[校園][純愛]《身旁的那一個》: 第四十章

好快去到金鐘再轉車，

就去到我哋嘅目的地--海洋公園

雖然我十年前去過，

不過隔咗咁耐我真係冇乜印象

所以我嗰次個心態都係好似從來冇去過咁樣





嵐嵐一落車就已經港女上身

嵐嵐:「影相影相

仲眼望望企喺度，

揸機啦」

我:「我屌你好似叫狗咁樣」





嵐嵐:「東哥唔該晒

咁會唔會好啲」

我:「識講嘢」

嵐嵐:「呢粒掣係影

佢自動會對焦」





跟住我就拎咗佢部相機

同佢影咗幅個人相，

後面就有啲風景咁

我:「你睇下點」

嵐嵐:「喂真心喎幾靚」

我:「你個人靚啫嵐嵐姐」

嵐嵐:「做乜鬼咁好口」

我:「你畀面我我畀面你」





嵐嵐:「勁多男仔第一次影相影到成碌葛咁樣

估唔到你咁勁

得啦今日有排你影」

我:「仆街啦你」

嵐嵐:「唔keep住訓練你遲啲點同愷晴影靚相

佢先係主角呀」

我:「你又知佢鍾意影」





嵐嵐:「所以話你真係要帶個腦出街

我同佢識咗幾耐呀」

我:「咁又係喎

定係你想水我搵個藉口幫你影咋」

嵐嵐:「人與人之間要多啲信任呀知唔知呀」

我:「仆街好撚伏」

嵐嵐:「行啦伏」

之後我哋就入場，





入到去就周圍行下，

跟住搭纜車過去機動遊戲嗰邊

佢條友仔真係好記性

即刻捉我去玩海盜船

嵐嵐:「海盜船唔係好多人咋喎

玩咗先」

我:「警告你唔好坐最後呀





我真係好撚驚」

嵐嵐:「廢」

我:「真係唔好呀」

嵐嵐:「得啦」

我哋好快就玩得，

算佢條仆街有啲人性

揀中間位嚟坐，

我:「總算你似返個人」

嵐嵐:「不嬲都係人

唔似你有事相求就好聲好氣，

冇事嗰陣你死你事」

我:「傻傻哋幾時對你咁」

嵐嵐:「成日」

我:「食屎啦

喂開始喇開始喇」

嵐嵐:「係呀.」

我:「比隻手我捉住先

好撚驚」

跟住我就捉住佢隻手，

講明先我唔係抽水

純粹真係好驚

正如我細個玩嗰陣都會捉住我老母隻手

我預咗你哋話我廢㗎喇

再加上我同佢咁熟，

所以玩緊嗰陣就捉住佢，

大個先明有啲嘢真係唔好亂做

以前細個冇經驗，

好容易就做咗出嚟，

冇衡量過其他因素，

想做就做，

結果令到其他人受傷都唔知

我知道冇經驗唔係藉口，

不過都於事無補，

緬懷多一次，

只會再憎恨以前嘅自己多一次.


好彩海盜船都唔係玩好耐

落到嚟頭幾下真係要定一定神

當然啦呢個時候隻手已經放開咗

嵐嵐:「你有冇虧到咁呀」

我:「好撚驚好撚驚」

嵐嵐:「嚇死人呀無啦啦捉住人隻手」

我:「唔好意思

當咗你係老母

以前細個我都係咁樣捉住佢」

嵐嵐:「如果係第二個我一定以為佢係乘機抽水」

我:「係第二個我就唔捉啦

同你熟先咁啫」

嵐嵐:「雖然我冇嘢呀不過真係太大力

咁樣拖女仔真係唔得

除非個女仔好鍾意你啦」

我:「我幾時會拖女仔痴線」

嵐嵐:「一次生兩次熟

同愷晴出嚟行得多就會㗎喇」

我:「唔好當咗我係抽水佬個個都會拖」

嵐嵐:「係啦最君子係你呀

影相先」

今次就佢揸機我同佢自拍

話說我記得我哋呢日影咗好多相，

超過100張

可能你哋覺得唔多，

不過對於我嚟講，

呢次係我做人做咗廿幾年入面，

影得最多相嘅一次

後來拍拖，去旅行， 畢業典禮，

我都唔會影到過百張相

今次啲相我有save低兼且backup埋

擺晒落去電腦嗰度，

張張佢都笑到烚熟狗頭咁樣

算啦唔好講到咁衰佢始終係一個靚女

每張相都笑逐顏開先至啱

後來經歷咗好多嘢，

多到我要係咁提住自己，

先至記得來龍去脈

我唔係好假嘅肥仔，

喺度講咩大道理，

純粹覺得做咗咁多年人，

好難每個階段都一帆風順

生活嘅片段有喜有悲係好正常嘅事，

過程入面唔會有好多人會陪住你左右

以前我覺得會㗎，

不論任何性別任何關係都好，

總會有啲人你覺得佢哋一直會喺你隔離

呢啲人未必幫到你又或者啟發到你，

去到最後，

佢哋亦都唔係好似你想像中咁樣

但你一諗返嗰個階段嘅時候，

呢啲人好自然就會喺你腦海入面湧返上嚟，

就好似我依家打出嚟回想返中學生涯嘅時候

原來一直陪伴我嗰個人，

就係相入面喜上眉梢嗰個，

唔會係第二位.