[愛情] [校園] [足球] 我鐘意你 但係我唔可以同你一齊: 18.
食飯都無乜特別，都係五條麻甩佬是但揀左間茶記，食完就番去練4*100
除左啊賢同啊婆之外，我地三個都要番去練下接棒，因為食飯時間個場係空嘅，所以每年第二日嘅食飯時間都特別快食完
練左陣都感覺唔錯，當然就無全力跑啦，留番啲力一陣決賽算。
好快放飯嘅時間都完左，學生都陸續番黎
下午嘅第一個活動就係個啲中六嘅表演啊，傳火炬個啲，都有番啲時間休息
終於黎到運動會最激烈嘅時段，所有決賽賽事都係呢個時候開始。
意味住，接下來餘下嘅賽事都係獎牌爭奪之戰
男子100米決賽嘅召集廣播都開始左 ＂接下黎係男子100米乙組決賽嘅名單，請係十五分鐘後到召集區＂
究竟有無我呢，我坐低左，雙手合十，希望就算唔贏都可以跑下。
＂林以行＂啊行嘅名都出現左，不過佢跑第一都真係好正常
＂李xx，陳xx，黃xx，許xx，曾x，潘xx＂己經叫左七個名了，睇黎機會都好渺茫
＂最後一位，馬子朗，請係十五分鐘後召集，唔該＂
黃曉瑩原來一直坐左係我後面，但我己經緊張到乜都理唔到
竟然有我個名！我入左決賽啊！！！
我跳左起身大叫左聲 「 Lets go！！！！！」 其他人見到我彈起左都走過黎恭喜我
無諗過我竟然第二名都入到決賽，仲要係同大我一年嘅人跑
我望後見到黃曉瑩對住我笑，我攞起左佢送比我個支野飲，指住左佢，示意住我得左啦！！
我行上去興奮地講「我得左啦！！我入左決賽啊！！」
黃曉瑩笑住得戚咁講 「證明我眼光唔差！一開始睇完就知道你入左決賽嘻嘻」
呢一刻嘅黃曉瑩，真係好靚......
「多謝你一開始就咁信我就真，依家我超有自信唔係講笑」我笑得像個孩子一樣
「咁就要用全力贏埋個牌番黎啦」黃曉瑩鼓勵我
我回應「放心啦，我一定會盡全力，威番次」
「我要去準備啦！多謝你嘻嘻，你都準備好睇我威啦！」我好自信咁講
「好啊，我實坐定定係度睇黎贏！」黃曉瑩笑得好靚
講完我就落左去地下召集，眼見除左我同啊行之外，其他嘅人都唔識，我估都係中四嘅人
正當我想同啊行吹水嘅時候，見到佢嘅眼神超認真，好似想殺人咁，其他選手都一樣，睇黎全部人都係衝住個牌黎
行到起跑線嘅時候，我都比佢地嘅氣氛帶動左，我都要威番一次比黃曉瑩，足球隊同自己睇！
＂On your marks，Set！＂
＂咇！！！！＂呢場100米嘅決賽就開始左，我嘅起步同跑複賽嘅時候一樣穩陣，唔通贏再起跑線就係呢啲？
全場嘅歡呼聲已經無得再大，我都搏哂老命咁跑，好可惜，大一年真係大一年，最後我都係跑第五名，啊行就跑第四。
對我黎講，雖然贏唔到牌真係有啲失望，但係第五黎講其實已經係好好嘅成績
見到啊行火爆爆咁行番上看台，我都明白，差一名就有牌嘅感覺真係好難受，不過我都真係盡哂力，輸左都真係無辦法
我都隨後慢慢行番上看台休息，其實有啲唔係好想上番去，原因唔係唔敢面對自己，而係唔知點樣面對曉瑩
上到去時好多同學安慰我同啊行，話我地己經好快，不過我都聽唔入耳，相信啊行更加聽唔入。途中我同曉瑩對望左一下，我都無再上去搵佢交代番，因為真係唔知點樣面對，明明佢比左咁大嘅信心我，我就令佢失望左
我無乜精神地自己行去小食部買野飲，途中經過左黃曉瑩個位附近，同佢對望左多一下我就自己走左
去到小食部，買完之後我就企左係到自己發呆，因為唔想番去住
「喂，做咩咁頹咁啊～」企左係我隔離嘅係黃曉瑩
「你做咩係到嘅，無啊輸左啊嘛」我有啲嚇親
「見你好似唔開心驚你跳樓啊嘛，咪跟左你過黎囉！」佢又好似講得幾有道理
我望住佢，同佢講 「對唔住啊，你比左咁多信心我但我就輸左，我都唔知點樣比個交代你」
黃曉瑩呢個時候，雙手搭住我膊頭，聲量凌厲咁問我 「你有無盡力！」
「我盡左力啦....真係唔夠佢地快」我聲線就好似螞蟻咁細，唔敢面對住佢
「咁就得啦！你盡左力我就好滿意㗎啦！起碼你有用盡全力，呢一個就係交代」黃曉瑩即刻變左個態度，原來一開始係想嚇下我
佢講呢句野嘅時候，我好似見到對翼同光環係佢後面。佢就好似個天使咁，其他人安慰我嘅說話我係聽唔入耳，但係佢講出黎就好似完全唔一樣咁。
呢一刻我即刻釋懷左，聽到黃曉瑩咁講我都放心哂，甜甜一笑同佢講 「多謝你啊！我地一陣4*100再努力！！」
「當然啦，今次就真係要攞牌啦！」佢都好有鬥志咁講
好快我地就係小食部一齊行番去自己班，途中見到好多人望住我地兩個行，包括啊婆啊賢同埋啊柔，全部都對我種淫蕩嘅笑容
我就當然係無視佢地啦，就算我認左係有好感都好，都唔代表黃曉瑩有同樣嘅感覺㗎嘛
過多左陣就係4*100嘅召集，我地班四男四女就約好左一齊落去
我換緊釘鞋嘅時候都同黃曉瑩講左句加油，佢都笑住答我
「喂我地尋日個承諾係咪真㗎，大家都贏左就交換」我係佢耳邊細細聲問
「係啊～不過我地遲啲再換，贏左我想同個牌相處一陣先哈哈」佢講
我點頭「就咁話啦，你贏左就打夠卡再交換！」
我地召集完都去左各自己嘅起跑線，黃曉瑩係跑第三線，我係第二，所以都分開左行，臨走前我用握實拳頭，用唇語同佢講左句 「Ganbatte頑張って!」然後就走左
中一中二嘅人都好快跑完，首先跑嘅係女子組，啊儀真係無講錯，今年嘅佢地真係大熱黎，一開始己經拉左個好大距離，第二棒都發揮得中規中矩
好快就到左黃曉瑩，佢接完棒之後，就搏哂命跑啊跑，其實同其他班嘅選手真係唔係差好遠，但都開始比人拉番近距離，眼望依家佢地大概係第三至第四名
黃曉瑩同啊儀嘅交棒都好順利，最後一棒嘅啊儀都由第四追到第三，差一米嘅距離就追到第二，好可惜己經到左終點線
最後佢地第三名，啊儀真係無講錯，真係贏左個牌，遠望見到黃曉瑩跑緊番去同啊儀慶祝，睇黎佢應該好滿意。
我都跳左起身，開心埋一份。不過已經無時間比我慶祝，男子組嘅賽事都準備開始。第一棒嘅啊羊都示意叫我準備
" On your marks , Set ! "
"咇！！！！＂啊羊雖然唔係好快，但係都有足球員基本嘅速度，所以都係同其他班嘅人不相伯仲。好快就交左棒比我，我全力爆發向前衝，其實跑完個100米決賽我隻腳都開始攰，感覺都比我跑100米決賽嘅時候慢
但！都無人跟得上我嘅速度，拉開左一大段距離交棒比Moses
Moses接左棒之後我地都贏緊起碼10米嘅距離，正當我準備慶祝定嘅時候，Moses突然失平均，跌低左，我岩岩拉嘅距離都已經無哂，眼見Moses再起身重新跑過嘅時候己經係第五左右
終於交棒比啊行，即使我地依家第五都好，我都仲係相信我地可以追得番，原因係，因為最後一棒嘅係啊行，啊行一接棒之後，可能係連埋輸左100米決賽嘅憤怒，佢比之前更加快，加埋佢黑黑地，我係對面望住佢就好似望住個保特咁，追過一個，最後20米再追過一個。
衝線！最後我地同女仔一樣都係攞左個第三名
本身我想即刻去搵黃曉瑩同佢講，但Moses喊到豬頭咁，我就去左陪佢先
我地完左之後坐低左係換鞋區
「對唔住啊，如果唔係我，我地就贏左冠軍啦....」Moses喊住講
「唔緊要啦，我地依家都有牌啊，係咪先」啊羊講
Moses聽到佢咁講都好似平穩左情緒「對唔住啊啊行，辛苦哂要你幫我追番番黎」
「唔關你事，我係因為輸左個100米決賽先嬲到仆街，如果呢個都攞唔到牌，我會更加嬲自己」啊行拍一拍Moses膊頭安慰
「咪就係囉，收拾好心情，一陣開開心心上台拎獎！」我講
因為贏左嘅隊伍要等埋之後嘅賽事，一次過頒所有4*100嘅獎所以我地好快就同女子隊佢地會合左坐低
見到黃曉瑩好開心，笑得好燦爛。
「勁喎，好野有得換牌了！」我同佢講
「嘻嘻，呢個係我運動會第一個牌黎㗎！」佢望住出面嘅獎笑住咁講
「好可惜我比唔到個金牌你啦，中間Moses跌低左」我係佢耳邊講
佢即刻係我耳邊講番 「唔緊要啦，意外呢啲野點都會發生嘅，我地大家都換同一類獎牌咪仲有意思！」
我係度諗，又好似係喎，撞都無咁岩，又真係一齊攞季軍，諗下諗下我係度甜笑
「你好似講得無錯，嘻嘻叻女啦！一陣我地攞住個牌影張相好唔好？」我甜笑住講
「好啊！你一陣過黎搵我我就影啦！」佢答
頒完獎之後，意味著今年嘅運動會都完滿結束，淨餘嘅時間都係比我地影下相
我第一日都影得好少，所以依家有個牌，即刻周圍搵人影相
好多朋友都因為我100米嘅表現想同我同啊行影
有啲唔識嘅師弟師妹我地無拒絕，好快影影下就差唔多要走，臨走前我拉左黃曉瑩去個無咩人嘅地方影相，幫我地影嘅係啊婆
我地大家都攞住個銅牌合照，再諗番如果我真係贏左金牌嘅話，好似真係無依家咁有feel，講真
大家都記得呢個承諾，但都無係其他人面前講出黎，就好似係我地兩個人嘅秘密一樣，感覺好甜。
就係咁，我嘅中三運動會最後一張相就係同曉瑩影嘅，亦都完滿結束