【代糖故系列】《她被寄宿到屋邨男孩的家中》: K101

好一副唔使憂柴憂米憂國憂民嘅樣，簡稱公子哥兒，唔怪之得隨隨便便就可以幫QQ買個keyboard；而且，佢都幾型仔下，絕對唔係Mirror嗰種偽韓風MK仔嘅感覺，眼前嘅佢頹得嚟帶點不羈，隨意嘅眼神滲透住點點智慧，成熟嘅年紀卻掛住童心未泯嘅笑容；高大，sharp醒，重有啲肌肉，你同我講一個咁嘅男人寫甜故，我係咪有啲誤會，乜唔係甜故嘅作者同讀者都係肥矮毒腐宅嚟嘅咩？
我：「你又知同你交收嗰個係我？」
G：「點會唔知呀？你攞住咗啦…」
我：「包到冚喎，你透視眼睇到入面係乜？」
G：「係一個keyboard嚟…」佢有啲無奈。
我：「未必㗎，呢個size可能係枝AK嚟。」
G：「係嘅就攞出嚟嘭瓜我啦。」
我：「咁我又點知我要交收嗰個係你？」
G：「咪玩啦，你係黑桃王后…妹妹叫你嚟嘅？」
我：「吓？我唔知你講緊乜嘅？啱唔啱㗎？」




G：「我係G奶呀，你唔係X…square開方咩？」
我：「咁就啱嘞，呢度係你個keyboard，驗貨啦。」我隔住塊玻璃抬咗部琴畀佢，但睇嚟佢就無驗貨嘅打算。
唔同旺角，南昌站呢度大而無當人流稀疏，早幾年更加過份，所以我以前鍾意喺度跳出閘免費去深水埗；而家現場得我哋兩個係交收樣，所以基本上係無認錯人嘅可能性，我嘅質疑完全係出於我嘅玩嘢。
G：「你係…個女仔嘅兵嚟？」
我：「吓…點會呀，我師姐一啲都唔靚女，做乜要兵佢，我係睇在一餐飯份上先幫佢托呢件石頭過嚟。」
G：「妳…肯定佢係妳師姐？」佢一頭霧水。
我：「係呀，師姐話學校音樂組啲器材要更新，而呢部嘢唔係學校物資而係校友捐出，所以佢哋咪套現吞咗佢。」
我覺得如果唔計文筆同錯字，我其實都適合做一個作家。
G：「哦，原來係咁，我都明白嘅…」
我：「明白就啱，係咪唔驗貨喇，一手交貨，一手收…」




G：「喂，我好似已經過咗數畀你個師姐喇喎。」佢為咗配合我嘅大話，自己都講埋大話呃自己。
我：「的確好似有件咁嘅事，我驚我攪錯咗啫。」
G：「死仔包，你唔係特登過嚟謴水呀？」
我：「唔係，咁交收完我就閃人㗎喇。」
G：「閃啦，你又唔係物主，對你無興趣。」
正當我想閃人之際，又突然擰返轉頭。
我：「G奶哥哥，點解你個名叫G奶，但覺得男仔頭平胸妹芷華好，我唔明呀…」
佢安放喺面上嘅兩粒眼珠一轉，露出詫異嘅笑容。
G：「呢個故唔係畀你睇㗎，等你大個咗就…可能都未必明，唔緊要啦，如果你有興趣不如睇咗學生妹身體檢查先。」雖然講甜故，但佢個樣真係好正經。
我：「嗯，好感激你嘅建議，多謝晒，走先。」




G：「乜都唔知你又會知我寫文，玩嘢呀？」
我：「你理得我吖。」講完就揚長而去。