【校園】【愛情】A0毒男的愛情史: 【特訓開始】
【日更變咗周更！？爛作者！！啊啊啊啊！！】
是日放學，下午三點搭七，放學鈴聲響起。
我仲諗緊用咩藉口同啊晴講我唔返屋企住，又咁啱好今日有田徑隊嘅訓練，去揾Sherman兄幫補救下。
「嗯？諗緊咩吖，放學喇喎，平時你唔係成支箭咁衝返屋企㗎咩，今日咁靜坐係度嘅。」啊晴喺我隔離問道。
「我今日唔想返屋企住。」我開始揾藉口。
「點解嘅。」
「有少少事。」
「咩事吖，唔講得㗎。」
「都唔係嘅。」
「咁你唔想同我講就唔逼你啦。」啊晴臉部帶有點失落，孭起書包，起身準備走人。
「啊晴唔好走住。」
「做咩吖，仲有事？」明顯係嬲緊。
「坐翻低先。」
「...」佢翹起雙手等我發言。
「今日咪去咗7樓揾Miss報名陸運會嘅。」
「係吖。」
「咁今日咪有田徑隊訓練嘅。」
「哦，你諗住去揾Sherman練跑，直接講咪得囉，收收埋埋做咩啫。」
我聽到之後成個人如釋重負「咁你今日自己返去冇問題？」
「冇，邊到有問題，反正我今日都要去圖書館當值，咁你大概幾點練完。」
「五點幾掛。」
「差唔多喇，我五點都當完值，一係等埋你喇。」
「多謝你。」
「咁我上去先，轉頭見。」
「陣間見。」我心裡面有種窩心嘅感覺，雖然啊晴唔係我女朋友，但係我哋相處好似真係情侶咁，有時真係驚自己抽離唔到，假都當真。
......
「喂，Sherman兄。」我田徑之光說道。
「咁錯蕩呀，搞咩啊。」啊禮說，簡單用翻中文名寫好似爽啲，嘿嘿。
「冇，就嚟陸運會，咪諗住厚住臉皮揾你一齊練下跑，幫補下咁囉。」我說。
「都好嘅，咁你報咗咩項目啊。」啊禮說。
「800米、400米同100欄。」
「咁顛，你呢三年都冇跑過，掂唔掂㗎。」
「都唔可以話冇跑過，我每日照早就嚟遲到返學都日日衝刺600米路程，咁你呢，報咗咩。」
「跳遠，100米同跳高。」
「呼，好彩啫。」唔使同田徑之星競爭，未嘗唔係一件好事。
「你多次，聽唔清楚。」
「冇事，冇事。」
「咁你想練咩先。」
「800米先啦，我對中長跑有自信啲。」畢竟我以前可是每日衝刺六百米嘅男人！！？咁依家，依家唔係！？嘿嘿，依家每日都為咗撞到啊晴而早起身，雖然個目標唔多健康，但從結果而言，改改自己嘅壞習慣都算係件好事。
...............
「呼呼呼呼呼呼.........唔得喇.....呼呼呼呼呼。」頭先跟住啊禮兄圍住學校跑，佢同我講跑個1200米試下先，跟住佢就得，之後發生咩事？開頭仲好地地，大概700米之後，我連佢車尾燈都見唔到，癡線，我以為自己發緊夢，唔同呢啲就係實力差距。
「你....你唔係跑短跑㗎咩.......呼呼哈，點解......呼呼.......長跑都咁勁。」我說。
「哦，我學界要跑3000吖嘛，呢啲濕濕碎啦。」啊禮兄連氣都都冇喘，可見功力之深。
「但係....你報短跑.....嘅。」
「純粹想試下，冇咩特別。」
「休息五分鐘繼續。」
..................
經歷唔同嘅地獄式訓練後，我已經攰到變成一條死尸咁攤係長凳上面，隻腳好似唔係自己咁，拎起手機一睇，時間亦都就嚟到5點搭3，嗯？好似漏咗啲嘢咁。
冇錯，我哋偉大嘅女主角呢，去咗邊，我見到Whatsapp有啊晴send嚟嘅通知。
晴:「就快當完值。」16:50
晴:「圖書館要開會，要遲啲先走到。」16:57
我:「咁你走得未。」17:16
晴:「30分搞掂，你趕時間返去先啦。」17:17
我:「喺地下等埋你喇。」17:17
啊禮兄已經搞掂佢自己嘅比地獄更加地獄嘅訓練，但望佢個樣好似好開心咁。
「點解你會無端端想參加陸運會嘅。」啊禮行過嚟我隔離問道。
「你估下。」
「為咗汪芷晴？」
「點解個個都覺得係咁樣。」
「Sorry，其他原因我暫時諗唔到。」
「啊晴都算係其中一個因素嘅，不過唔係全部。」
「點都好啦，你想再練跑嘅就揾我啦，我返屋企先，係咁。」
「再見。」
...............
等待總是漫長的，等啊等，個時間流動好似停止咗，坐喺長凳食西北風嘅我打算行樓梯上去圖書館揾啊晴，但又好似冇理由行上去，一陣咪又係要行返落嚟，搞到自己好糾結。
上？唔上？心中有兩個答案浮現出嚟。
「入面開緊會，非圖書館人員請勿打擾。」門外掛著告示牌。
冇錯，儘管要行多次落去，我都係選擇上嚟，至於點解，我都唔清楚，純粹想咁做。
冇嘢做嘅我求其揾欄杆唉住望住日落，將腦袋放空，唔知過咗幾耐之後，有人拍我膊頭。
「你做咩上咗嚟嘅。」啊晴說。
「睇日落。」我看著夕陽說。
「走啦，返去喇。」
「好。」
「乜圖書館都要開會㗎咩。」行住樓梯嘅我問。
「係吖，最近bowie姐姐就走，搞到人手分配要全部重新整理過。」
「可惜吖。」曾經我都畀bowie姐姐睇住我留堂，佢仲會送零食嘢飲畀我，喺我心目中佢係一個非常之體貼學生嘅人，聽到佢要離開呢間學校都有少少唔開心。
「咁幾時走吖。」我問。
「陸運會之後，一定要搵佢影相。」啊晴說。
「我都要。」
未完待續...........