宇宙傳送門: 2.25

舊時中四開始俾郭俊言折磨後嘅第四日，係隔離班嘅李浩朗知道咗，小息過嚟揾我。

李浩朗靜悄悄咁係我面前一個空位坐低咗「我聽講，你…」

呢刻我個樣又攰又殘，又有幾個瘀腫嘅位置，然後再目無表情咁望住李浩朗。

呢幾日嘅我，可以話係最黑暗嘅時期，唔單止係屋企係咁，而家連返學都要受埋，嗰時嘅我係接近零感情嘅狀態，得個軀殼係度。

「唉….。不如我講俾訓導知，阿陳sir都好人嚟，佢應該…」





「唔使啦。」

「…」「咁你係要點？想忍到幾時？點解唔反抗呀？俾人撳住嚟打都唔郁下？」

「好快會悶，會厭㗎啦佢哋。」

「唉～條友變態㗎嘛，佢….」

「點解..？點解你想幫我？」





李浩朗個樣好似覺得我不可理喻咁「我哋friend 嚟㗎嘛。」

聽到佢呢一句，好似將我呢個冷冰冰嘅機器人，帶返少少温度返嚟咁。而且佢係唯一一個真正將我當做係朋友嘅人。

之後嚟到第五日嘅朝頭早，我未行到班房就見到有一堆人係我嗰個班房門口。

我行近門口嗰時，所有人見到我都讓路俾我行入班房。

班房入面，郭俊言嗰班人係度圍毆緊一個人，但明明我都未返到，唔通係嗰個傻仔？





郭俊言知我返咗嚟就停手「喂！星仔，你個friend吖？吓？」佢指住瞓咗係地下，口腫面腫嘅李浩朗。

「唉～呢個人真係….」

「你知唔知呢條傻撚做咗啲咩呀？」郭俊言幫我將個背囊除咗落嚟，求其咁揼埋咗一邊。

「呢條傻撚…哈…話影低咗有證據…哈…然後威脅我，要我唔好再搞你喎…哈哈。」郭俊言忍住笑咁講，然後又突然踩幾下係地下已經爛晒嘅一部電話。

「嗱！我唔係話嬲佢，係我真係未見過咁撚傻嘅人。影低咗就直接告我啦嘛，仲同我講數。哈哈…，我係佢真係死咗佢算。」

「同埋好消息呀星仔！你今日可以休息一日！」

之後佢哋就繼續去折磨李浩朗，我就企咗係後面望住。

大約過咗半分鐘之後，我嘆咗一口氣「夠啦….」





大家聽到呢兩個字好似聽到火星文咁，唔係好明白咁停晒手望住我。

「咩，咩話？你，講多次。」郭俊言皺晒眉頭咁。

「我話，夠啦。唔關佢事。」

「你而家，係要救佢吖？」

「……係。」原本我唔係咁嘅人嚟，至少尋日為止我都唔係。我要保護嘅人從來只得一個，唔應該包括埋佢。

我諗由呢一次開始，李浩朗逐少逐少咁改變緊我。

「好吖！如果你跪低，擘大個口嘅話，我放過佢。」





「？」

「我急尿吖，行去廁所又遠喎。」

「….」

「我要屙落你個口度。」

「….」

班房四周圍啲人係度互相竊竊私語，冇人起哄亦都冇人要阻止。


「喂！林日星！俾人撳住嚟打就好識反抗啦！要輸都唔好輸得咁肉酸吖。」李浩朗幾經艱辛咁起返身。





「喂！我冇乜耐性㗎。定係你就聽佢話，反抗。唔係就同我跪低等飲尿。」

「…..」

「喂～～！你係咪成世都要咁呀？！你個死柒頭～～！」李浩朗大嗌出嚟嘅呢個問題，係我腦海唔知點解特別咁響亮。

「點解好地地要鬧我死柒頭吖！？都唔關事～！」話語一落，我抬起右腳，一大腳踢落郭俊言個肚度。

「Yeah～～～～！」李浩朗跟住我呢腳，一齊歡呼。

我終於識得反抗。