《求婚嗰日，我發現我女朋友鍾意食屎》: 二十四

「想當年，我仲係一個廿歲多啲嘅黃毛小子，初入社會無耐，年紀就同你哋差唔多大，廿七八左右。嗰時，我已經同阿芳（伯母）拍咗幾年拖，感情或多或少都有啲淡咗，但係又覺得對方係一個適合自己嘅人，所以一直以嚟都保持住呢段關係。
 
嗰陣時我後生係出身貪窮，唔似得阿芳咁係屋企嘅太子女。為咗賺多啲錢、快啲升職，我唯有時不時就跟老闆出去應酬見客。而我一直都當呢啲只翻工嘅例行公事，所以從來都無咩心情認真去玩。點知，有一晚，我又跟住老闆去夜總會玩，就喺嗰個地方，我遇到一個女仔。
 
呢個女仔係跟住成班小姐一齊入嚟嘅，衣著同其他小姐亦都一樣咁暴露，但係，佢個樣偏偏無其他小姐嗰種風塵味，反而係有一種含羞答答嘅感覺。雖然佢個樣唔算最出眾，但係就因為佢身上有呢份惹人保護嘅感覺，所以我就揮手叫咗佢埋嚟坐我身邊。
 
呢個女仔叫做向彩萍。傾下計，我先發現原來佢今晚係第一次嚟開工。佢年紀啱啱廿歲，祖籍雲南，為咗幫屋企賺錢，所以先離鄉別井，嚟到香港做陪酒小姐。由於夜總會同工作好近，我老闆不時都會帶埋成班同事去，而我習慣每一次去，都會叫彩萍陪我。久而久之，唔知係咪因為知道咗佢身世之後覺得佢特別可憐，亦唔想佢咁慘要陪啲肚滿腸肥嘅衰客，所以我偶爾都會呃住阿芳話我要開工見客，然後自己一個落夜總會叫彩萍嚟陪我。
 
隨住我去夜總會嘅次數愈來愈多，我同彩萍嘅關係由本身嘅顧客同陪酒小姐，慢慢變得愈來愈不簡單。我開始會同佢分享自己嘅生活同工作，而佢亦都會講下翻工遇到嘅衰客，又或者講下家鄉嘅風土人情。呢種超越顧客同陪酒小姐嘅關係，慢慢開始就變得曖昧，彩萍會周不時挨埋我度，而我亦開始大膽咁同佢講下啲『好掛住你』嘅嘢。呢種曖昧關係直到有一晚，彩萍主動錫咗我一啖，而我竟然一啲都唔抗拒，反而仲將佢攬咗埋身。嗰一晚，我哋都俾對方嘅反應搞到興恰恰，所以我已經拋開一切理性要同彩萍去開房。就喺我準備埋單離開夜總會嘅時候，我打開銀包，然後就見到我同阿芳嘅合照。
 




呢一刻我好似俾盤凍水照頭淋一樣，我當晚用個理由推塘咗，然後急急離開。經過呢一次之後，我徹底意識到，如果再咁落去，事情將會變得愈來愈複雜，而我亦更加難從彩萍嗰度抽身。於是我開始認真反思，其實，我之所以會搵彩萍，並唔係因為我想幫佢，而係我需要佢幫我。喺正常日子入面，其實我對住阿芳我都好有壓力。因為阿芳爸爸成日都睇我唔起，覺得我只不過一個小小文員，無咩出色。所以，我成日一見到阿芳，即使我真心愛佢，但我亦會諗起自己要出人頭地，無形之中，對住佢就好自然會俾咗一種壓力我。而彩萍，同佢相處可以話係毫無壓力，而且佢初到香港咩都唔識，變相喺佢面前，我就可以做翻一個咩都知嘅大男人。
 
諗到呢度，我真係唔知點做好。到底我應該任由而家呢種同彩萍嘅關係繼續落去吖？定係小心為上，一刀兩斷同彩萍保持距離呢？當時仲係血氣方剛嘅我，最後選擇咗最不負責任嘅做法，逃避問題。我任由自己遊走喺兩個女人之中，一邊扮演積極向上嘅有為青年，另一邊就扮演對社會瞭如指掌嘅成功男士。受到兩個女人鍾意，當時的確我有暗爽過嘅，而對於彩萍嚟講，其實佢係知道我有女朋友嘅，只不過佢又毫不介意咁做呢個第三者嘅角色。對我嚟講，呢個三方都得到滿足嘅狀態，當然係最好嘅安排啦。
 
但係，呢個咁美好嘅平衡，終於俾一場意外破壞咗。
 
某一晚，我跟老闆又去咗彩萍間夜總會。嗰晚我哋遇到嘅客，算係一個西客之中嘅西客。佢雖然好有錢，講嘢大聲夾惡，又多多要求。當然，我老闆唔敢同錢作對，只可以勉強咩都話好，而我心知肚明，如果老闆接咗呢個job，最後出事嘅都只會係我哋班下屬。所以我當時忍唔住，就用一個禮貌嘅方法好間接表達俾個客聽佢呢個做法唔太可行。
 
點知我一講完，呢個西客即刻大發脾氣，話唔再同我哋做生意。我老闆即刻要我道歉啦，但係我講完道歉之後，呢個西客竟然一下攞個啤酒樽爆我樽，然後話只要我俾佢爆三個樽，佢就接受我道歉。正當我唔知點回應嘅時候，一直在場嘅彩萍走咗去我身邊，一邊俾毛巾我止血，一邊扶我坐低。個西客見到有女主動關心我，佢當然更燥啦，然後就諗住再出手用啤酒樽攻擊我同彩萍。
 




就喺呢一刻，我人生之中見過最不可思議，亦都係最恐怖嘅畫面出現咗。