[中六續集][愛情][懸疑？]擁抱，失憶(重修版): 五十七.

「做咩玩埋啲後生仔嘢啊？」

我幻想唔到你玩室內War game會係咩情況。

「還掂都時日無多，所以咪咩都試下囉。」佢苦笑：「唔通攤喺到等死咩？」

你咁講都有道理嘅，但係…

「有重病仲行嚟行去唔會好辛苦咩？」





如果係我有重病，我半步都唔想行。

「辛苦架，不過唔想攤喺到等死啊嘛。」

都嗰頭近啦，仲咁辛苦自己做咩？

「還掂都係要咩架喇，何苦呢？」

點解唔輕輕鬆鬆咁走？





「知道幾時完就反而更加要珍惜。」

知道幾時完，唔係應該做好離開嘅準備咩？

「準備好走唔係仲好咩？」

安祥咁走總好過玩玩下突然走吧？

「還掂都係要走，不如努力過先走。」佢撳熄枝煙：「我行喇，有緣再會啦。」





佢轉身就走，而我都上巴士返屋企。

「還掂都係要走，不如努力過先走。」我喺到自言自語。

不如努力過先走？

我碌咗下IG，之後就見到一個叫「軒軒萬事屋」嘅Page。

「萬事屋就是客人付錢委託就能將各種事務都辦妥

無論有咩煩惱、問題都可以同我哋講

我哋會盡力幫你解決」

呢個係個Page嘅簡介，簡單啲嚟講就係比錢佢幫你解決問題。





真唔真啊？

「想問可唔可以幫我喺旺角搵一間佈置好Party room？想星期日夜晚用。」我DM問。

我想做啲嘢。

「可以啊，想要咩佈置同埋幾多個人？」佢好快就覆咗我。

然後我就講咗我嘅要求出嚟。

「你等我一陣。」佢覆我。

過咗陣我就喺屋企附近個站落車，而佢都覆咗我。





「搞掂，星期日晚九點至十二點O唔OK？」佢問我。

三個鐘咩都夠喇。

「OK啊，咁我過數比你？」我問佢。

即磅啦，唔搞咁多。

「可以啊。」

然後佢Send咗個付款要求過嚟。