【代糖故系列】《她被寄宿到屋邨男孩的家中》: 571

何：「啲女僕呢，可以千奇百怪㗎，每一個都有唔同嘅性格，提供獨當一面嘅服務，基本上只要做到侍應嘅職能同埋唔好得失啲客人，我都會由得妳哋自由發揮嘅…但係有一點非常重要，就係千祈唔好同啲客人太親近，絕對唔可以用啲奇怪方法吸引佢哋使錢，因為咁樣係會做爛餐廳個名…」
我：「嗯…呢點我都理解嘅，我唔會亂嚟。」
何：「睇妳個樣就唔似會咁做嘅，但我都要提醒定妳先，好喇，而家出去跟Momoko學嘢啦。」
※※※※※
我：「嘩，妳放工返嚟喇！」
Q：「做乜大驚小怪，講到我好似返唔到嚟咁…」
我：「點呀，辛唔辛苦呀？」
Q：「唔辛苦呀，有另一個姐姐陪我，成晚我都係捧咗十幾次碟同嘢飲，畫咗兩個蛋包飯，同一個客影咗張相，嚴格嚟講我嘅工作都係負責企喺度俾人望，論工作量我諗連你嘅三份一都無。」
我：「咁有無乜趣事呀？學到啲乜？」
Q：「無乜特別呀，不過好多客都怪怪地，唔係好識同佢哋交流，啲男仔好似想開口同我講嘢又諗唔到講乜，然後問我攞紙巾…最主要咪學識御主人樣同多謝惠顧請慢行，其實都係咁。」




我：「正正常常咪幾好…梗係妳平時識嗰啲男仔全部係男神嚟，對住啲宅男就唔識應付。」
Q：「咪亂噏呀，我識啲男仔好普通，定係你想話你自己係男神呀？」
我：「妳先唔好講笑，我邊敢當。」
Q：「鬼叫通街都係妳EX呀。」
我：「真係唔係喇，先得嗰兩個…」
Q：「哼，唔知你啲情史呀…嗱，你睇下！」
佢喺銀包入面揞咗兩張紅衫魚同一張綠蟹出嚟。
我：「都幾好pay喎，而且重要即日出糧。」
Q：「我未夠秤唔做得嘢㗎，所以當我去玩即日畀返錢我以免麻煩，本來無咁多，有個客搵我影相所以多咗廿蚊，嘻嘻。」
望住一個富家女為咗廿蚊心花怒放，感覺實在係難以言喻，但肯腳踏實地賺少少使費，點都係好事嚟嘅。




而我就有啲唔知點，佢賺到錢當然可以令到我哋嘅生活輕鬆少少，但係…我嘅作用就好似打咗個折扣咁；不過無嘅，呢雞碎咁多唔會令佢離開到我哋呢間屋企，喺可見嘅將來我同佢都要繼續互相扶持生活落去。
我：「咁妳下次返工係幾時呀？」
Q：「後日囉，星期三。」
我：「乜返得咁密嘅咩？」
Q：「唔係，因為頭兩三次都係主要返去學嘢，所以咪拍住其他女僕返囉，遲啲到我熟咗就可能得返自己一個，尤其係放完復活假嘅平日，咁搵唔到其他女僕咪搵我返囉，因為佢話我咁細個都唔想我太辛苦，主要係畀我體驗下，叫我預一個禮拜返一至兩日咁。」
我：「嗯，咁都唔錯，當課外活動玩下。」
Q：「唔講咁多先，我去洗白白瞓覺喇。」
即係話，我可以預計佢一個月搵到千零蚊；但係，佢咁靚女，如果第時好受歡迎，咪會越嚟越多工返，個個客又課金畀佢影相，收入咪…算，唔諗咁多，如果佢養得掂自己都唔錯嘅。