【代糖故系列】《她被寄宿到屋邨男孩的家中》: 399

咁我屋企樓層就唔係太高嘅，平時返學好多時我都唔會等（車立）跑幾層樓梯就算，至於準確層數我是唔會話你哋知的；如果你哋都係聽爸爸媽媽話嘅乖學生，都應該知道屋企地址唔可以隨便俾其他同學知道，除非佢係好似QQ咁嘅女神啦。
至於我棟樓，唔係太高又唔係太矮，唔會話五分鐘就到頂要跑返落地下嘅；同一個道理，我亦唔會話你知最高有幾多層，費事你哋摷個香港公屋大圖鑑出嚟估我住邊棟…因為，我實在太驚同女神同居呢件事俾人踢爆！
一出門口就開始向上行先。
我：「跑樓梯唔會好悶咩，不停圍住啲梯級轉…」
Q：「有得揀先得㗎，你幻想住衛斯理嘅《大廈》嚟跑就唔會悶㗎喇。」
我：「講乜㗎，妳明知我都唔睇小說嘅。」
Q：「講佢喺一棟大廈嘅頂樓，架（車立）神咗落唔到地面，於是佢就行樓梯，點知行極都喺同一層度，無論轉上定轉落都返到去原本嗰層。」
我：「咁咪困咗喺條樓梯度？好得人驚喎…」
Q：「係呀，而且唔同我哋而家望到出街，嗰條樓梯係密封嘅，只可以喺扶手望落去見到無窮無盡嘅旋渦，不過佢又唔算困住嘅，佢係可以離開樓梯返到去個單位度。」
我：「咁食晒啲嘢之後咪會餓死囉。」




Q：「唉，我都懶得同你講，想知就自己睇。」
以前嘅我都或者想睇下，而家就真係無乜多餘時間；其實諗落佢又唔會悶嘅，喺間冷氣房入面玩跑步機咪重悶，而家起碼每行一層都會見到街上面嘅景色變得越嚟越細，亦望到越嚟越遠，完全體驗到古代詩人更上一層樓嘅意境…
我指佢咋，我隻眼就只有一個景色，就係佢灰色嘅屁股，三角形嘅底褲痕，肉色嘅纖腰…
我：「係呢，點解妳要跑喺我上面嘅？」
其實佢係咪咁好死專登畀個靚靚屁股我睇住跑？
Q：「我喺上面，萬一我跌落嚟有你接住我，但如果你喺上面，一個唔該仆落嚟就壓死我。」
原來係咁，佢嘅諗法都幾合邏輯。
跑樓梯比起跑步係一種更高強度嘅運動嚟，首先爬升係好考腳力嘅，無論大髀、小腿、腳掌嘅力都可以訓練得到；逐級行嘅話，動作要快但唔好大，精準控制係重點，最訓練到腳掌嘅推力；公屋啲梯級唔高，你可以一次檻兩級或者三級，相對上就好考大髀嘅爆發力；而由於係咁轉嘅關係，都可以訓練到平衡力同腰力，如果用埋扶手嘅話，係連隻手都可以練埋。
出乎意料，QQ嘅體能非常之好，完全睇唔出佢有辛苦嘅感覺，重可以喺行一級同檻兩級之間不停切換，輪流咁用唔同嘅肌肉撐自己個人上樓。
我：「呼，話咁快就到頂…妳都行得好快。」




Q：「使乜講，以前我都有玩樓梯機同踏步機。」
睇嚟為咗靚，女仔嘅毅力係可以超乎你想象。
我：「咁而家…」
Q：「咪落返去地下再上過嚟囉。」
我：「妳完全唔使抖呀？」
Q：「行返落去嘅時間咪即係抖囉。」
好嘢…重以為佢會選擇搭（車立）返落去。
我：「嘿嘿，我想講落樓梯係我強項嚟。」
Q：「係？係落樓梯定轆樓梯定仆樓梯呀？你唔好顧住玩跳級玩到仆街呀，我唔識救你。」
我：「先唔會，我係專業嘅，咁行啦，我唔等妳。」