《愛在。貴族學園》: 特別篇 2 ~ 女孩們的聖誕節 Part 1

特別篇2 ~ 女孩們的聖誕節 Part 1（連載日期：2021/12/24）

就喺上學期考完試、啱啱開始放聖誕節假嘅時候，喺李家大宅裏面，天殷百無聊賴咁喺度上網，睇下呢個長假期可以有乜玩，唔使日日都咁悶留喺屋企，又或者要陪自己父母，參加一啲非常無聊嘅有錢人party。

就喺天殷繼續上網嘅時候，佢突然之間見到一個post，“咦？有攝影師聘請Model私影（棚拍、外拍）聖誕主題，有主題服裝、化妝師提供，薄酬，詳情請inbox或 Signal 查詢……”

天殷於是就打開個攝影師嘅Facebook page，Stalk下裏面po出黎嘅作品。

作品大部分都係悠閑外拍為住，極度偶爾先會見到有少量攝影棚裏面，比較性感嘅私房作品。





睇完一大輪相，天殷就同自己講話「睇落呢個攝影師雖然係男仔，但係影出黎嘅作品，大部分都好正經咁，應該都唔會有問題掛？定係都係睇下風評先決定啦」天殷於是就喺唔同嘅專頁，睇下呢個攝影師嘅風評。

非常好彩，天殷見到絕大部分曾經合作過嘅Model，都覺得呢位影師非常有專業操守，而且好多時都會聽model意見，盡量去互相配合，等自己同model都非常滿意出黎嘅作品。

於是，天殷都同自己講「雖然網上面嘅嘢，都唔可以全部都信哂嘅。」

「但係，人一世嘅青春係有限咖喎，如果我依家唔趁後生，好好咁留低自己嘅青春印記，將來想影都冇可能影得返咖喎！」

「不過，如果得我自己一個女仔去嘅話，我都怕自己有危險喎」雖然天殷平時都好少會理後果，但係今次天殷都居然會諗到呢一步。





所以，天殷嘅解決辦法「呀！不如就搵埋喬喬一齊啦，佢雖然平時好少打扮，但係我估平時甘多男仔圍住佢，如果有少少襯托嘅話，應該都會幾好睇咖喎！」

「咁就決定搵喬喬陪自己啦！」天殷口中嘅喬喬，就係佢喺學校裏面，少數嘅知心好友，喺4A嘅同班同學張韻喬。

天殷冇考慮得太多，就直接打電話畀韻喬。而韻喬好快就聽電話……

「喂，喬喬！」「喂！殷殷？做咩突然之間打畀我嘅？」韻喬喺電話裏面嘅語氣都非常驚奇，或者韻喬都冇諗過天殷會突然之間搵自己。

天殷於是就單刀直入，直接問韻喬「過兩日聖誕節，你有冇時間呀？」





聽筒嘅另一邊隨即傳出揭紙嘅聲音，然後韻喬就話「等等我先下，你想約我……25號?」

「係呀喬喬，不過你嗰日要唔要陪屋企人呀？」今次天殷居然要到呢一刻，先記得問韻喬得唔得閒「咁你等我一陣先下」

過咗三十秒之後，韻喬先至再同天殷講「殷殷呀，唔好意思呀，25號我應該唔得啦，但係如果24同26號嘅話，我就都ok嘅。你想約我去邊玩呀？」

「其實呢，我想影一套私影呀，不過我又怕得我自己一個……」

「有危險，所以你就想我陪你一齊影，係咪呀？」韻喬打斷天殷嘅説話，將整句句子嘅下半部講埋出黎。

天殷於是就好驚嘆咁話「張韻喬，點解你可以咁聰明咖？」

「車！你估我真係唔知你喺度諗乜嘢咩？」韻喬反駁道。

「佩服佩服呀！不過喬喬你得唔得閒先？又或者你想唔想陪我一齊影」天殷再繼續問韻喬，同時天殷都同韻喬解釋點解要去私影嘅原因。





韻喬聽完之後就覺得「你又好似講得幾有道理咁，你講講下我都想影埋一份添！」

「不過殷殷呀，你check清楚個影師嘅背景同風評未咖？」韻喬嘅語氣突然之間變得好憂慮咁講「你都應該聽講過有啲影師，點樣氹啲女仔去影大尺度性感相，甚至要求個女model同個影師做……嗰啲嘢」

「下？我就睇過啦，見好多女model都話個影師ok咖喎！」

「車！你唔畀同個影師所謂合作過嘅女model，全部都係打手黎咖咩？」韻喬反駁到天殷無話可説，於是天殷就話「不如，我畀個影師個名你，你都幫我一齊search下囉！」「好呀！」

天殷於是就將個影師嘅資料，send咗去韻喬度，韻喬於是就開始睇「睇咗大半個攝影師個portfolio，就冇咩特別，係其中有少少……性感咗少少，不過都係啲大姐姐影。至於風評，我都係幫你睇下先」

「不過啲相，你覺得冇問題吧？」天殷再三確認韻喬嘅睇法，而韻喬好快都話

「我覺得冇太大問題呀殷殷，但係我地都係睇下其他人點講先啦」「好啦咁，唔該你呀喬喬！」





韻喬於是一路check，一路同天殷繼續傾下無聊嘢，仲時不時同天殷抱怨，對方成日參考自己功課嘅問題「得啦，我一定會自己做功課咖啦！」「聽住先啦！」韻喬反駁道。

「好啦，我都已經睇過forum嗰啲post，原來個影師本身都有同大明星做形象顧問同指導咖喎，咁我諗應該都ok掛，除非佢同啲女明星咩啦……」似乎韻喬都會開綠燈，令到天殷都稍為放鬆一下。

「咁喬喬你啫係……覺得ok」「係呀，大小姐！如果你真係想影嘅話，就快啲同個攝影師約時間啦！」韻喬終於都應承天殷，於是天殷就好高興咁話「我就梗係會影啦，喬喬其實你裏裏外外都幾好睇呀，一齊影啦，開心啲！」

「哈哈，多謝你讚我啦。放心啦，我都會同你一齊影嘅，反正我都覺得，我地都應該要有啲嘢，去記錄我地嘅成長嘛！」

「所以，你就快啲同影師約時間啦！如果夾唔到時間就麻煩啦！」韻喬都好似好高興咁講。

於是天殷就開始聯絡個影師約時間，而韻喬「不過殷殷呀，其實你之前影過私影未咖？」「未呀，所以咪想聖誕節影一套囉！」

「咁樣呀，咁你記得喺同個影師越好時間之後，你就問埋有咩係要注意咖喎！」韻喬好心咁提醒天殷，雖然好多時候，韻喬都反而係唔識照顧自己嘅一個。

「知道啦，咁一陣我同個影師約好哂時間地點之後，我再text你知道啦！」





「ok咁我做住自己嘢先啦！遲啲再傾啦！Bye！」喺收線之後，天殷好快都收到影師嘅答覆。

最後佢地都約咗24號當日影到夜晚，而集合嘅地點，就係影師喺觀塘嘅工作室。

（待續 ~）

IG link https://instagram.com/bear_big_big_writer