【校園／愛情】戀上鄰家女孩（布甸篇）: 29. 抵你俾人罰留堂

曉琳啱先講嘅第一日，唔通係指我哋拍拖嘅第一日？即係佢已經當咗我係佢嘅男朋友？

啊！做乜要講到咁隱晦㗎，而家又走咗去開會，分明就係想吊我癮，你個百厭妹吖。

唔得，無論如何我陣間都要搞清楚！但仲有成粒鐘先到五點喎，又唔知道Miss Chan要罰我留到幾晏，萬一曉琳早過我走得，佢就要一個女仔為咗等我，孤苦伶仃咁留喺雨天操場，容乜易會俾啲不懷好意嘅男同學流晒口水咁拐走咗㗎。

不過當曉琳走咗之後，成間課室就得返我一個，靜到連隔離班跌咗部釘書機落地嘅碰撞聲，我都可以聽得一清二楚，相比之下我哋課室而家冷冷清清咁。

而家個人靜落嚟唔知係咪特別容易亂諗嘢，明明頭先又感受過曉琳頭髮掃落頸嘅痕癢，又享受過曉琳成個身體挨落嚟嘅球感，仲要同曉琳嘴對嘴錫過一次，感官細胞一次過經歷咗一場豐富盛宴，反而我覺得頭先俾子瑜踢中個位仲有啲痛。





回想返起，當初第一個知道我鍾意曉琳嘅人係你，當日我第一個諗到可以幫我追曉琳嘅人又係你，今日叫我追出去嘅人都係你，而家我終於追到曉琳，本來我應該會急不及待捉住你，同你分享呢個喜訊，俾你做第一個知道嘅人，但諗起你頭先叫我唔好理你要我追出去嗰番說話，就算我無應承曉琳唔搵你，我都唔知點面對你好。

而家我可以做嘅嘢，只係希望你可以順順利利咁趕得切整好塊壁報板，唔好衰俾你嗰班啲八婆睇。但其實喺我心入面，當我第一眼望到你塊壁報板之後，就覺得冠軍係屬於你。如果你哋仲係同班你話幾好，你哋又唔使爭，老師都唔使揀得咁辛苦。

唉...我一個人坐喺課室無所事事，變咗亂咁諗嘢，與其係咁，倒不如早啲落去俾人罰留堂仲好，反正都差唔多夠鐘，乾脆早啲孭埋個書包準備搵Miss Chan，但我走嗰陣家樂都未返嚟執書包，我諗佢同子瑜仲喺度爭分奪秒緊，呢刻每一秒鐘對佢哋嚟講都好重要，加油啊！黃子瑜...
 
「May I see Miss Chan？」

「咁遲先落嚟搞咩嚟啊？」我望吓教員室個鐘——16:55，明明就仲有五分鐘先五點，邊處遲？





「吓唔係五點鐘落嚟搵你咩...」

「塊壁報板未整好咩？」Miss Chan反問。

「尋日已經搞掂啦。」

「咪係囉，搞掂又唔早啲落嚟要我喺度等你。吓！而家咁快搞掂得戚啦係咪？」我其實唔係好明，咁快搞掂同得戚兩者有咩關係，不過都係唔好問咁多，扮聽得明，擰吓頭否認咗佢就算。

「唔係啊，我準備好俾你罰我留堂㗎喇。」





「嗤...邊個話要罰你留堂啊，咁想留堂嘅...而家喺走廊企返一個鐘反思吓先囉。」唔好喇啩，頭先喺課室仲反思唔夠咩？

「唔好啦，我寫悔改書都可以㗎。」寫悔改書起碼可以控制寫字速度吖嘛，早啲寫完早啲收工，罰企就無呢支歌仔唱。

「寫咩悔改書？你做錯咩事講嚟俾Miss Chan聽吓啊？嚟啊，講嚟聽吓啊！」臨尾個啊字仲要扯高幾個音。

「無無無...」又唔使留堂又唔使寫悔改書，唔通其實Miss Chan唔係罰我今朝一早幫曉琳講大話？

「我叫你落嚟，係想你嚟緊星期六日去買啲嘢食，下星期一返到嚟慰勞吓班女仔，多謝吓佢哋呢個禮拜留喺課室幫手整壁報板，知唔知？」早講嘛...原來叫我落嚟唔係要罰我，好彩我都無自爆啫。

「係...知道...」

「嗱...呢度私底下俾兩舊水你去買嘢食，低調啲啊知唔知？如果唔知買咩好嘅，咪搵埋曉琳陪你囉。」原本講到錢嗰陣就細細聲講，但臨尾個囉字又扯高幾個音。

「係嘅，多謝Miss Chan。」我都識做嘅，拿拿臨將兩張紅衫魚以最快速度塞落褲袋。





「走啦你，知你趕時間，早啲落嚟搵我吖嘛。」呢個班主任真係神通廣大，咁都知我趕時間想快啲罰完留堂去搵曉琳，但終歸原來係Miss Chan對眼犀利，我向右擰轉面先發現，曉琳唔知幾時已經靜靜雞咁企咗喺我幾個身位之外，雙手翹咗喺後面，挨住走廊幅牆含情脈脈咁望住我。