【代糖故系列】《她被寄宿到屋邨男孩的家中》: 501

爸：「我返嚟喇！…，仔…請問…」
我，Q：「…」
電話從我哋嘅手上滑落，跌咗喺張床上面，整個空間凝結起嚟，就連時間都暫停流動，所有人都鴉雀無聲，除咗嗰兩部重喺度播緊峽谷撕殺效果聲嘅電話。
我唔敢想像自己嘅表情，就應該…同出娘胎嗰下一模一樣，當我發現自己嚟到呢一個咁混賬嘅世界，先係感到一陣憤恨，再保持住呆若木雞嘅面孔，心想…有無時光機將呢一切還原？
點算…點解釋好…點解我唔聽QQ話小心啲…
爸：「交叉仔…你…女朋友？」都係大人出聲先。
QQ當然唔係我女朋友，但係…我點答佢好？
我根本就唔知自己同佢而家係乜嘢關係…亦都唔識解釋點解呢個女仔此時此刻會著住我啲衫以呢個模樣出現喺我屋企。
老竇你早啲返嚟都話吖…QQ重著住校服，我都可以話係女同學上嚟一齊溫書做功課謦project吖…
Q：「Uncle…對唔住呀…我係阿爽嘅同學嚟咋。」


無用嘅我唔識答老竇嘅問題，QQ已經快我一步開聲答咗呢條問題。
爸：「妳係…佢同學？上嚟玩？而家咁夜…」
老竇佢一路問，一路四周圍觀察；QQ套校服同佢啲底裙內衣攤晒喺梳化，書包同書就放咗喺枱面，明顯地就唔係女同學或者女仔朋友上嚟玩嘅格局。
其實唔係好夜啫，啱啱先係十一點，一早有其他女仔喺我屋企留到咁夜，不過時間人物都唔係重點，重點係被人抓包…即係撞破…正所謂上得山多終遇虎。
QQ攝手躡腳咁爬咗落床，然後企咗喺我老竇前面幾步嘅位置，稍為正式咁彎一彎腰，半低住頭…
Q：「對唔住…我唔係上嚟玩，因為我屋企出咗啲事，無可奈何之下…嚟咗你屋企暫時住住先…」
QQ雙手放前，輕微屈住個身，為嘅就係…因為佢無戴Bra，要用一個比較奇怪嘅姿勢等自己心口嗰兩點唔好凸得咁明顯。
爸：「即係…妹妹妳呢幾日都係住喺度？」