《求婚嗰日，我發現我女朋友鍾意食屎》: 五十

即使我同敏敏唔知咩事，但係都俾八仙果師父呢一聲嗌到好似臨盤生仔嘅叫聲嚇到踎低咗。
同一時間，我感覺到一陣熱氣喺我頭頂擦過。
然後，我聽到背後傳嚟「渣」一聲，我回身一望，竟然見到身後幅牆有一陣蒸氣同水跡。
我擰翻轉頭望向前面，原本一直背對我哋嘅向彩萍原來已經目露凶光咁睥實我哋，而且佢手上面仲拎住咗一隻湯匙。
睇到呢到我就明白，頭先應該係向彩萍反手用湯匙向我哋灑出一羹熱湯。
如果唔係八仙果師父反應快，恐怕我同敏敏已經成塊面都燒傷咗。
而我都無諗過向彩萍嘢都未講一句就已經猛下毒手，佢嘅舉手令我更加相信八仙果師父所講，向彩萍一定係一個心狠手辣嘅人。
 
「你哋係香港人？做咩嚟呢度？」
眼前嘅向彩萍雖然一臉凶狠，但係容貌確實好似世伯所形容一樣，鼻細嘴細，眼角亦有一粒痣。




以一個接近四十歲嘅女人嚟講，佢五官同身形都算標緻，可以話係風韻猶存。亦難怪當年嘅世伯會一度為佢傾心。
「我係丘志傑個女，我叫做丘思敏。」呢個時候，敏敏踏前咗一步，反客為主咁問咗呢個問題。
「丘志傑？」聽到呢個名，向彩萍凶狠嘅臉色上面竟然閃過一剎那嘅錯愕。
但係，錯愕之後，向彩萍嘅臉色就變得更加陰沉：「趁我未想殺人，你好快啲走。」
「當年你留信要我爸爸嚟雲南搵你，今日你就當我代父從軍，你有啲咩想講都可以同我講。」敏敏好誠懇咁又向向彩萍走近一步。
睇敏敏嘅舉止，似乎真係好似佢喺飛機上所講一樣，希望可以爭取同向彩萍對話。
 
「亂講！咩留信要嗰個賤男人嚟？無啲咁嘅事。既然叫你走你唔走，咁唯有我出手趕你走。」向彩萍眼入面一道兇光閃現，同時喺衫袋度抽出一樣嘢。
係一支紅色短笛。
今次唔洗八仙果師父講，我同敏敏都知呢支就係世伯講過，向彩萍用嚟召喚毒蟲嘅笛，所以我哋兩個即刻後退幾步。




果然，向彩萍一吹響短笛，屋企即刻有十幾隻蜈蚣從天而降。
「蟲不喜歡孤單一個！」八仙果師父極速結一個手印，十幾粒八仙果同時從手中彈出，一下子就將全部蜈蚣殺死。
 
「茅山道術？」向彩萍果然都係呢啲怪力亂神嘢嘅專家，一眼就睇出咗八仙果師父嘅師承。
「正所謂，『善惡到頭終有報，報完自己報老母。』今日，我八仙果就係注定嚟將你呢個行蠱毒禁術嘅人繩之於法。」八仙果師父好似唔記得咗自己今朝早仲係重傷初癒，呢個時候已經拎出自己專用嘅塵拂，準備好要同向彩萍正面交鋒。
 
「哼，你所謂嘅邪術，喺我地頭就係仙術；你嘅道術，先係呢道嘅邪術！」向彩萍除咗紅色短笛之外，亦都慢慢拎出咗一個七色搖鈴，睇嚟又係一啲雲南邪術嘅道具。
「大家咁話！」八仙果師父一啲都唔執輸，拎出咗五色八仙果圍喺腰間，就好似一個準備打越野戰嘅士兵一樣。
「今日就係你嘅死期。」向彩萍執起咗地下一條蜈蚣，慢慢吸啜住蜈蚣嘅血。
「大家咁話！」八仙果師父亦都拎出四粒八仙果，面目猙獰咁嚼。




「我要你死無全屍！」向彩萍向八仙果師父大喝一句。
「大家咁話！」八仙果師父完全將「試當真」嘅教學發揮咗出嚟，睇嚟就算今次有珈其喺度都唔可以鬧佢「無活用到」。
 
而向彩萍都感受到同八仙果師父鬧交係一件幾無癮嘅事，所以索性二話不說，一個轉身就走出廚房嘅後門。
而八仙果師父唔打算放過佢，自然馬上追咗出去，而我同敏敏當然亦都緊隨其後啦。
我哋一離開廚房，就見到向彩萍一邊向前直跑，一邊吹響紅色短笛。
所以沿路上，即刻冒出咗數之不盡嘅蛇蟲鼠蟻。
「蟲來沒有，蟲來都沒有！」八仙果師父一邊念住口訣，一邊從手入面捏碎咗一粒八仙果，然後就直接喺半空之中灑出。
一陣八仙果煙飄過，地下嘅毒蟲紛紛退開，令到道路再次打開，俾我哋三個追上向彩萍。
 
「到底向彩萍要跑去邊呢？」敏敏少做運動，呢個時候已經有啲上氣唔接下氣。
「雲南入面，蠱術雖然算係多人認識，但係其實亦都算係民間禁術嘅一種。所以，識得蠱術，並唔係一件光彩嘅事。所以我估向彩萍係專登想遠離屋企先對我哋施展蠱術，以免佢老公發現佢係一個養蠱人。」八仙果師父一邊驅散路上嘅毒蟲，一邊回答敏敏。
「無錯，你講啱哂，所以嚟到呢度，我哋就可以放心開戰喇。」唔知幾時向彩萍已經停低咗腳步，企定定咁望住我。
不知不覺間，原來我哋已經跟住向彩萍跑到嚟一個空曠嘅草原上面。





「我已經準備好用我最高級嘅道術『蟲歌行』同『閃電八連鞭』嚟會一會你，放馬過嚟啦。茅山道術，八仙果。」八仙果師父擺出咗一個幾有型嘅姿勢，雖然一睇就知道佢係抄葉問嘅。
「雲南蠱術，向彩萍。」估唔到向彩萍又會跟八仙果師父一樣報上名來，可能呢個真係中國比試嘅傳統嚟。
但話口未完，佢兩個已經同時出招。


= = =
作者IG：Ｗindblowssilently
如果想加速追故，連登講故台及Penana正領先連載中!