[中六續集][愛情][懸疑？]擁抱，失憶(重修版): 五十三.

「我明喇，咁跟住要做咩？」

淨係抄一句？

「冇嘢要抄架喇，你揭去最尾嗰頁啦。」

吓？

「但係搞咁耐唔會好唔抵咩？」





咁多個鐘為咗一句？

「你揭去最尾嗰頁先。」

我唔諗住答我，所以我都冇再問，直接揭去最尾嗰頁。

一揭開，我當堂O曬嘴。

因為最後一頁上面有一句唔係我筆跡嘅字，嗰句嘢正正就係…





「愛就是不問值不值得。」

「你…」

我驚訝到講唔到嘢。

佢咁樣算唔算係讀咗我心？

佢拍咗拍我膊頭：「一早知啦。」





你又知啲咩？

「我有講過嘢比你聽咩？」

上一次封信好似淨係講咗約我嘅嘢咋喎。

「你有冇聽過文字係有溫度架？」

咁都比你講到？

「咁我啲文字都好高溫下，咁你都Feel到。」

雖然從事文字創作，但我自問表達能力唔算係頂級。

「用手寫嘅文字加上佢係一封信所以就更加有溫度，你知唔知點解？」





睇嚟佢又有嘢想講。

「都話你好勁架啦。」

想知你知道啲咩。

「咁都要你重視我先得。」

的確係。

佢繼續講：「你以前寄信比我都係用A4紙摺出嚟嘅紙封，但對上一次嘅信封只不過係塗走上面資料嘅重用信封。」

就算我真係重視你都好，但我真係冇咩心情搞咁多。





「咁裡面呢？」

啲字又有咩特別？

「啲字打曬風咁，摸起嚟唔係好凹，睇嚟你寫字嘅時候冇咩力。」

咁所以呢？

「咁會推論到啲咩出嚟？」

我唔識架大佬。

「你唔開心。」

雖然唔知你點推論出嚟，但中咗。





「係啊，你想唔想聽？」

禮貌嚟。

「你知我好得閒架？」

不過都係循例問下咁解，因為我知答案。

「咁我講架喇！」

準備好未？

「等我一陣。」





講完，佢就拎住煙斗行開咗一陣，返嚟嘅時候個煙斗已經填滿咗煙絲。