【代糖故系列】《她被寄宿到屋邨男孩的家中》: 370

我：「實係啦，啲字重要咁靚，原來咁多學問。」
鄧：「有咗內容之後，就要用一個好嘅結構嚟表達，跟住就到個人睇法同思想，其次就係例子同引用，然後盡量唔好寫錯字，最後先到字體美觀，所以唔好諗住靠寫多字同靚嚟博高分。」
我：「嗯嗯，點解妳平時唔係咁教嘅？」
鄧：「初中中文，課程指引都係教內容，格式，各種用字修辭為主，不過…我都唔知高中啲先生係點教中文，可能補習社先會係咁教答題，但你咁講…或者我都可以調整一下以後個教法。」
我：「哦，我會畀多啲心機聽㗎喇。」
鄧：「其實，學中文同溝女差唔多㗎咋，你唔中point，同個女仔講幾多句都無用，相反氹到佢鍾意你嘅，一句就夠，而如果無內涵，言之無物，乜都靠外表，感情好難長久。」
我：「係嘅係嘅，鄧老師所言甚是，我祝福妳快啲改完簿可以放工去識男仔。」
鄧：「走呀！唔要見到你呀…」
同Miss Tang熟絡咗之後，又真係上堂都會鍾意咗聽佢講書，但嗰啲中西史我就實在係無能為力。
交完功課就落返去有蓋操場搵QQ，重喺教員室出面條走廊都聽到下面打仗咁嘈，唔知嘅話會以為班女要玩四國無雙開戰打大架。




望兩眼已經搵到紅社嘅地頭，QQ就同瘟神加埋幾個應該係幹事嘅高form坐喺張大枱睇啲妹練習。
我：「Queenie，我過咗嚟喇。」
Q：「咦，你終於做完功課嗱？」
明明我落緊樓梯佢就已經見到我，但就偏偏扮到同啲女同學講緊嘢唔望過嚟，臭港女。
我：「係呀，係咪有鉛球玩？」
瘟：「阿爽你嚟嗱，過嚟吖，我開間房攞嘢畀你試。」然後佢就帶咗我入體育用品室，QQ都跟埋嚟。
我：「麻煩晒，要你特登大費周章幫我。」
雖然我對佢無乜好感，而且我覺得呢啲嘢無乜好試，但既然QQ堅持，我都會唔該人哋嘅。
瘟：「傻啦，我哋做社長嘅，隨時都可以借到條匙，就係負責做呢啲，個鉛球好重㗎，千祈唔好整親任何人，我都要負責㗎。」
借到條匙，代表權力；負責任，代表威；佢哋呢啲活躍份子成日開口埋口都係講呢幾句，而我就好簡單，玩完三個項目攞QQ三個香吻做奬品，我確實係好無大志，而且最怕麻煩。