哇我有超能力呀!!但係點解得五秒咁撚少?!: chapter.13 新里程
以往我都唔係好明d人拍拖點解可以咁癲，而家我明哂。
第二朝放假既我，可以訓得三粒鐘就直接去eva樓下送佢番學。然後自己一路on99四圍遊等佢，等佢放學再陪佢去番工。
去到門口，老細見到我即刻捉住我黎問：「阿仔，咁sweet，肯定食左啦？」佢見到我望住eva入鋪頭個樣。
「咩食左呀...無呀屌你。」
「堅定流？我唔係好信喎。」
「我理得你信定唔信。我仲有野做，轉頭先見啦。」有野做當然係藉口。
「頂你，特登送一日假係準備你搞到無力，番唔到黎先放你喎，拿你而家有氣有力，好快d入黎打卡。」
「食屎啦阿mark…彩你都傻。」
只係訓得三粒鐘既我再左兜右兜，兜到十點陪eva番屋企，仲可以陪佢再講幾粒鐘電話先訓，今日真係我有史以黎最瘋癲既一日。
當然，拖係要拍，但工都要番，呢個十二月特別忙，因為原本諗住用四個月時間先過得哂比阿康handle既野而家得番一個月時間，加上有剩時間都同eva傾計磨左，番工鋤dee既生活暫時要放低。
聖誕梗係…無假放。我都想放假同eva去行下，不過真係好忙，聖誕人流先最多生意最好，加上我已經同connie約實一月三號就要飛，第一個目的地係上海，我既責任心唔容許我最後呢幾日管pair。
不過阿mark見到呢個月sales已經過左target，所以特登比我同eva響三十一號早收工。
﹝三仔 : 我地響度做，你去拍拖？你死撚梗喇。下餐你既，唔要富臨呀，力奇四季火鍋任食先夠喉呀屌你。﹞
所以，我同eva都有個浪漫既除夕可以過下，detail唔講啦。
到左一月三號既朝早，connie叫我響佢樓下等，我拎埋自己既行李提早左少少到，等左一陣，connie同另一個人拎住一個大喼加兩個大到仆街既行李袋，如無意外係攝影器材？我上前想幫手拎其中一袋。
「阿ming黎左拿？好重...小心。」 connie將佢手上果袋行李拎比我。
唔拎由自可，一拎我心諗：入面裝鉛架屌你老母？點解攝影器材可以咁撚重？
「家姐，你請個assistant都好後生喎。」connie側邊果個男人講。
「幾好丫佢，高高大大實實淨淨。」connie答。
我心諗我得個樣架姐...你叫我跑兩步我都索哂氣，不過，呢個係邊位？叫connie做家姐...呢個就係...
「阿ming，呢個係我細佬，叫佢steven就得。」connie應該睇到我表情表示既疑惑。
「哦...你好steven。」我要兩隻手先拎得住connie個行李袋，我想伸隻手同佢握下都唔得。
「阿ming係咪？放心啦，做我家姐助手同做咕喱一樣既姐，你番黎果陣唔好唔夠力就ok。」
眼前呢個steven仲矮過我，但係睇佢手瓜都有些少粗，可以單手拎起另一個袋。
「家姐我陪埋你去機場啦，順便幫你渣架車番黎。」
「都好。」
就咁，三個人拎哂三大件行李上connie架車之後，我再回頭拉番自己果件行李。
不過，響我想竇起connie個行李袋上後尾箱時，我跣手，個袋入面可能係connie既器材，好似佢果種級數既人用既器材分分鐘十幾萬，跌爛左我去做鴨都唔夠賠，所謂人急生智，「啪！」，停一停諗一諗，我安全咁將件放響地下，然後再用正確姿勢抬佢上車尾箱，平安無事。裡面既器材無穿無爛。
connie凝望我呢一邊笑一笑，我肯定connie見到我做左d乜，至於佢細佬見唔見到我就唔肯定喇，希望見唔到啦，如果唔係之後又要解釋一餐。
車上面，由connie坐前面渣車去機場，steven坐響connie側邊，我坐響後座。
一路上都係佢地兩姐弟傾計多，間中我都會同steven講兩句，知道左steven原來係個精通世界上三份之一語言既權威級人馬，而且仲得廿七歲，我心諗係真唔係呀...比你一個月讀完一種語言都讀唔到咁多啦...不過如果真有其事，眼前呢個人淨係份勤力都可以打死世界上唔少人。
而connie比steven大兩歲。
connie有幾把炮我一早知，有錢有才能有樣貌，仲要正值廿九芳齡，如果我早幾年出世，我應該會瘋狂迷戀connie，而佢細佬steven既料子假若係真既，眼前兩個人，兩個都係有成就有才幹，令到坐響後座既我，覺得我自己有d渺小。
去到機場，我真係不得不感謝發明行李車果個人，將四大件重到仆街既行李放哂響車上面，雖然都要用力先推得郁，但係都好過要自己拎...
「就咁啦，家姐我渣車番去先，呢幾日進仔我會湊住佢架喇。」steven響機場門口同我地說再見。
Connie呢個時侯指我去邊個counter辦寄倉，話係之後都等我黎搞。
而我，真係做咕喱！唔洗出錢，機票錢乜鬼稅果d全部係connie出，我雖然只係出力，但係都夠我上到機撻響個位全程唔想起身。
落到機，第一個感覺，係上海空氣同香港唔同，好似硬係有d唔自在既感覺。
響上海機場，connie叫我用我d唔純正既普通話去試下搞唔搞到d手續。
事關頭先響機上面同connie傾過我d外語能力，我好老實咁講我既英文真係講唔到幾多句，普通話就因為之前有段時間上網同d台灣人打機傾計，都勉強有少許貨仔，不過就有d台灣口音。
我淆淆地行到去counter，講左幾句，好彩個姐姐聽得明，佢叫我等部電腦處理緊果時仲問我：「你是不是台灣人呀？」
「呃...不是阿，我從香港來的。」
「對喔，但是聽你口音是台灣的。」
「呃...嗯...對。」我支吾以對。
「你口音跟我們有一點點兒不同。好了，請拿回，祝你旅遊愉快。」個counter姐姐仔笑得好甜咁遞番d證件比我。
我拎番證件果陣真係有些少唔好意思。
「唔錯丫，阿ming，睇黎以後去華人地方我都仲可以唔洗出聲。」
「我其實講到口窒窒...」
「好啦，過去拎車，去左酒店放低行李先。」
估唔到原來connie一早租定架本田七人車泊響機場附近，我地行緊去拎車果陣，我突然興起想問connie：「咁connie你之前出國取材唔洗自己開聲？」
「嗯哼，呢年都係我細佬抽時間陪我周圍飛，有佢既話，好多偏遠地區都可以去行下，因為世界上唔係每一個地方都可以用英文溝通，所以呢個時侯就係我細佬呢部人肉翻譯機出場既時間，哈。」 connie一身便裝加鴨舌帽，回頭答我時侯順便笑一笑。
「咁點解會搵我黎做助手既？」
「細佬佢有佢要做既野，我都唔可以次次都要佢幫手既。」佢繼續講，「何況，請到一個咁特別既助手，非常難得，係咪？」
「哈哈...」 我唔認同。