宇宙傳送門: 2.7

現時晏就三點十九分，我同家姐係幾個劫難當中冇事走甩。不過，不單止我嘅隨身物品，係所有身上嘅嘢都消失晒，又再全祼狀態。

我將家姐件外套綁咗係條腰度，優先遮住我碌嘢先。

但係，冇鞋着嚟跑步真係搞到一對腳板底都係血。其實都唔只係腳板底，頭先裸體咁同眼鏡佬搏鬥，全身都係傷痕纍纍。

新嘅傷痕加上舊嘅傷痕，基本上成就咗一幅畫出嚟。

家姐話揾啲水洗住先，但而家得返一枝水，就攞嚟飲好啲「如果再揾到有水先啦，都習慣㗎啦。」





原本我個背囊都有啲急救嘢係度，但估唔到咁快冇咗，家姐就只係得膠布，應該用晒成盒都貼唔晒。

我求其係一邊揾咗啲膠袋，用嚟包住對腳，頂住當先。

「所以之前都試過咁樣？」家姐大概知道咗我極光嘅事。

「係。雖然頭先救咗我一命，但都幾麻煩下，加上我又控制唔到。」原本以為係一個自殺能力，但原來仲可以有咁嘅作用。如果可以控制得到嘅話，會唔會係一個好有用嘅能力？

我同家姐邊講邊行，街市又返唔到，方向都迷失埋。





其實而家我哋都唔知要去邊，主要係揾返件衫俾我着，順便睇下有冇水同食物，而家剩低嘅就只有家姐嘅一個背囊。

仲有，過多一陣就要入夜，我哋都要揾返個瞓覺嘅地方，一個安全嘅地方。我哋係條街度遊蕩，都要非常小心謹慎，因為而家可以話係危機四伏。

我同家姐講緊嘢嘅時候，我再次留意到家姐擔心嘅心情，但今次應該唔係佢父母。「擔心李浩朗嘅話，可以俾啲自信佢嘅。」

「嗯？」

「雖然佢又唔打得，又唔係特別醒，只係得把口….」





「哼…」終於見到家姐笑返少少「細個我哋一齊玩，我仆街整親嘅話，佢就死都要話孭我返屋企。明明又唔夠我高，又冇力，孭到我對腳拖晒地。」

「係，每次都係愈幫愈忙。」我諗返起我同李浩朗啱啱認識嘅時候，係中四嗰年，我俾人打，佢話幫拖，最後當然係俾人打多兩錢重。

「喔？」家姐突然一手大力咁拍落我赤裸又有傷口嘅膊頭度，但視線係向上望。

「啊！家姐。」痛到我震甩咗身上唯一一件外套。

「你睇咗先啦。」家姐繼續不停拍打我。

「停停停。」我先綁返好件外套再望上去。

上空都係一大片迷霧，但可以見到家姐指住嘅嘢，有幾個人形黑影係空中。

總共有六個黑影，黑影嘅形狀好明顯有手有腳，又有頭。





「人嚟喎….」呢六個人唔似係飛緊，因為佢哋似係氣球咁係空中漂浮，速度較為緩慢，而且佢哋嘅手腳係上下左右咁揈緊。

因為大霧，我哋見唔到佢哋個樣，而且都聽唔到佢哋有任何嘅聲音。

望望下呢啲空中漂浮嘅人影，忽然有陣風吹嚟，稍為將啲霧吹開咗少少。

今次終於可以望清楚呢啲人影，首先確確實實係六個人嚟，四女兩男，佢哋嘅表情都係大同小異，表現出非常痛苦嘅感覺。

我同其中一個女人對望咗，佢就好似唞唔到氣咁，塊面谷到好紅。

「佢哋係就嚟要窒息？」家姐同我諗嘅嘢一樣。

但係等陣先，今日全日都冇起過風，冇散過霧，做咩突然有風嘅？





我望向前面風吹過嚟嘅方向，感覺好似有啲咩過緊嚟，好重嘅壓迫感。

前面啲霧同上方一樣，散開咗少少。

「聽唔聽到？」今次輪到我拍家姐手臂。

「聽咩……」「..…聽到啦。」