【代糖故系列】《她被寄宿到屋邨男孩的家中》: 264

A：「對唔住，我差少少先有C cup，入面係墊咗水餃嘅。」吓…乜嘢話？！
我：「吖！點會咁㗎？！唔應該係咁，我無理由會俾個裝假狗姐姐呃到㗎喎！我隻金睛火眼呀…」
A：「屌你！咪扮膠啦。」
我：「細路仔係咁㗎啦，邊有女仔裝假狗會同人講㗎。」雖然我個腦即刻幻想緊B點七五cup嘅畫面，即係細過QQ少少？
A：「哼，唔順超你喺度讕醒串串貢咁咋嘛，唔好以為咁易就可以睇穿一個女人呀。」
我：「呢層我都知嘅，唔使妳提醒。」
A：「我呢，而家十八歲。」
十八歲，卜卜脆，Angel姐姐扑扑佢…嗱，啲污糟嘢我諗咗半秒咋，唔係話我唔想，但始終應承咗媽咪同QQ，唔可以反口，諗多都無謂。
我：「大我少少啫，又會咁細個就做啤酒妹嘅？」
A：「你咪重細，做乜嚟酒樓打工？」




我：「呢個topic呢，真係有排講咯…」
A：「係呢，你幾點收工㗎？」
我：「到清晒場囉，我諗今日要十二點，妳呢？」
A：「嘩，咁夜嘅！我schedule到十點㗎咋，唔等你喇。」
我：「無諗過要妳等我喎，而家都十點幾，咁妳重唔收工？」
A：「係隨時收得，但…如果可以賣多幾枝藍妹，我又可以多少少人工，反正我早啲返去都無嘢做。」
我：「逐枝計錢㗎？」
A：「賣得唔好咪最低工資，過咗某個數咪每枝有少少佣囉。」
我：「咁一枝有幾錢呀？」
A：「商業秘密，唔同你講。」




我：「哦，是但啦。Angel姐姐妳都係收工啦，如果有客嗌啤酒我會迫佢哋飲藍妹㗎喇。」
A：「哈，睇嚟你真係想做埋啤酒仔㗎喎。」
我：「平時都做開㗎啦，佢哋又真係飲藍妹多。」
A：「迫人飲藍妹小心俾人鬧呀。」
我：「同佢哋講其他啤酒俾個啤酒妹搬開咗唔夠凍咪得囉。」
A：「你個蠱惑仔吖…咁我換衫先喇。」
有個女同事係幾開心嘅，純粹當係同事㗎咋。
係喎，我都未講佢係咪靚女，都幾好嘅，中上咁囉，同Carmen差唔多啦，不過Angel係長頭髮，正經分界，紮住條馬尾；隻卡車啲頭髮就散收收，一時中間分界…點都好，喺QQ面前，九成五以上嘅女仔都要跪低，所以討論價值不高。