《愛在。貴族學園》: Ch 12 ~ 好從實招來啦下 Part 5

Ch 12 ~ 好從實招來啦下 Part 5（連載日期：2022/02/25）

去到第二日嘅朝早，俊軒就如同一衆Form 5A嘅同學一樣，如常返到班房。

但因為天氣喺晚間起風轉涼咗唔少嘅關係，而且仲未到換冬季校服嘅季節，所以大部分同學今日都有著冷衫返學。

到早上8點15分打鐘嘅時候，班主任Ms 張進入班房點名。不過，喺Ms張返到班房嘅時候，天殷就發現韻喬居然冇返學，心裏面就開始緊張起黎

“咦，點解喬喬仲未返學嘅？我記得佢有預塞車時間咖喎，應該都唔會塞咁耐都返唔到學校咖喎“





天殷見有啲唔對路，於是就喺櫃桶裏面，打開自己部電話，睇下交通消息。不過天殷都搵唔到香港仔隧道入香港仔塞車嘅消息。

同一時間，Ms張已經開始點名「請問有冇見邊位同學冇返學？」天殷喺Ms張講完之後，就舉手話「Ms張，張韻喬同學好似absent」

Ms張於是抬起頭，望向韻喬空空如也嘅座位，確定之後就話「好，唔該李天殷同學，咁你記得幫韻喬同學抄notes啦喎」「知道啦Ms張」

當然，對於天殷黎講，幫韻喬做筆記，簡直就係人生一大難題，畢竟平時喺學業上，天殷都係由韻喬carry自己，如今靠山缺席，自然倍感壓力山大。
 
同一時間，因為韻喬、天殷本身同俊軒、禮謙唔係一齊坐嘅關係，所以當兩個男仔知道咗韻喬冇返學之後，都感到非常驚訝，而且都好擔心韻喬情況。





不過，因為都需要準備上堂嘅關係，變咗俊軒同禮謙佢地兩個唔可以直接問天殷，到底知唔知韻喬發生咩事冇返學。所以佢地都要等到小息，先可以問天殷。

喺打鍾落堂放小息嘅一刻，俊軒同禮謙兩個，就即刻走去天殷個位，然後示意天殷出去班房外面嘅走廊。

天殷喺畀兩個男仔半推之下，就不滿道「喂！你地兩個使唔使咁心急呀！？平時其他人absent又唔見你地兩個咁上心？」

兩個男仔無言以對，然後俊軒就仲係有少少緊張問「咁殷殷，我地想問，到底你知唔知道，點解小喬今日會冇返學嘅原因？」「我梗係知啦，話哂我係喬喬嘅好姐妹喎。」

「不過你地兩個可唔可以同我冷靜少少先呀？你地兩個依家好似想……想將我食咗咁樣，好恐怖呀！」天殷用兜圈嘅方式，去表達自己對兩個男仔嘅不滿，搞到兩個男仔都即刻同天殷講對唔住





「小喬佢今日唔舒服，所以冇返到學」天殷喺等一等之後，就同俊軒、禮謙講。
 
「咩話？！小喬唔舒服？點解呀？」俊軒同禮謙兩個都好大聲咁，表現出不可置信嘅表情。

「喂你地兩個洗唔洗咁大反應呀？病咗咪病咗囉！」天殷都好大聲咁反問俊軒同禮謙兩個。
 
「冇…冇嘢，不過，我想問小喬有冇同你講係因為咩事唔舒服而請假？係咪因為腳痛？」俊軒先問，但同時都用眼神射向禮謙，暗指禮謙因為唔小心踩到韻喬，而令到韻喬受傷。
 
「唔係呀小軒，佢係因為頭痛同埋發燒，所以頭先打咗電話返學校請病假。然之後小喬就text咗我啦」天殷同時將頭先上堂嗰陣，同韻喬Signal嘅内容，畀兩個男仔過目。雖然天殷都知道内情，但佢都冇講太多。
 
「原來係咁，但請問天殷你…知唔知韻喬同學佢……睇咗醫生未？」禮謙追問天殷道
 
「呃，小喬頭先同我講，話佢已經打電話去醫務所掛咗號，然後一陣去落去睇醫生喎，佢冇再講太多啦」天殷面紅紅咁回應。

「不過軒仔呀，我想問下呢，喺你尋日送喬喬返屋企嗰陣時，喬喬佢個樣有冇咩異樣或者唔妥，可以搞到佢咁唔舒服要告病假呀？」今次到天殷有少少緊張咁追問。





（待續 ~）

IG link https://instagram.com/bear_big_big_writer