【代糖故系列】《她被寄宿到屋邨男孩的家中》: 657

有能力照顧QQ，有能力教Wendy計數，有能力再喺陸運會攞牌，有能力令到啲女仔圍住我轉，等我左擁右抱，前後包抄，上下其手…然後再俾佢哋狠狠咁圍毆一頓。
我：「Queenie！多謝妳，今次嘅成績係全靠妳…」
Q：「我無特別做過啲乜，只係同以前一樣溫書。」
我：「唔關事，係因為你喺度我先會有動力！」
我雙手搭住佢嘅膊頭，認真嘅眼神向佢投以無盡嘅肯定。我好想同佢講，以後都會努力讀書，妳揀邊科我就揀邊科，一齊入U繼續做同學，到時可以喺hall瘋狂咁扑嘢，永遠喺埋一齊。然後下一秒我就醒咗，除咗理科外，其他科我同佢重有一大段距離，而且佢係人哋條女。
Q：「就算得你自己一個都可以畀心機㗎，我無可能永遠睇住你。」佢向前行一步抱住咗我，輕掃我嘅背脊，咁樣…係咪對我嘅肯定？
我：「放心…以後…」
「叮噹！」清澈嘅一聲響鈴將我哋嚇咗一跳。
搞乜鬼？房署嚟查牌？我又無養狗…老竇郵購禮物畀我？無可能，又唔係大時大節，而且佢已經加咗我生活費…淘寶？我啱啱先落單而且填咗集運倉自取。咁，到底係乜？
我同QQ對視一眼，再保持肅靜，偷雞摸狗咁行去門前睇下防盜眼，點知…俾我見到一個最仆街嘅答案；我即刻攞起床頭部電話，然後較成靜音。




QQ望到我咁樣都知唔妥，行嚟我身邊捉住我隻手，再喺我耳邊講嘢。
Q：「到底…乜嘢事？」
我：「係傻仔健…」
呢個時候唯一可以做嘅係保持鎮定，一齊放咗一隻手指喺嘴前做個殊嘅動作。
唔使十秒鐘，我部電話就震緊，當然唔聽。
我不朽成日都躝街㗎啦，屋企無人係好正常。
健：「喂！呀爽，開門呀，嚟探你！」
佢喺出面大力咁拍門，透過氣窗講嘢入嚟，我同QQ唯有唔郁扮木頭公仔；其實我哋可以郁嘅，都唔會有乜聲，但由於實在太緊張，所以拖住手好似兩件木乃伊咁。
健：「唔使扮無人嘞！我啱啱聽到有人聲先㩒鐘㗎！你好快啲應我。」
QQ向我投以求助嘅眼神，但我又可以點喎。




諗下諗下扮無人重可疑，反正我唔開門佢都吹我唔脹，所以我透過氣窗：「乜春事呀？！」
健：「都話嚟探你咯！快啲開門啦。」
我：「無端端上嚟做乜，我唔得閒呀…」
健：「喺度忙乜呀，咁啱我好得閒。」
我：「我…打緊飛機呀，第二日再搵你玩啦。」
健：「咁不如一齊打？我喺電話抄啲正嘢過你！」
我：「你黐線嘅咩！我唔係基㗎，唔想見到你條嘢。」其實見過嘅，嗰陣我哋得中一游水換衫，我下面重係光滑一片，佢已經有幾條毛仔。