真人真事改篇﹕師生戀﹕《最接近的陌生距離》: 第七章之二

喺落去教員室途中，我不自覺回憶起頭先Miss睇到張紙仔時嘅表情同眼神真係同平時唔同。即使Miss有溫柔同關心人嘅一面，但頭先佢嘅表情就好似⋯⋯被感動到?頭先Miss欲言又止咁，到底佢想同我講咩呢？

當我行到教員室附近時，我感覺周身唔舒服。我環視四周，原來身邊嘅老師都紛紛對我投下奇怪嘅目光。

「吓！個衰仔會幫老師拎嘢？」

「匡少撞咗邪呀？」

「幾點呀？佢咁早到嘅？」





佢地唔止好似見到怪人咁望住我，亦都交頭接耳對我議論紛紛⋯⋯屌！我做返乖仔有幾出奇呀？我白佢地一眼就拿拿聲行入教員室。

老實講，我真係唔知Miss個位喺邊，但係我又唔敢問老師，所以索性慢慢搵。不過都唔算太難搵嘅，只要搵到一個人就可以搵到Miss個位。

嗰個人就係戇男黎Sir。

之前跟開嘅青年中心社工成日同我講行為反映心理，有啲人比較難觀察出佢行為背後嘅心理。但黎Sir就一定好容易由行為估到佢諗咩。喺Miss嘅徵召名單之中，黎Sir必定係名列榜首。果然，我見到黎Sir離開自己位，然後行去窗台邊嘅其中一個座位前。只見佢神色焦慮不安，但又唔似做虧心事，佢似係忐忑緊應唔應該做一個重要嘅決定——送禮物比人。

黎Sir走咗去上堂，我就走埋去佢頭先放低禮物嘅位度。果然！呢個真係Miss嘅位！枱面上放咗罐冰凍咖啡，咖啡嘅拉蓋上仲攝咗張紙仔。





「Miss Wong :

呢排見你做得好夜，個人明顯攰咗。呢罐啡幫你打打氣。 你加油呀！

黎Sir」

哇，黎Sir啲字同我不相伯仲喎！

當我放低疊簿之後，我仔細咁望住Miss個位。Miss係我老師，總覺得呢個關係係非常之遠。平時見到嘅佢多數係冰冷女王咁；但佢生活嘅點滴、習慣我係一無所知。而Miss嘅位正正係透露緊佢係一個點樣嘅人。





教員室淋浴喺一片早晨陽光之中。Miss呢個位剛好冇比太陽曬住。我見到佢放咗啲植物喺窗台上，加上整齊枱面、書卷味嘅擺設，配合整個教員室早晨氛圍之下。我好似想像得到Miss平時喺呢個位做嘢時嘅樣——好安靜、好認真、好執著自己嘅工作。而佢認真工作時嘅樣，一定係好吸引、好靚。

我到仔細望，發現參考書放得好整齊。參考書嘅排列亦明顯講究，同一係系嘅書要放喺一齊，絕對唔可以中間攝其他書入去，否則Miss一定會睇唔順眼。Miss個位係搵唔到一張關於佢嘅生活照。佢成個位都好簡約，除咗參考書、學生功課同埋一兩個擺設就冇其他嘢。

呢個時候我聽到電話震動嘅聲音。Miss原來將部手機放咗喺枱上面，我好奇咁望咗眼，見到電話顯示咗段訊息。

「Vick ： 你發完細路女脾氣未？都話咗今晚我要見客啊！你唔係有好多男朋友架咩？你搵佢地陪你囉！」

呢段訊息睇到我都突！

Vick? 邊個嚟架？睇呢段訊息似係男朋友喎！但Miss之前唔係同周Sir咩？然後就Matthew⋯⋯跟住就⋯⋯佢話Miss有好多男朋友即係⋯⋯嘩！訊息量大增！

一段訊息唔夠，未來嘅一分鐘裡面仲彈出三個男人嘅虛寒問暖。其中有兩個係學校嘅阿Sir。

我當下即刻心情複雜！我不奇然咁諗⋯⋯我有好多對手等住逐一擊破喎！我忐忑不安咁四處張望，最後我個目光就落咗喺黎Sir送比Miss嘅咖啡上面。





我凝視住咖啡上面嘅紙仔，上面一堆好醜嘅字⋯⋯⋯

我嘴角忍唔住笑了。

一個充滿惡作劇嘅笑意⋯⋯

我順手牽羊，靜雞雞拎走罐咖啡，然後神不知鬼不覺下離開教員室。

呢一刻我又忍唔住笑。惡作劇不嬲就好似興奮劑咁刺激。我心諗，係，可能有好多對手同我爭Miss。而且我追到Miss嘅機會係零。既然係咁⋯⋯⋯

.

我媾唔到，你地班仆街都咪洗旨意埋到Miss Wong 身！





.

所以，黎Sir，Sorry啦！呢罐咖啡當係請我飲啦！

= = = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學