《愛在。貴族學園》: Ch 4 ~ 遲到 Part 2

Ch 4 ~ 遲到 Part 2（連載日期：2021/09/21）

(繼續林俊軒視角）

「二少爺早晨，係譚管家」譚管家喺門外面道。

譚管家喺呢到做管家做咗好多年咖啦，基本上都係由佢帶大我同家姐，始終我地父母經常都要為生意四圍出差，而且家族公司規模都唔係細，佢地要care嘅嘢實在太多，所以都好少時間陪到我地兩姐弟。
 
我於是覺得有啲唔對路，唯有打開門問「呃……譚管家早晨。請問你一早就搵我有咩事？」





我其實平時我都會準時出房門準備返學，不過因為今日諗返張韻喬個夢諗得太入神，所以完全唔記得咗時間。

「二少爺，請問你今日仲要唔要返學上堂啊？」譚管家用略帶一點緊張嘅語氣問我。

「我會返學啊，譚管家。點解你會咁問嘅？」如果真係要問張韻喬拎電話號碼嘅話，就梗係要返學啦。

不過，突然之間有少少不安，所以我再追問譚管家「咪住先譚管家，請問依家幾點啊？」

「二少爺，依家已經係7點55分啦，你學校仲有有二十分鐘就會打鐘當遲到咖啦！」譚管家提醒我





「咩話？已經7點55分？！」
 
Shit！原來諗下諗下已經成八點咖啦？大獲啦，今次實遲硬到啦。

哎呀，如果俾班主任Ms 張見到，我又要俾人鬧之餘，仲要畀學校記名。

唉，早知就唔諗咁耐啦，依家我居然為咗個張韻喬而遲到。

既然時間咁緊迫，所以我喺換校服嘅同時，先叫譚管家安排車準備趕返學校。





「譚管家，即刻叫司機準備開車先！個早餐我會拎返學校先食，唔該」
 
「知道，二少爺」之後我馬上換上校服，然後衝出門口上車。

不過好在嘅係，由屋企揸車返學校都唔算好遠咋，而可能司機都知道我就快會遲到嘅關係，所以佢都開快咗少少，結果比平常快5分鐘返到學校。

「唔該司機，放學見，bye bye」
 
「bye bye二少爺」司機同我道別之後，佢就將座駕開離學校所在嘅小路，而我落車之後都望下自己隻表……
 
「Damn！不過快呢5分鐘都已經冇用啦」我之所以咁講，係因為我返到學校嘅時間，已經係8點20分，而學校嘅打鐘時間係8點15分。

冇錯，我因為張韻喬而遲到。唉，橫掂都已經遲咗到啦，所以我落咗車之後，我都慢慢行上Form 5A班房，順便欣賞下校園嘅美景。

不過，喺我打開門踏入班房嘅時候，全班同學都即刻望住我。





而Ms 張見到我遲到，就即刻變臉變到黑哂，仲快過四川表演嗰啲，見到之後真係毛管都棟埋，好L恐怖呀師傅，求你幫下我啦，等我唔好死得咁慘！
 
「其實呢，我真係好討厭同學遲到……」Ms 張七情上面咁講，今次有排受啦......

「一來，你喺度話緊畀全班同學聽，你完全冇時間觀念。二來，你打斷同浪費同學認真學習嘅寶貴時間。」

「三來，我又要聽學生故仔去解釋點解今日會遲到。四來，一陣落堂返到staff room我又要記落操行簿……..」。
 
見到Ms張咁好火，今次唔認衰仔都唔得啦，所以我頭耷耷話「對唔住Ms張，今日係我自己唔知醒，同時都對唔住各位同學，哂咗大家幾分鐘學習嘅時間」

呢個時候我梗係唔可以話因為張韻喬個夢而遲到啦，唯有夾硬話自己唔知醒。
 
不過，我一早就要畀Ms 張咁喺全班面前鬧法，真係乜心情都冇哂啦「返埋位啦林俊軒！唔好再畀我見到你有下次！」
 




「知道Ms張，真係好對唔住！」於是我就成隻死狗咁行返埋位，而大家都繼續望住我。唉，好樣衰呀！今日真係好想做摺友。

不過，估唔到我返埋位之後，Ms張繼續用我黎同全班發炮……

（待續 ~）

IG link https://instagram.com/bear_big_big_writer