《求婚嗰日，我發現我女朋友鍾意食屎》: 十

「就係呢度？」敏敏有啲擔心咁望一望眼前嘅呢座唐樓。
「就係呢度。」我好肯定咁望住Google Map。
無錯，今日，我同敏敏一齊去到深水埗，準備拜訪傳說中嘅「七仙羽師父」，睇下到底敏敏係咪真係「中蠱」同埋有冇得解開呢個「食屎蠱」。
 
我哋按照網頁指示，由地面行咗上四樓。
一出四樓，周圍都係烏燈黑火，地下滿佈水跡同垃圾，環境相當之惡劣。
「估唔到七仙羽咁出名，但係個Office都咁寒酸喎？」敏敏雖然會食屎，但正常情況下都同一般女仔一樣，對污糟嘅環境比較抗拒。
「或者可能佢專登想考驗一下嚟嘅人嘅恆心同誠意啫。」講到誠意，我今日唔單止帶咗一個果籃嚟，我仲專登睇哂七師父嘅電視節目《七救星》，務求用誠意打動師父出手。
但係無辦法，為咗破解呢個食屎魔咒，我同敏敏都唯有見步行步，皺住眉頭咁搵下到底七師父屬於邊間屋。
 




終於，我哋跨過無數垃圾，再避開幾隻老鼠同水渠嘅滴水之後，我哋行到一道門嘅前面。
呢道門上面貼咗：「前途吉凶隨便問，降魔伏妖我最勁。」
「睇嚟就係呢間喇。」我充滿希望咁點一點頭。
「但係點解句對聯唔押韻嘅？」敏敏好奇咁問。
「你真係唔熟七仙羽師父喇！佢講嘢係有少少鄉音嘅，所以呢句嘢你只要將『勁』讀做『近』，咁就啱音㗎啦！」我一邊解釋，一邊㩒咗落個門鐘度。
 
果然，馬上有一把有鄉音嘅聲音從室內傳出。
「對『文牡』鎖，貴客『錢轉』（翻譯：對門無鎖，貴客請進）！」
「嗱！真係七師父把聲啊，入去喇！」我咁興奮，係因為我終於見到七師父真人，其實我好鍾意師父啲無厘頭笑話㗎！
 




門一打開，只見有一個身穿全身白衣，頭上紮咗一個高髻嘅女人企咗喺度。
佢一臉莊嚴，臉上並無半分笑容，但又有一份慈祥嘅感覺，確實幾似一位得道高人。
但係重點係，佢個樣並唔係電視入面見到嘅「七仙羽師父」，反而有幾分似譚玉英姐姐。
「你好啊，我哋係嚟見七仙羽師父㗎，請問你係咪可以帶我哋去見佢啊？」我相信眼前呢一個應該就係七仙羽啲助手，所以我態度非常誠懇咁問。
「禾召嗨切仙羽師父。（翻譯：我就係七仙羽師父）」我眼前呢個高髻女人咁樣講。
 
（為方便作文字記錄，往後所有與師父對話都會經過系統自動翻譯）
 
「咩啊？你唔好呃我無睇電視喎！七仙羽明明係呢個樣㗎喎！你而家係咪欺騙消費者先？」我拎出手機，Show咗張「師父愛你」圖俾高髻女人睇。
「施主，似乎係你孽障太深，導致你眼目不清。」高髻女人搖一搖頭。




「我唔明。」我搖頭。
「我嘅網頁已經寫到明，我係『七仙羽師父』，所以你要搵嘅七仙羽只係我徒弟。而我，就係佢嘅師父，八仙果。」呢個自稱八仙果嘅女人一講完呢句，身後突然冒出兩陣煙霧，似乎真係有啲料到。
只不過，當我一聽到佢竟然唔係七仙羽本人，仲要用埋啲旁門左道方法引人上嚟，我內心對佢嘅信任都打咗折扣。
 
正當我想再出口問佢幾句嘅時候，佢突然將目光轉咗去敏敏身上。
「妹妹，你黑氣蓋頂，身上隱隱散發出一陣腐臭味，似乎問題唔簡單喎。」八仙果師父一邊講，一邊上下打量敏敏。
我同敏敏互望一眼，雖然我哋都聞唔出佢所講嘅臭味，但係我哋各自內心都有啲驚訝佢可以一眼睇穿今次嚟求助嘅人係敏敏。