宇宙傳送門: 2.2

現時朝頭早十一點五十分，鑑於李浩朗父母突然嘅失蹤，我哋四個分成兩組，我同李海嵐、李浩朗同少女日星，分開係附近進行尋人行動。

我同家姐向住同一個方向出發「有冇話咩地方佢哋可能會去？」

「冇乜特別地方，平時佢哋唔多鍾意出門口。」

「但好似熱咗好多咁。」我抺一抺額頭啲汗。

呢種温度冇可能會係二月出現，連家姐都除咗最出面嗰件外套。





「或者去街市嗰邊睇下先，係我媽去得最多嘅地方。」

我哋行係街上面，大霧令到本來應該係日光日白嘅時間，變到灰濛濛咁。對面街嘅行人都唔係好望得清個樣。

家姐今日都冇乜點打扮，又係all back紮起頭髮，着住灰色嘅hoodie，黑色嘅運動長褲。

一路上，我暗中咁觀察住家姐嘅面色，就咁睇好似冇表情咁，但仔細一睇，其實佢有稍稍咁皺住眉頭。

始終係自己老豆老母，雖則程度上唔算同我一樣，但我都明白嗰種失去嘅感覺。





我連一句冇事嘅，呢啲冇根據嘅安慰說話，都講唔出口，因為以而家嘅時勢嚟講，極光人唔係冇可能。

「前面咩事？」家姐鬆開咗佢眉頭，手指前面。

我跟住一齊望過去，前面係一堆要起飛嘅麻雀仔。

神奇嘅係呢堆麻雀係停咗係半空，一啲係就嚟起飛嘅姿勢，一啲係已經飛起咗，就好似一張相咁。

我哋行前兩步去睇，原來佢哋唔係完全定咗格，係以一個超級慢嘅速度郁緊。





再望耐啲，可以見到佢哋超緩慢咁拍緊翼。呢堆麻雀嘅速度同周圍嘅事物產生咗強烈嘅違和感。

我一時忍唔住好奇心，伸手想掂下其中一隻，但係家姐捉住咗我「唔好。」

家姐並冇解釋到點解，但冇乜學識嘅我估係我哋處於唔同嘅速度，如果麻雀俾我掂到唔知會點，定係家姐純粹唔想我掂。

「呢啲又係你哋話嘅強制傳送？」

「應該係。」能夠出現如此奇景嘅，好大可能就係強制傳送，但究竟係傳送咗啲咩？點解咁都可以留到係半空，唔跌落嚟？

不過比起上次醫院啲紅瘡泡泡，今次只係神奇得意，反正威脅唔到我哋嘅生命危險。

走嘅時候，見到隔離有個阿嬸攞住咗電話，對住個奇景影咗好耐，郁都冇郁過，唔會連佢都變慢咗呱？到最後佢都好似冇眨過眼。

離開慢速麻雀呢個奇觀，我哋繼續上路，家姐話到街市嘅距離應該冇咁遠，可能因為大霧嘅影響，都行咗一段時間先到。





去到街市入口，我哋兩個都已經除剩一件T-shirt，愈郁個人就愈熱，帶出嚟嘅水都飲咗一大半。

感覺上呢場大霧似係蒸氣多啲，成個戶外變咗個大型桑拿場咁。如果係咁會唔會之後有大雨？

入到街市裏面，反而仲涼過出面，冇咁大霧。

行過啲檔口，有一半都冇開門，連帶客人都少咗。

成個街市有兩層，我哋由第一層開始，係第二層嘅末端結束。中間攞住張相去問啲有開門嘅檔口，完全冇消息。

零收穫嘅我哋，出返嚟呢個大型桑拿場，家姐揾咗張櫈坐低。

我係後面望住家姐嘅背影，呢個背影散發出失望嘅感情。





我行前想坐係家姐隔離。

「啊～～啊～～」係家姐面前跑出嚟一個人，一個全身發出極光嘅人。

極光人兩手伸出，向我哋行過嚟。佢成身光到都見唔到佢嘅表情，只係見到一個人嘅輪廓。

大約十秒之後，呢個人隨住極光一齊消失咗係我哋面前，面前剩低一片迷霧。

我自己都叫做有經驗，家姐就應該第一次親眼現場睇到極光人。

我行前睇下家姐，果然佢係呆咗係度。偏偏，極光人要係呢個時候出現係家姐面前，令到家姐更加嘅擔心自己父母。

我坐低係家姐隔離，將保温袋放係一邊，抱圈圈出嚟，費事熱死佢。

我放圈圈係自己大脾，諗緊我嘅開場白，應該講啲咩好。





但係圈圈好似已經等唔切，離開我嘅大脾，跌咗係櫈面，之後又堅強咁自己企返好，嘗試爬上家姐嘅大脾。

家姐一時俾圈圈嚇咗一下「咩事？邊度嚟隻鴨？」

「佢係圈圈，大個咗嘅圈圈。」

圈圈成功爬上家姐嘅大脾，好有靈性咁碌大對眼望住家姐，又伸長個頭係家姐個肚不停咁轉，好似係度嗲緊家姐咁。

就連家姐都抵抗唔到圈圈嘅可愛，伸手去摸佢。

「睇嚟佢真係識閱讀人嘅心情。」我望住圈圈講。