宇宙傳送門: 3.10

現時凌晨唔知幾多點，一場意料之外嘅打鬥已經展開，對方係兩個平行宇宙嘅我，一男一女。

而家，花劍佬阻止咗我拎把搶，我因而失去咗一大優勢。不過，有一樣嘢好彩嘅係，就算佢哋拎到把槍向我射，都唔會係一個威脅。

果然，我起身之後就見到個花劍佬已經拎起把槍，佢微笑住咁將把槍指向我。

面對住呢個情況，我並冇咩特別嘅反應，因為我知道自己唔會中槍，但對方並唔知道。

花劍佬見到我個樣咁淡定，唔多唔少都有啲疑惑，於是馬上將個槍口指向第二度，然人。





呢下我就心急，雖然然人係個超能力者，但根據十幾分鐘前發生嘅事，佢應該就唔可以擋子彈。
「等等…….」我全身體上下嘅每一處肌肉都同時收緊，發力想去幫然人擋子彈。

可惜，花劍已經對然人開咗槍。呢個時候，我將然人連同圈圈一齊撳低咗，但奇怪嘅係我好似冇聽到有槍聲。

「冇事吖？」

「冇….」

我再望向花劍佬手上把槍，原來已經冇晒子彈，我馬上鬆咗一口氣。





花劍佬將嗰把已經冇用嘅槍揼埋咗一邊，手槍飛埋咗去一邊，撞到嗰個生毛嘅暴龍頭，然後跌落地下。

「睇嚟都係要我親自郁手。」花劍佬抽出花劍，擺好戰鬥姿態。

性感林日星應該係冇諗住參戰，佢將屁股放咗係林日辰嘅背脊上去，兩條長腿伸直咁坐低咗。

林日辰係地下時斷時續咁發出微弱嘅慘叫聲。

我將然人扶起「麻煩你幫我睇實圈圈，仲有你自己，…….仲有我。又要靠你啦遙控、燈光師。」





我伸手諗住摸一摸然人個頭，但面對住佢個爆炸頭，同埋佢頭頂嗰朵花，令我無從入手，蹉跎咗兩秒之後決定放棄。算啦，最後我只係拍一拍佢膊頭當作鼓勵。

轉身之後，望住地下嘅一堆屍體，再望下郭俊言，佢已經完全斷氣。方才先啱啱艱難咁完成個復仇，而家又再次要為生存去搏命。

我腦海有個突如其來嘅問題，我係點樣由一個普通人行到呢度？定係我從來都唔係普通人？

我對殺人唔會有慾望，但同時亦都開始唔會反感。咁樣嘅話，係咪就已經唔係正常？

花劍佬開始高舉花劍，埋緊我身。花劍斬落我身上嘅瞬間，能力發動，極光展現，花劍嘅前端就此係我身上消失。

花劍佬嘅面上有啲驚訝之餘，仲帶啲怒氣，佢應該係嬲佢把花劍咁就冇咗。

花劍佬仲開口講咗句嘢，但我冇聽到佢講啲咩，應該話我根本就冇心機去聽。





我嘅身體而家係依靠住生存本能去驅動，而我大部分嘅精神係諗緊其他嘢。

花劍已失，花劍佬同我之間嘅武器就只有大家嘅拳頭，你我埋身肉搏。佢嘅身手都算敏捷，力量就中等，所以我都可以應付到。

我諗我頭先折磨郭俊言嘅時候，我一部分嘅精神已經俾我自己抽離咗。

打鬥期間，我望到自己對手沾滿血跡，唔係我自己嘅血，係其他人嘅血。

我好懷疑自己嘅為人。我係度做緊咩？做嚟又係為乜？為咗家姐？為咗同少女，仲有李浩朗重遇？重遇之後呢？大家一齊等死？

我，係咪崩潰緊？

一個拳頭打落我塊面，將我部分嘅精神強制回收返嚟。

我口中嘅鮮血聚集，承受唔到自身嘅重量而流出。





現實，痛感令我實在咁感受到此時此刻此地，一切已經發生，冇得返轉頭。

與此同時，我凝視住角落頭，其他人同樣注意到異樣。

角落頭嗰個生毛嘅暴龍頭，眼皮底下嘅位置有極光出現。

「又要嚟啲咩…？」

大家都靜咗落嚟，唔知道會唔會係新嘅威脅。

燈光師然人都將電筒的光線移向角落頭位置照射。

幾秒之後，眼皮底下嘅極光消失，迎嚟嘅繼續係一片肅靜。





或者係個生毛暴龍嘅眼珠被傳送走咗？

然而我嘅猜測係錯嘅，嗰個眼皮開始見到有啲郁動，然後甚至乎被揭開。

一個亞洲人膚色，裸體嘅小人由眼皮底下跌出嚟，小人身上仲附有啲透明黏液，呢個畫面就好似嬰兒出產咁。

小人腳震震咁企咗起身，而家可以見清楚佢全身同個樣。

呢個小人係一個成年男人嘅樣，全身赤裸，見到晒所有部位。之所以會叫佢小人，係因為佢大約只有一個成年人一半咁高。但奇怪嘅係，佢並唔係一個侏儒或者小朋友，佢就係一個成年男人。

單獨咁睇呢個小人，佢好正常，不過一旦將佢擺埋係正常人隔離，就知道佢係一個按照比例縮細咗嘅人。

小人一步一步，企得並唔穩固，但佢都行埋咗我同花劍佬嘅面前。

我同花劍佬同時都警戒住呢個小人，但睇佢好似並冇乜威脅。





小人抬頭，冇講任何嘢，望一望我同花劍佬，然後跳咗一下。

原本連企都企唔穩嘅小人忽然躍起，跳上空中。

小人係跳起嘅同時，抱住自己嘅雙腳，然後係空中自轉。

小人忽然係半空，開始咗意義不明，懸浮嘅無限旋轉。