【代糖故系列】《她被寄宿到屋邨男孩的家中》: 437

中一開學唔夠一個禮拜，我就已經同佢因為啲低能嘢初則口角，繼而動武；喺學校動武，普遍有個規則，就係唔可以出拳腳，因為先生會罰得好甘，所以一般嚟講係會用角力嚟挑釁對方先，如果無人動真格嘅話，通常就會變咗摔角、相撲、或者柔道…咁佢係又肥又高力量自然唔細，我嗰陣就借力打力突然之間由推變做扯…
雖然我都轆咗落地，但佢就仆到成面灰。
跟住點？我當然閃人，同佢真打我都無so，結果我哋喺課室追來追去追到整冧大半排枱同凳…唔使問，我哋跟住就俾訓導捉去鬧咗半粒鐘兼且要罰抄收警告信。明明…玩下啫。
我：「費事啦！我驚有隻肥豬轆樓梯咁轆落去就唔係幾好。」請自行幻想運動場看台結構。
豬：「你條撚樣重講呀？！」
龜：「你哋…玩還玩…唔好整到我。」細龜佢喺我哋兩個中間，臨危不亂，瑟縮咗上張凳度，坐到好似死亡筆記個L咁。
我：「乜喎，你姓朱，又係肥，咁叫肥豬其實有乜問題，我又唔係話你樣衰，如果我肥嘅話你都可以叫返我做肥叉㗎，不過我唔肥咋嘛，你鍾意咪叫我瘦叉囉，但又唔太瘦。」
無錯，連Carmen都話我係一塊靚叉，啱啱好。
豬：「你個木嘴吖，你係咪盲㗎！我已經瘦咗好很多！」佢無講大話，高係高咗，但體重應該無變。
我：「都重係肥吖，好嘞好嘞，叫半肥瘦豬，滿意喇掛？」個人感覺重衰過肥豬。




豬：「總之有個豬字就唔得！」
我：「都唔講道理嘅！姓朱唔俾人嗌豬，有無咁霸道呀，一係改姓囉！最多…煙肉、餐肉、扣肉、梅頭畀你四揀一。」
豬：「你正一小學雞！」無所謂啦，開心咪得。
我：「小學雞小學鴨都好啦，你咪又係中學豬。」
豬：「你好低B呀，傻仔，都無大過嘅！」
我：「吹呀，我係大唔透，永保青春！」
豬：「你吹我唔脹，你掹我唔長！」
我：「我唔吹你都食飯脹，何B仔又唔識長！」
豬：「閘住反彈無回頭！」
我：「回頭反彈無閘住！」




曾經滄海小學雞，今天巫山再決鬥…
豬：「你條友…大力咗咁多嘅…」
我：「你都係吖，睇嚟啲脂肪變咗肌肉咁喎。」
豬：「我哋數三二一一齊縮手，三…二…一…」
唔好問我呢啲係乜嘢儀式嚟，我只可以講小學根本就係一個邪教，一入閹門深切海。
我：「屌…一返嚟就要跑，未坐定就要玩摔角，嘥晒啲精力陣間都唔知點跑。」
豬：「咦？你今年有報名參賽呀？」
我：「係呀，重報咗三樣咁大把添呀，坐多陣就要落去跑三千米。」
豬：「嘩，乜你今年咁搏呀，上年明明消失咗。」
龜：「係呀，佢為女死為女亡吖嘛。」




平時唔聲唔聲嘅細龜，估唔到而家會嚟過我一棟，睇嚟佢同肥豬應該幾熟下喎。
我：「都唔關事嘅，一齊玩下啫，咁你又有無報到呀？」
豬：「報咗一項咋，推鉛球。」
我：「Oops…我都報咗…」
豬：「無關係吖，對我無影響。」
頭先同佢推完，我心知肚明，論純力量嘅佢係大過我，即係…罷就啦，都無可能攞到金牌，但佢報咗就代表我要跌一名。