我喺迪士尼識咗個女仔: 27

最令人估唔到嘅係，一個星期六過去，Hazel都係無搵我攞返個銀包。

究竟係佢完全唔記得，定係依家電子支付太先進？

星期日，阿爸阿媽又去左大陸一天遊，一個人突然口痕想食M記，於是踢拖去富怡間M記食早餐。

「乜咁啱啊大佬～」我聽到一把我唔係好想聽到嘅聲音
「咁都見到你…」
「跟得大佬梗係喺附近啦」
「…妳前兩日跌左銀包啊，俾返妳」




「吓係咩？我完全無發現」
「妳尋日無出街咩？」
「都話煲劇囉…出咩街啫」
「唉…請妳食早餐喇。反正妳星期五晚又無去下場，當係補償啦」我都驚訝自己咁好心

Hazel又真係老實不客氣㗎喎，珍寶套餐轉McCafe咖啡。

「多謝大佬～」
「咁又唔使，俾心機做嘢就得喇…」
「嘻嘻嘻，儘量啦」





食完M記，都預Hazel會有下場，星期日喎，咪諗住返屋企訓下覺。

「咁聽日見啦～」我話，轉頭就想行返屋企
「喂！」
「做咩啊又…？」
「你有無嘢做啊？」
「我？無啊，諗住返屋企訓覺咋」
「咁不如…一齊去迪士尼？」





完全估唔到，佢會提出去迪士尼…

「吓…？我同妳？」
「有咩所謂喎，你都唔想我一個女仔去迪士尼咁慘㗎嘛～」Hazel呢一刻搖住我隻手，十足十細路女咁，真係唔知話佢綠茶定天真，邊有可能同個上司去迪士尼

算啦，去迪士尼透下氣都好嘅。我即刻撳巴士app睇下幾時有車，但係Hazel只係隨手揈揈佢條車匙。

「坐我車去啦～」Hazel一抹天真嘅笑容成功呃到我上車。

「啊啊啊啊～你得唔得㗎？」
「放心啦，教練話我手車好好㗎！」
「咁點解妳日光日白開水撥嘅？」
「哎呀…撈亂左打燈同水撥添」
「不如妳休息下，我揸車啦」





Hazel顯得相當驚訝，佢應該唔知我識揸車。

「其實大佬你點解無拖拍嘅？你又細心又唔蒲，點睇都似係筍盤吖」Hazel托住個頭，兩眼眨眨咁問
「我點知點解，妳不如問下月老」
「依家邊度有人信月老㗎？所有愛情都係靠小把戲㗎咋」
「咩戲都好啦，總之依家無，都唔想有住」
「問下啫，使唔使咁惡喎～」

Hazel喺車頭櫃桶隨手就攞出頭箍同膊頭公仔。

「妳成日去迪士尼㗎咩？」
「梗係啦～迪士尼是我家啊。不過我都唔記得問，其實你有無金卡㗎，今日星期日喎」
「我白金卡…」
「哇！一個男仔揸白金卡，九成九係因為女啦」
「性別定型！」




「我要聽故仔～」
「無啊無啊，唉到喇」

果然一話到，Hazel即刻放低所有嘢一枝箭衝落車。

「玩咩先啊？」
「Space Mountain！」Hazel拖住我隻手一路跑入明日世界，好攰…

我從來未見過一個咁痴線嘅女仔，但係更痴線嘅在後頭。

「我係藍中隊隊長。」平平無奇嘅背景對白
「你好啊～～～～」白卡反應嘅Hazel

「行動要快，Gogogo！」
「收到你！！！」痴線，究竟我係咪同緊個白卡去迪士尼。





呢三分鐘真係煎熬，未試過玩Space Mountain玩到想跳車。

「好好玩啊～大佬你做咩唔嗌啊？」Hazel終於醒起佢係同我一齊
「睇妳嗌都飽啦，羞恥心原來飽肚㗎」
「咩喎～咁玩梗係要盡興啦！」
「係係係，妳鍾意啦」
「咁我地去玩U型啦！」

如是者，我地排左成個鐘終於有得玩。前我地一班車嘅人啱啱散去，但係我對眼好清楚咁喺人潮入面認得一個熟悉嘅人影。

我都好肯定，嗰個係嘉澄。點解佢會一個人去迪士尼？

「上車坐好啦，發吘逗做乜…」Hazel推一推我上車，差啲仆街
「妳想收買人命咩…」





排60分鐘玩1分鐘，U型不嬲都係咁㗎啦。落地後，我先醒起要搵嘉澄。

「搵邊個啊？」去完廁所返黎嘅Hazel成個騎左上我背脊
「哇好重，落返黎啦…」
「你就重…」
「小姐啊…我話晒都係妳上司喎，不如試下唔好咁？」
「你都享受㗎啦，定係你覺得我綠茶先？」
「妳話咩就咩啦…」

呢一刻，我只係想搵返嘉澄，但迪士尼咁大邊有可能吖，況且我總唔可以撇低Hazel㗎嘛。

「頭先嗰個肯定係你Ex啦」我同Hazel坐喺美國小鎮大街一路食雪糕，一路等巡遊
「估唔到妳productivity咁低但係睇嘢咁準」
「好心你啦，過去就應該放低，放唔低就…」
「放唔低可以點？」

「各位，仲有幾分鐘，米奇與好友狂歡派對就會開始喇…」

「睇完同你講～」

巡遊仍然係咁單調，仍然係咁好睇。無辦法啦，限米煮限飯，港迪有巡遊都偷笑了。

「呼啊～好好睇！」
「咁妳可以講未啊？」
「吓？你得兩個選擇，狠心忘記，繼續沉淪」
「邊個先啱㗎？」
「人係要做選擇嘅，我可以講嘅係得咁多？」
「點解妳可以咁有經驗…」

Hazel一路向前行，然後擰轉頭同我講：
「22歲8張好人卡，點會無經驗？」

淡淡斜陽打喺Hazel身上，就好似一種嘲笑咁。

「喂，其實唔緊要㗎。起碼，妳無因為唔適合嘅人而行錯路」
「你都唔明。唉，其實真係好想體驗下拍拖嘅感覺。個個都話好浪漫好可愛，但係我完全理解唔到啊… 人地去迪士尼做嘅嘢我一個人都有做，就係無感覺…」
「例如呢，我睇下有無人幫到妳？」
「咦，其實大佬你都係男仔，你都試過拍拖…」
「喂喂喂妳想點？我唔賣身㗎喎」
「屌，叫你幫我影相咋，係咪諗多左啊大佬…」

帶住個年齡成人但係心智水平幼稚園嘅女仔去迪士尼真係好辛苦。

「煙花好好睇啊可？」Hazel走嗰陣問我
「好睇…」
「唉，真係好想同男朋友一齊睇」
「搵妳啲好人卡朋友囉～」
「又串我…」

回程都係我揸車，一開車Hazel已經訓到豬咁，都難怪嘅，佢真係放電咁玩。

「到喇細路女，妳自己搞掂啦。聽日記得準時返工」
「得啦大佬，工作時工作，玩樂時玩樂啊，我識do㗎喇」
「係先好…」

返到屋企，手情不自禁咁碌左去嘉澄嘅story度，未block我，好彩。

「原來佢真係去左迪士尼…」但係睇真啲，佢拖住個男仔嘅手喎，wtf？

難以置信，嘉澄可以無縫接軌約第二個男仔去迪士尼。不過又咁講，都分左手佢做乜關我咩事…
除非，我要追返佢啦。

無錯，我就係要追返佢。

第二日，身為大佬嘅我竟然會低聲下氣搵Hazel。

「咳咳咳，Hazel過一過黎吖」
「咩事啊大佬？」
「我想問呢…Er…」
「咩事啊大佬，有咩唔怕講喎」Hazel講嘢真係好大聲
「係啊大佬，有咩事我地都可以幫你！」搞到成班人都出聲
「妳講嘢就唔可以細聲啲嘅…」
「sorry大佬，你繼續」
「點先可以挽救一段關係啊？」我問
「終於諗清楚想復合喇？」
「係啊係啊，咁點做啊？」
「我唔知喎」
「吓…」

又係一日OT嘅日子，成team人都瘋狂搏殺到十二點幾。

「大家辛苦喇，住得遠嗰啲走先啦，啲手尾我跟就得喇」我對住眼前嘅Teammate講
「唔該晒大佬！」「大佬愛你！」

唔知點解，我開始習慣俾佢地咁樣叫。

「妳又唔走？」
「等埋你吖嘛大佬」
「無事獻殷勤，其實妳係咪迷戀我啫？」
「咩…咩啊，咁順路搵個人傾下計啫」
「講下笑咋，等我執埋嘢走啦」

一路上Hazel係咁問我同嘉澄嘅嘢，面對佢嘅求知精神我唯有同晒佢講。

「大佬…估唔到你咁深情，不過戇鳩」
「喂，妳讚定彈㗎？」
「中性詞。」
「…」

返到屋企，收到Hazel嘅Whatsapp。

「大佬！其實只要你付出真心，付出多啲浪漫，我相信你挽回佢唔係難事黎㗎🫡 所以你要加油啊，有咩唔明可以問我㗎🤓」

估唔到呢個衰妹，喺愛情上又幾成熟咁款，但係下一個message我就笑唔出了。

「你頭先問我係咪迷戀你，如果我話係呢？」

雷諾曦冷靜啲，幻覺黎㗎咋，唔會咁多女埋身㗎。

我再check一次WhatsApp，都扭轉唔到呢個message係事實嘅事實，更慘嘅係我已經已讀左佢。

無論如何，我都決定要挽回嘉澄先，當然搵阿嫂啦。

「阿嫂，嘉澄呢排點？」
「都係咁啦，同埋之前佢咪po左同男仔嘅story嘅？嗰個係佢表弟黎，你唔使擔心」
「咁都好啲…不過佢仲有無去迪士尼啊？」
「有啊…但係有時會忍唔住喊…」
「唉，最衰都係我」
「咁又唔係無彎轉嘅，等下個月囉」
「點解嘅？」
「你唔知咩？阿龍同Jasmine定左下個月擺酒喎」
「喔…好似係喎」我一笑置之，只係因為我已經差唔多成個月無見過佢地。

慢慢行去坐車返屋企，點知越行越遠，竟然返返以前我地三個人嘅聚腳地——灣仔某個後街嘅公園仔。

以前讀書嗰陣，我地已經好鍾意喺呢度。
「你話我要點先溝到樂欣呢？」強哥問
「計我話，一定係買札花唱情歌」我話
「梗係借醉行兇啦，哈哈哈哈」攞住啤酒嘅阿龍話
「你道德敗壞啊你！」我同強哥指住阿龍笑

人去樓空，一切都係回憶。

「如果一切可以返返轉頭，就好了。」我講完之後，轉頭離開，就見到阿龍同強哥。

「你地…」
「無左你，三劍俠點繼續落去啊？」
「你係做錯左，但係人誰無過啊，有咩咪一齊拆掂佢」
「講明先啊，唔好喊啊」

最後都係忍唔住流馬尿。

「你話我要點先挽回到嘉澄呢？」強哥問
「計我話，一定係去迪士尼」我話
「梗係借醉行兇啦，哈哈哈哈」攞住啤酒嘅阿龍話
「你道德敗壞啊你！」我同強哥指住阿龍笑
「不過認真，我遲啲婚禮佢都會到，俾晒機會你啦」阿龍話
「兄弟有無得做先？」
「梗係有啦，帖都印埋，你點會無？」
「多謝，真係多謝你地…」我又忍唔住喊
「又喊，男人就唔好咁婆媽啦，留返呢啲感情去追返嘉澄」
「唔係咁容易㗎師傅」
「容易就唔使溝女啦…」

話雖如此，結論都係等到婚禮先算啦，順其自然永遠係解決問題嘅良方。

「大佬！做乜扮睇唔到我message？」臨近放工嗰陣Hazel問我
「咩message啊…？我做緊嘢啊，轉頭答你」

明眼人都知，佢講緊「你頭先問我係咪迷戀你，如果我話係呢？」嗰句，但係我唔想答呢啲送命題，唯有拖字訣，諗住等到夜一夜先走可以避開佢。

「十點幾，點都走左喇掛？」我心諗，我為左逃避連飯都唔食，上天應該會善待我喇掛？

「大佬！你知唔知我等左你幾耐啊？」
「哇屌，點解你仲未走嘅？」
「我專登等你㗎～」
「點解啊，無順風車㗎喎」
「你知道我點解留低㗎～」
「我唔知喎，去食宵夜先」

我只係想佢唔記得條問題…

結果，我地去左太安樓食炒麵同章魚燒，明明全部都咁邪惡，Hazel話自己成日食都可以keep到咁嘅身型。

「真係好好食啊～整多杯珍珠奶茶就perfect了」Hazel話
「再食就變肥婆喇，同埋聽日要返工㗎」
「我知道啊，但係我今日已經做左聽日一半嘅tasks喇」
「咁有效率？明明平時連嘢都做唔到晒㗎喎」
「等你咁耐，proposal都寫到一半啦」
「唔…唔好意思」
「你知道我想問咩㗎…」

大佬，無啦啦問我如果迷戀我點算呢啲問題你想我點答。Hazel係個好女仔，外貌性格都好討人喜歡，而我都知道公司有男同事對佢有興趣。我更加知道只要我say yes就可以享受齊人之福，但係我唔可以，我一定要俾Hazel知道，我已經有鍾意嘅人。

「其實森林咁大，無必要為左一棵樹停滯不前」
「愛一個人，嗰個人其實先係佢個森林」