因為EX 我成為左一個禿頭嘅毒撚 然後遇到一隻猫: 66. 不知道的事
阿敏考慮左一段時間後就下左決定，亦有左我岩岩回憶大家討論結婚果一幕。只係之後我又見到，原來之後咁耐以黎阿敏一直都有偷偷陪我媽咪去醫院覆診，又不斷上網搵唔同嘅名醫希望有d可以幫到我阿媽醫病。結果皇天不負有心人，最後竟然真係比佢搵到個隱世嘅中醫，話可以配合氣功去醫癌症。而佢帶左我阿媽去睇後。雖然未至於痊癒，但至少就真係控制到個病情無惡化，癌指數仲慢慢下跌添，連醫生都話係奇蹟。所以我阿媽先仲一直可以健在亦令我完全察覺唔到佢有任何異常。
「原來阿敏背後為我做左咁多野係我唔知…」衣個時間我都開始眼濕濕，面對一個一直默默為你付出嘅人，你又點可能唔感動?
而除左咁，我發覺阿敏原來趁衣d時間都偷偷地問左我阿媽唔少關於我嘅野，例如我d日常喜惡，鍾意食咩唔鍾意食咩，細個嘅趣事等等。而係我地結婚後，原來佢仲有私下搵過我僅餘幾個中學同學，去想了解我嘅過去同嗜好多d，不過就叫佢地保密。
突然間，我諗返起唔怪得阿敏煮親嘅餸，好似從來無我唔鍾意食嘅元素，例如西芹、青豆甚至係比較特別嘅蝦、荔枝、菠蘿等等… 而每次有NBA直播果陣，佢都會專登返入房留返廳果部電視比我…
仲有一次
「阿祖，我見你有睇開籃球，近排我係Netflix見有套紀錄片係講一個籃球名星，仲話佢直程改變左成個Toronto衣個城市，反正我未去過加拿大，不如一齊睇下?」
本身我無點睇Netflix所以並唔知佢上左衣段紀錄片，但一聽阿敏講我就知衣套片個主角一定係Carter，於是就即刻同佢一齊睇左衣套紀錄片。套片確實係講左Carter點令其他人開始留意Toronto衣個城市同Raptors 衣隊當時仲係加入左NBA唔係好耐嘅球隊，係影片入面見到整個城市嘅氣氛都真係因為Carter而唔同左，亦勾起返唔少以前睇佢打波嘅回憶。
當時其實我真係以為係咁岩得咁橋，但衣家我知道係因為阿敏喺我d friend口中知道左我鍾意d咩所以特別留意關於佢嘅野。
除此之外，佢仲係阿偉佢地口中知道左有d地方係我好抗拒經過，因為衣d地方每次經過我都會好自然諗起Grace，例如我以前屋企樓下同Grace第一次約會個籃球場。當我接受左Grace以後都唔會返黎我身邊後，每次返屋企其實我都會刻意避開個球場繞路行返去。直至係第一次帶阿敏返屋企見我媽咪果陣，因為諗唔到咩原因要繞路，所以就逼住同佢一齊再經過果個籃球場返去。但喺我地結左婚搬左出去住後當我地第一次返我媽屋企食飯果陣，佢突然提議
「祖，個籃球場咁嘈咁多人，d波又成日飛黎飛去，其實有無路係唔駛經過佢? 」
「有呀，不過要兜一大個圈喎… 」我心諗左句”難得你咁講”，但個口就咁答。
「唔緊要呀~我都想行多幾步當減肥呀~」敏笑住口話。
自此，我地每次返我媽咪屋企，我地都無再行經球場果條路而係繞路而行。一直我又係無多諗，但衣家我又明白衣d全部都係阿敏對我嘅體貼同溫柔。
「原來阿敏背後為我花左咁多功夫去了解我，遷就我… 但我又為佢做過d咩? 我之前仲要嫌佢肥竟然想出軌….」 天上嘅我既心痛又內疚咁講。
然後好快又出現左一幕。
「做咩今日好似有d悶悶不樂咁呀?」有次我同阿敏食飯嘅時候見佢好似唔太開心咁所以問。
「無呀，岩岩睇完套台劇有d抽離唔到啫…」阿敏勉強笑左一笑後合。
「咁投入? 套劇講咩架?」我問。
「嗯… 劇情其實有d複雜，簡單講就係女主角因為男主角死左一直傷心自責，以後喺兩年後一次機會意外穿越左返去十幾年之前，但穿越左返去嘅佢並唔係十幾年前嘅自己，而係另一個同自己一摸一樣樣嘅女仔身上，同一時間係果個時空，佢遇到另一個同男主角又係一樣樣但係係另一個人嘅男仔，然後佢發現喺自己現實世界一直同自己一齊果個男仔，原來就係衣個男仔穿越左去未來…」
「好似好複雜咁喎… 所以係一個穿越愛情故?」我又問。
敏:「你可以咁講，但又遠遠唔只係咁…」
「你鍾意睇穿越故?」我其實對劇情興趣唔係真係咁大，所以轉移問。
「唔係呀，d穿越故黎黎去去都係主角後悔，然後就返去fix返d野，不論得唔得都好，感覺都有d千篇一律… 其實比起返返過去改變未來，我比較buy平行時空或者Marvel多元宇宙嘅概念。」敏答道。
「哦~ 點解?」敏今次嘅答案反而令我有少少興趣。
「雖然人一世總會遇到好多後悔嘅事，但如果可以返返過去改變有second chance，咁世界就無左果種獨特性，好多野好似都唔矜貴無意思咁… 而且返返過去，又係咪真係可以改變到過去? 我好懷疑…
再講回到過去其實我覺得從物理角度上係無咩可能，反而多元世界或者平行時空，係因為一d根本性嘅因素改變而引生有一d唔同嘅世界，我覺得有嘅機會反而比較大，始終其實我地唔難想像衣個空間外係可以有另一個空間或者世界同時運行緊…」敏一口氣解釋。
「都係嘅… 不過當你真係好後悔果陣，你難免都係會想有second chance去改變過去… 至於回到過去同平行宇宙嘅可能性，我覺得除非可以自己親身經歷啦，唔係就算佢真係存在其實對我地黎講都無意思嘅。」當時我無細想衣個問題，但衣家我只可以話對阿敏嘅前瞻性同分析由衷嘅佩服，亦更加無諗過最後自己真係有咁嘅機會去穿梳於唔同嘅平行時空。
「我其實成日都自己講，如果日日執著於自己失去左d咩，做人會好辛苦… 所以既然已經發生左，就唔好再成日諗以前喇…」敏答道。
「哈，咁我都明，不過講就易，做就難…」我有d不為所意咁講。
「但至少你應該要盡力去have a try… 如果你成日諗住唔得所以唔去做，咁就真係永遠都唔會得… 有時其實所謂嘅”做唔到”，”唔得”衣d原因，只係你用慣左黎合理化你自己唔努力去嘗試同放低過去嘅藉口。」阿敏嘅語氣有少少大聲左。
「嗯…」正如阿敏所講，慣性思維令我果刻並無點將佢嘅說話聽入耳，因為已經聽過太到次，潛意式亦令我深信自己係無可能改變走返出黎，但衣家我知阿敏當時應該係乘機想話醒我等我振作。
「不過頭先講開，你有無諗過衣個世界真係有平行時空，可能只係因為你某日一個唔同嘅微細決定，然後你個人生就會完全唔同左?」可能察覺自己語氣有d唔同左，阿敏平伏左一下後又轉移左話題。
我:「咁又無喎…」
敏:「其實只要你咁幻想諗下，你就會明白人生每一個決定其實都好重要，然後唔會再hea過生活…」
「咁點解你之前又選擇做過宅女?」我笑住問返佢。
「我選擇做宅女係因為我真係想過咁嘅生活而唔係hea囉~」阿敏笑住咁答返。
「但咁識唔到男仔喎?」我又問。
「So? 其實我完全唔介意，係我阿媽介意咋嘛… 」敏又答。
我:「所以你本身係唔想有另一半?」
敏:「又唔係嘅，緣份出現我唔會抗拒，但無我亦真係無所謂，唔會強求。」
我:「咁我地係咪算有緣呀?」
「其實呢，第一眼見你果陣我就有種感覺。」阿敏望左我一陣後答。
「咩感覺?」我好奇問。
「當時我覺得你身上有一種同自己一樣嘅氣場，我地應該係有d common嘅地方…」阿敏答。
「咁神奇? 可能都係一樣咁宅咁毒呀~」我笑住講。
「唔係衣d呀… 不過算啦，講返果套劇先，我覺得佢好睇，係因為佢真係唔係一般嘅穿越劇，而且入面d元素寫得好細膩，睇完真係好感動…」阿敏無繼續講落去，不過果刻嘅佢應該已經知道係因為我地一樣有段悲痛嘅過去，然後改變左一生。
「係咪真係咁好睇呀? 聽你咁講我都有少少興趣添~」比佢咁講完，果刻我對佢講套劇係有少少興趣。
「我唔介意同你一齊睇多次架~」阿敏笑住講。
「好呀，搵日呀~」
之後我雖然知道左個劇名，但慢慢就擱置無左衣件事啦。時至今日，其實我好似都無同阿敏一齊煲過一套劇甚至係一套戲，除左Carter段片…
至此，下面嘅世界好快就無再運行，因為已經同我衣刻嘅時軸重疊。
「好啦，衣個世界嘅片段我地都睇晒喇，好好整理下你係衣幾個世界見到同領悟左嘅野啦。」貓仙人目無表情咁講。
聽完佢咁講，衣個時候我都不禁閉上眼諗返之前經歷過嘅一切…