去佢嘅嘴角度抹走嗰一滴淡奶，沾上指頭之後再放入我個嘴度，而QQ佢就回以焉然一笑，希望往後嘅日子我哋嘅幸福都可以嚟得咁簡單。