【代糖故系列】《她被寄宿到屋邨男孩的家中》: K123

Q：「收咗佢呀，我唔可以要你白蝕時間陪我打機㗎。」
健：「點會蝕喎…出面唔知幾多人課金請靚女陪打機啦，佢哋恨都恨唔到，我重可以近距離望住妳隻腳仔打機，賺晒嗰個係我，又點會蝕喎…」
Q：「我希望你知道自己係喺度做緊乜…我係嚟麻煩你幫手上分演出等我賺錢，而唔係我喺度陪你玩，如果你係諗住當我陪玩，sorry，我諗我唔會做你生意。」
健：「唔係嘅…咁妳第一日先搵到嗰少少…」
Q：「知唔知乜叫均真？大家樂上一份年報話佢無錢賺添，你會唔會去食飯嗰陣叫佢畀少啲你？唔好因為我係Kuromi就諗住益我，唔代表我會開心，想我開心好簡單，努力演出等啲觀眾睇得過癮就得，女仔係會欣賞有能力同有才華嘅男仔，而唔係嗰啲一味剩係識畀著數嘅。」
有時QQ好認真，講幾句重犀利過中文作文，健仔亦只好死死氣咁收咗個八十蚊；我心諗，嘩，女神妳連最低工資都出唔起重可以大放厥詞，實在係不戰而屈人之兵，不禁令小弟十分佩服，萬分欽敬。問題係，點解對我就又使喚又操弄，重有食我嘅住我嘅用我嘅，究竟幾時要均真，幾時又唔使？
Q：「同埋…直播呢啲唔係剩係睇禮物㗎，例如我出個post話跌咗銀包，隨時就有堆勇士上嚟進貢…」
我：「嘩，妳咁樣同騙子有乜分別？」
Q：「無㗎，不過我唔會咁做囉，所以你都唔好咁傻豬。」健仔當年…其實年頭咋嘛，差唔多一個禮拜就一個skin，彷彿女神而家再補多幾刀喺佢心口上面。
我：「聽到未呀，就算女神話餓死都千祈唔好信，由得佢餓死先係正解。」




Q：「又真係無咁易，G奶講過如果我無飯開可以隨時搵佢，可以請我食嘢。」
我：「咁梗係啦，人哋根本想見妳同妳食飯…」
Q：「唔係呀，佢意思係只要我搵下附近有乜餐廳有join外賣app，同佢講聲就會幫我落單。」
我：「吓，咁妳日日食窮佢咪得囉，以後唔使我煮…」
Q：「你知唔知道濫用人哋嘅好意係比打劫更加缺德？」
我：「得喇得喇…打劫我就好，呀，講起嘢食，我喺酒樓攞咗隻咁嘅嘢返嚟，如果妳想嘅話…」
Q：「乳鴿？點嚟㗎？」
我：「有枱家庭聚餐嗌一人一隻，點知啲細路個個唔睺，呢隻無人食剩返喺度，如果妳唔食我就解決咗佢。」
Q：「OK吖，切兩隻髀畀我，其他你嘅。」女神真係有夠好嘢，乳鴿無咗兩隻髀之後已經無乜好食，雞肋都不如…但當然我都係照做貢獻畀佢。
健：「真係估唔到Queenie女神而家會變得咁貼地。」




Q：「喂，生活都係要過㗎，唔通日日自怨自艾等死咩，如果唔係我落難，邊有得你睇我隻腳仔喎。」