《愛在。貴族學園》: Ch 16 ~ 麻煩的一天 Part 2

Ch 16 ~ 麻煩的一天 Part 2（連載日期：2022/05/18）

佢地好快就已經去到醫院，因為今日係韻喬出院嘅關係，所以天殷佢地都唔使等到探病時間開始，就已經可以入去病房見韻喬。

而韻喬喺俊軒佢地到之前，自己已經將出院手續搞得七七八八，就等姑娘拎出院藥同繳費單。

“咯咯~”。天殷喺敲過房門之後，就直接打開病房嘅門，然後就同坐喺床上望風景發呆嘅韻喬打招呼「喂，喬喬！」

「咦，殷殷、小軒、禮謙，你地到啦？」韻喬一見到佢地三個人就好興奮咁講「啊！我終於都好番，可以返屋企啦！」
 




「恭喜你呀小喬，但係你嘅出院紙同藥呢？」禮謙見到韻喬原先做功課、食飯嘅枱面冇呢啲嘢之後，就好好奇咁問。

「未呀禮謙，我仲等姑娘拎過嚟畀我呀，所以我咪自己執定嘢先囉！」韻喬回答。
 
於是兩個男仔都幫韻喬手執好行李，仲有檢查啲櫃桶，睇下有冇將帶嚟醫院嘅書、notes、功課等物品帶返齊，當然仲包括埋衫褲等等嘅起居用品。

「小喬呀，我同禮謙都幫你check過啦，應該冇漏嘢啦！」俊軒睇過啲櫃之後就話。
 
「唔該哂你地幾個呀！呢幾日都要你地幫手喺度照顧我…」韻喬又一次好抱歉咁講「一開始麻煩到你地真係唔好意思！」





「你又講呢啲啦喬喬！你真係同我地小軒一樣咁長氣咖喎！張媽媽！」天殷聽完之後喺度揶揄韻喬，搞到韻喬紅住面咁抗議......

「喂呀！我……我先唔要同個花心精一pair呀！」「冇得唔呀！鬼叫你地兩個咁鬼似呀！」天殷咁樣講一講之後，俊軒同韻喬兩個就更加唔好意思。

就喺佢地幾個繼續傾計嘅時候，“咯咯”一聲，係陳姑娘拎住個膠folder敲敲門入嚟「咦，乜今日咁齊人呀你地？」
 
「哈哈，還好啦陳姑娘！」韻喬笑笑口咁講，而陳姑娘都將手上嘅膠folder放到枱面上邊「好啦，請問病人你叫咩名？」「張韻喬！」
 
「韻喬，呢度有你嘅出院藥，有退燒、消炎、止痛、止咳同抗敏感藥，記得記得一定要食哂，而且你都知你自己幾咁大頭蝦咖啦！」韻喬聽完成姑娘咁講一臉無奈，連陳姑娘都知自己嘅衰嘢。





「呢度仲有止痛膏，你隻腳如果唔痛嘅話，就可以唔使再搽，但係痛嘅話就記得按下隻腳啦！」
 
「另外呢張就係你嘅出院紙，上面寫咗你個名、留醫嘅日期同醫生簽名，可以拎返學校當病假紙用。而醫生都已經開定埋聽日嘅假紙，in case你聽日想休息嘅話，唔返學都可以用…」

「不過我地都怕你地幾個出去搵唔到影印機，所以我地都已經幫你copy多咗一份，夾埋喺呢度裏面。其他的話都冇咩問題啦，仲有冇嘢想要問我？」陳姑娘續道，韻喬聽完之後就搖搖頭表示明白。
 
「冇問題嘅話，麻煩都先去繳費處交住院費先，然後返嚟之後就叫我幫你剪病人手帶，咁樣可以正式出院啦。但係記得check清楚出院紙上面自己個名同身份證號碼有冇寫錯」

「知道，唔該哂陳姑娘！」四人異口同聲道。
 
「唔好客氣啦，你地四個一齊經歷咗咁多呀，以後一定一定要永遠咁keep住呢份友誼呀；至於你地三個同學，見到你地每日都抽時間輪流探病，又要教韻喬功課，真係好乖！」

「唔客氣啦姑娘，我地都係想幫到韻喬啫！」俊軒講嘅時候，韻喬塊面又開始紅，但係又畀陳姑娘注意到。

所以陳姑娘又一次拎俊軒同韻喬開玩笑「哈哈，呢個男同學，你真係要加油呀，陳姑娘我……睇好你地兩個咖！」





「呃，陳姑娘，其實我地……」韻喬同俊軒同一時間否認，但係合拍得離奇嘅呢一句否認，就令場面更加尷尬。

「依家雖然唔係啫，不過我覺得…如果男仔肯俾心機嘅話，話唔定他朝一日，會得到韻喬嘅芳心呢！」

「可能啦…」韻喬好想盡快脫離呢個尷尬嘅情況，於是就同俊軒講「小軒，麻煩你陪我落去繳費處交錢啦！」

「好呀小喬！」俊軒答嘅時候，一邊嘅禮謙表情都有少少微妙。
 
「好啦，我都係返出去做嘢先。你地臨走之前，一定一定要記得記得記得check清楚所有地方，make sure已經帶齊哂所有帶嚟醫院嘅嘢走，包括櫃桶裏面嘅嘢，仲有叉電線、銀包之類，如果漏咗喺醫院嘅話，我地係唔會幫你keep，知道未？」
 
「知道啦陳姑娘，而且辛苦你地呢幾日照顧我啦！」韻喬感謝道，然後就同俊軒去交錢，而陳姑娘都暫時出返去，剩低天殷同禮謙兩個喺病房度。

見到韻喬同俊軒嘅背影，天殷突然開口話「佢地兩個…又真係幾襯呀可？」禮謙冇答到天殷，只係繼續喺度看住韻喬啲嘢。





不過，天殷得知禮謙有些少尷尬之後，都唔敢再同禮謙講嘢，只係面紅紅咁喺度發夢等韻喬返嚟。

喺韻喬同俊軒返嚟之後，陳姑娘就幫韻喬剪斷病人手帶，各人都幫忙帶同韻喬嘅細軟離開病房。四個人再分兩部車，由律敦治醫院返去韻喬屋企。

（待續 ~）

IG link https://instagram.com/bear_big_big_writer