【代糖故系列】《她被寄宿到屋邨男孩的家中》: 932

Y：「邊有人睇到喎，捉先算啦，咦，你隻手搞乜鬼呀？」佢個樣咁錯愕嘅，明明就係妳嘅好事。
係因為要扮到唔關佢事？然後…佢指住QQ嘅好事。
我：「無呀，得罪人多…嘅結果。」
Y：「呵呵，我真係十分恭喜你，夠晒抵死。」
我：「關你乜事喎，你理得我點吖。」我都唔識妳嘅。
聽完一首QQ同中六師兄合奏嘅優美音樂，佢亦都落返台，向住我哋慢慢行過嚟，YY見到就叫Zilvia褪開一個位…
Q：「喂，我同條友唔係好熟㗎咋喎，唔使特登讓個位出嚟。」三女神歸位，連我隔籬個低form都望一望。
Y：「咁話晒都同班同學吖嘛。」
Q：「好話喇，出年妳哋咪又係同班同學。」
Z：「嘻，開心，估唔到過咗兩年我哋又可以同返班。」




Y：「妳睇下，個傻仔隻手唔知搞乜鬼。」其實唔使佢講，我feel到側邊所有人經過都會望一望。
Q：「佢不朽係咁，都唔知佢係出面點攪三攪四法。」
Y：「It’s so dirty…都唔明點解妳會同佢friend。」
Q：「黑仔囉，不過佢都幾好笑嘅…咦，乜你有咁大包曲奇嘅，出面…大特賣呀？」
我：「算係嘅，使唔使…攞塊？」
Q：「唔使喇，無福消受，留返畀你慢慢食。」
右女神嘅眼神，話畀我知佢一眼就睇穿係Wendy特登留畀我嘅，唉，都唔知佢想點，我都無呷妳醋啦，咁樣望住我想點…又唔係我主動flirt到Wendy畀我嘅。
下一個節目係，辯論學會之高低form對決。
題目係：『為保育生態環境，政府應否立法管制魚翅售賣？』比較有趣嘅係兩邊人即場抽正反方。
我曲奇又攞完，女神嘅音樂又聽完，該做嘅嘢已經做晒，講真想返屋企抖下食曲奇，但如果而家走又搞到好似我專登嚟聽QQ彈琴咁，不過應該無乜人得閒講我閒話？




我：「嚟緊重有乜嘢節目呀？辯論好鬼悶…」
Q：「唔知呀，不過我哋重要等人，應該啱你口味嘅。」
佢咁講係想我留低？我都唔知…結果我坐喺度瞌眼瞓。
Q：「各位好，我係3B班嘅K茜旎，我想問一問反方嘅同學…」原來係Q&A環節，身邊嘅中文學霸又搵機會表演。
Q：「你哋頭先講過政府唔需要立法干預都可以解決到問題，市場有佢嘅運作原則，例如靠額外徵稅影響供求平衡就可以調節魚翅嘅銷售量，但你哋有無諗過，每開一個新嘅稅收項目其實都需要有相應嘅法例去支持政府嘅行政措施，亦都要經由立法會討論通過而變做成文法，由於題目所講嘅前提並唔係話一刀切禁止魚翅交易，討論嘅重點亦唔係刑事法同罰則，所以我認為單單就魚翅銷售作額外徵稅已構成政府立法管制魚翅買賣，請問你哋有乜睇法呢？」QQ一輪嘴講完後全場鴉雀無聲，作為反方嘅高form同學更加係面色大變。