我喺迪士尼識咗個女仔: 18
第三日，呢日真係大挑戰。
因為今日去箱根溫泉一日遊，啲車飛有晒時間限制，而且我book左日間溫泉，又係唔可以遲到。但係，今朝馬嘉澄竟然無叫我起身！
班新幹線寫明09:55東京站，但係我起身嗰陣已經9點鐘。
「馬嘉澄起身啊，遲到喇！！！」
「吓？仆街係喎，點解我起唔到身嘅？」
「唔好問喇，快啲用廁所，我執袋。」
不得不說，女人喺逼嘅情況下可以好快的，嘉澄僅用15分鐘就用完廁所，令我地成功9點半出到門口。迫使我使出鈔票大能搭日本的士去東京站嘅就係馬嘉澄，短短四公里盛惠¥2400，折合百三蚊港紙，香港搭的士呢個距離都係五十蚊…
趕係趕到，不過就搞到早餐都未食，妝又未化咁囉。
「哇好彩趕到…就快無氣」要知道日本好多火車站都仲未有電梯
「最衰都係你啦，又唔叫我起身！」嘉澄話
「講到我叫妳一定起到咁…」
「我一定起到！」
「咁聽朝真係一定要起到，唔係後悔死妳」我話
經歷一個鐘車程，終於到箱根湯本站。
「過對面轉巴士去溫泉區啦」我話
「係咪過夜㗎我地？」
「妳就想啊，哪有錢啊？」
「唉，唔緊要啦，其實我都唔係好想浪費時間」
溫泉呢啲體驗其實試過就算…
雖然箱根環境都幾舒服，但係我更期待聽日去迪士尼，畢竟係一生人一定要嚟一次嘅迪士尼。箱根呢度仲要去其他景點先有嘢睇交通差少少。
「喂…其實下次都係唔好去呢啲地方啦，坐車又耐又無得購物」
「第一次同妳去旅行，將就下啦」
話就話係旅遊區，但係聽到嘅多數係日文。我地間日間溫泉都係新派少少，所以溝通上完全無問題。
「純粹體驗，體驗完其實可以走。」嘉澄喺女湯對我叫
「但係呢個溫泉其實都好爽吖～」我喺隔離回答佢
「咁又係，無乜人嘛，算你無介紹錯啦」
兩個人繼續享受溫泉，周圍又陷入了寂靜。
「喂，你信唔信緣份㗎？」
「少少啦，點解咁問嘅？」
「你唔覺得我地嘅相識真係好有緣份咩？」
「又好似係，米奇老鼠係月老」
「我聽人講過，一個男仔去迪士尼一係喺裡面有深刻嘅嘢發生過要放低，一係就入去識女仔。」
呢啲仲唔係死亡問答？好彩我識答啫。
「咩啊，我有白金卡梗係要用盡佢啦。當去迪士尼係落街咋嘛」
「唔係啊…我意思係，你會唔會有一日係一個人去迪士尼㗎？」
「唔知㗎～不過起碼呢一刻唔會囉」
浸完溫泉，我同嘉澄喺附近行左個圈，再去埋一日遊嗰啲博物館，提早離開箱根返市區。
「好似呢啲靜態嘢唔多啱我地…」嘉澄喺回程嘅火車上講
「仲好講，唔係妳嗰陣無啦啦話去一日遊㗎咩？」
「咁嗰陣興奮咪無考慮咁多囉，不過你都啱，與其俾人限制住，不如自己發掘下」
「係咪先？不過都係咪搞我，呢兩日太攰，仲要留力俾聽日啲行程」我故作玄虛
「咩行程啊？去邊度㗎？」
「秘密！聽日你咪知囉」
「懶神秘～到站喇，快啲落車啦」
話咁快我地又返返新宿市區。
「五點幾，又未夠鐘食飯，搵啲嘢搞啦」我話
「睇戲？」
「香港咩馬嘉澄…妳聽得明日文咩？」
「聽得明啊。」柒的是我呢。
「行商場又悶得滯…不如買定啲宵夜同早餐啦，我驚我地又遲到…」
「就咁邊度好玩㗎？不如分開買嘢，睇下各自會買啲咩返黎啦」
「妳得唔得啊，蕩失路唔係旺角喎，我好難搵妳㗎…」
「得啦，你俾個wifi蛋我啦」
我地約左20分鐘後喺新宿站正門等之後，嘉澄對自己好有信心咁走遠。其實我好唔放心，於是一直跟住佢尾，但好衰唔衰遇著放工時間，跟左幾分鐘嘉澄就淹沒喺人潮內。
我即刻上前追返佢，但係始終搵唔到佢。眼前一棟棟商場，我根本唔知嘉澄去左邊。尋遍我可以搵嘅地方，始終搵唔到佢。
Shit，從來都未試過咁煎熬。
直到第十五分鐘，我已經搵到腳起水泡，上氣不接下氣，唯有入7-11買左包日本版休足時間。我最希望嘅係嘉澄識行返轉頭。
新宿站門外，我頂住寒風等嘉澄返黎。二十分鐘後，嘉澄並無出現，WhatsApp又唔睇，我由抱住一絲希望到心急如焚，終於…
「等我好耐喇咩，雷諾曦？」
「馬嘉澄？妳嚇死我喇…妳真係嚇死我喇」
睇清楚眼前嗰個係馬嘉澄後，我忍唔住喊。
「攬到我透唔到氣…咳咳咳，我只不過見到boutique有件靚衫先停低睇左陣咋嘛。你唔係以為我俾人拐左吓話？」嘉澄問
「我真係好驚失去妳，馬嘉澄」
「做咩啫？對唔住囉唉，係我衰無睇WhatsApp，不過你又係嘅，明知我電話無電又唔俾埋個尿袋我。」
「係喇係喇妳啱晒，買左啲咩啊？」
「知你陪我周圍行都攰喇，休足時間啊」
「乜咁啱…我又係休足時間喎」
「真係？心靈相通？」
「無呃妳㗎」我攞出休足時間俾佢睇
唔知點解，知道佢同我買嘅嘢一樣，我有啲緊張。
兩個人喺新宿街頭打鬧，又變返上次喺銅鑼灣嘅夜晚咁。
「咕～」嘉澄傳來肚餓嘅信號
「玩到肚餓喇喎？咁食飯啦」我望一望錶原來已經八點
budget所限，我帶嘉澄去左出名性價比高嘅利久牛舌。
「呢間好好食喎，唔怪得咁多人排隊啦」
「性價比仲好高添，不過妳唔介意難得去旅行食呢啲咩？」
「食嘅嘢好唔好味，其實都係睇同邊個食啫」
「咁識講嘢，獎妳去Family Mart買甜品啦」
如嘉澄所願，佢終於佢期待左好耐嘅便利店千層蛋糕。
「哇！好好味啊～」
「有無咁誇張啊？」
「你試下啦！」
「哇好甜…妳啊食到成隻污糟貓咁」
「邊度有啊，你幫我抹喇」
我輕輕咁用手指抹去嘉澄嘴角嘅忌廉，然後出其不意舔入口。
「咦～好衰㗎，又係咁玩人」
「邊度有啫，早啲幫妳食完早啲訓覺咋，聽日轉酒店啊，仲要執行李。」
「吓，玩幾日都要轉酒店咁講究？」
「靠妳嗰個所謂行程就死得啦…」
嘉澄食完之後沖涼，出黎坐定定喺書檯，明眼人都知佢等緊我幫佢吹頭。
「俾我縱壞晒喇，唔識自己吹頭喇」我話
「咩喎，返到香港就無呢種待遇㗎啦，梗係要享受到盡啦」
「妳想嘅，我晚晚幫妳吹都得㗎…」
「又諗鹹濕嘢？死人雷諾曦！」
「冤枉啊大人，吹頭髮咋」
「聽住先啦～」
等我都沖埋涼，我同嘉澄終於訓落床，但係兩個都眼光光訓唔到。
「喂，訓唔著啊？」我問嘉澄
「你呢？」
「妳未訓我唔夠膽訓啊」
「切，懶係暖男咁。陪我傾下計啦，呢幾日真係我最輕鬆嘅時候喇…唔使諗做嘢，唔使怕見到熟人，可以做返自己。」
我無答佢。
「春天嘅東京，好似一個戀愛氣泡咁。入面裝載嘅全部都係浪漫嘅愛情故事，但係一旦戳破左個氣泡，所有嘢又返回現實。」
「同你相處嘅每一分每一秒，其實就好似喺一個氣泡入面咁。」
嘉澄嘅眼眸喺漆黑中潔白無比，睇得出佢嘅堅定。
「但係我唔想啊…我想我同你嘅生活係瀰漫住浪漫嘅氣息。我好驚，我好驚失去你，我無其他女仔咁叻，我無其他女仔咁好身材，我…我淨係識愛你㗎咋…」
「我…其實都想講，呢排黃曉盈搵我話想追返我。但係我已經係一個拒絕嘅態度㗎喇，等返到香港我就會同佢講清楚，呢一刻我心入面淨係得馬嘉澄。」我話
「傻嘅，我點會唔信你啊BB豬，我只係怕自己唔夠好咋…」
「每個人都係獨一無二㗎，妳已經夠好㗎喇，妳好在肯陪我癲陪我笑，無嫌棄我成日冷落妳，我已經執到啦」
「哎呀讚人又咁叻嘅？俾你氹到有啲眼訓喇，晚安啦，期待聽朝你嘅行程！」
「咪住…妳訓得著唔代表我都得喎。起碼要俾我攬住先啦～」
「哎呀哎呀怕左你，手痹唔關我事」嘉澄口裡拒絕，實際上仲擰轉面望住我。
「嘻嘻，晚安啦BB豬～」我嘴左嘉澄一啖，然後安然入睡。
我好期待聽日嘅奇妙之旅。