【愛情】關於我一覺瞓醒發現喺初戀屋企⋯！: 47. 維護
「知珩～」樂恩喺廚房行出嚟嘅時候帶住同平時一樣嘅活潑笑容，「你知唔知呀，我琴晚收工之後呢～」
樂恩行番去佢執餐具嘅位，邊執邊講佢琴晚收工番屋企嘅時候發生咗咩事，果然樂恩係cafe嘅開心果，有佢喺度cafe就算冇人都唔會靜到悶
「嗰個女仔捧住一大紮紅玫瑰，佢男朋友同佢一齊，個女仔睇起嚟笑得好sweet好開心～」樂恩一臉羨慕咁講
「以後識到男朋友嘅話叫佢買比你囉～」我望住樂恩從雙眼滲出嚟嘅羨慕，就笑一笑同佢講，「唔洗羨慕人～」
「知珩呀，你有冇收過花呀？」樂恩上身前傾笑嘻嘻咁問我，佢呢個八卦想食花生嘅表情唔會令人討厭
「食花生食到落我度啦？」我無奈一笑，「以前都有收過花嘅～」
「係唔係一大～紮？」樂恩瞪大眼，好奇心滿滿咁望住我，繪形繪聲咁比劃起嚟，「我以後都想收下花，至少可以炫耀下嘛～」
「以前男朋友冇送過比你咩？以前你比我睇相嗰個男仔。」我諗起樂恩以前話過佢拍過一次拖
「冇啦，佢邊會做啲咁浪漫嘅嘢呀～」樂恩不屑咁反咗個白眼，「所以就分手啦～一啲都唔貼心，又唔浪漫，無聊⋯」
我笑而不語，女仔當然會希望男朋友可以浪漫啲，畢竟女仔都中意儀式感，而儀式感背後追求嘅，係自己被重視嘅感覺
我淨係收過一次花，不過唔係阿立送嘅，係大學嗰陣嘅男朋友送，第一次收到花，一束粉紅色嘅玫瑰花，花好靚，但我收到嘅時候，心入面其實冇特別開心，可能因為我冇特別中意花嘅關係
「唉～好想拍下拖，好羨慕人地甜甜蜜蜜嘅愛情⋯」樂恩扁起嘴
甜甜蜜蜜嘅愛情，現真邊有咁多？你以為真係睇電視劇，高富帥為你做任何事，買一大紮紅玫瑰喺街等你接你，做一大堆嘢只係為博你一笑？
現實嘅愛情冇想像中咁美好，就算識咗好多年，以為感情好堅定，最後都會輸比時間同一句「已經冇feel」
「搵到啱嘅人咪試下一齊，中意嘅咪試下去追，唔好為拍而拍就足夠。」我用輕鬆嘅語氣講出認真嘅說話，「未搵到咪再等陣囉～」
至少我係咁樣諗，為拍拖而拍拖，最後浪費自己嘅時間同時又傷害到人地嘅真心，大家都唔好受
「你咁樣語重心長同我講得，一定係你以前都遇到過好中意嘅人啦～」樂恩作為女仔，直覺都唔差，我作為女仔都好佩服女仔嘅直覺
「以前遇過⋯」我轉身行到洗手盆前面洗嘢，我耷低頭同時露出好淡嘅笑容
諗起阿立，我都只可以苦笑⋯因為除咗苦笑，我冇嘢可以講⋯每次諗起同佢之間嘅點點滴滴，我都會覺得陣陣心酸
「唔會，我就中意你！以後都一樣～」以前嘅甜言蜜語言猶在耳，但算啦，都過去啦
我都係嗰句，順其自然，所有嘢都順其自然，我唔肯定宜家嘅我同佢，係因為仲中意定只係因為突然見番，所以先會有呢種⋯久違嘅新鮮感？
⋯
中午嘅時候cafe都比較忙，啲人食luncg又放飯，所以真係忙到冇停手
我將一杯又一杯嘅飲品沖好然後放到出單嘅位置，等其他人嚟拎
「嗨～」我眼睛嘅餘光只係見到有個人行到嚟吧枱前面，企喺我面前
我下意識就自然咁抬起頭，睇下對方係唔係有啲咩需要幫助，點知我一抬頭，就見到係成日嚟搭訕嗰個男仔⋯
「嗨。」我禮貌上微微一笑，下一秒瞬間收回視線繼續做嘢
拜托唔好同我講嘢搭訕，除咗係我已經好忙之外，亦係我唔想理你⋯我喺心入面一直默念呢句
「我叫Mavis呀，你認唔認得我？」
「我成日都嚟買咖啡㗎～今日又見到你啦～」
「我喺附近番工㗎，就係前面商業區嗰度～」
「嗯⋯係呀⋯」我敷衍點笑一笑點一下頭，「嗯⋯」
「你叫咩名呀？你係呢度嘅full time係唔係？」
「最近我都有一排冇嚟，不過今日一嚟就見到你啦～」
「你真係冇IG呀？識多個朋友都好呀～」
係唔係我嘅態度唔夠明顯？佢就冇feel到我嘅厭煩？一直窮追猛打咁樣係咩事⋯？
我只係覺得好煩，唔通佢睇唔到宜家有幾忙幾多人？佢唔覺得咁樣住人做嘢唔係幾好意思？
「唔好意思—」「先生唔好意思，呢個時間係繁忙時段，麻煩你唔好騷擾我地同事做嘢。」
喺我正想要開口嘅時候，阿逸就先一步企出嚟、帶住服務行業應有嘅微笑同禮貌開口同佢講
「我只係有嘢問一問⋯」佢即刻窒咗一下，表情都有啲尷尬
「你問嘅嘢同我地咖啡師嘅工作好似冇咩關係。」阿逸微笑住講道，「你一直騷擾我地同事做嘢，亦會影響到出單嘅進度，即係會影響到其他客人。」
佢比阿逸咁樣直接講，佢即刻無言以對，阿逸講嘅的確係事實嚟，我係員工自然唔想影響到客人⋯
似乎佢比阿逸咁樣講一講，即刻覺得好尷尬，企喺一邊等咖啡
「呼⋯」我見佢冇再撩我講嘢，我自己都默默咁鬆一口氣，「好彩阿逸及時行出嚟⋯」
阿逸出完餐又準備行番入廚房幫手，佢喺行過水吧嘅時候同我對望咗一眼，佢挑一挑眉，然後好細幅度咁點頭
Cafe忙起上嚟嘅話，阿逸都真係最忙嗰個，每邊都要顧及，要出餐、要幫手煮、要出甜品、要落單、要執枱⋯佢每一樣嘢都要顧及
但阿逸喺度嘅話，cafe嘅員工都會明顯咁安心好多，雖然唔係話冇咗阿逸我地就咩都做唔到，但佢喺度嘅話，大家睇起嚟都冇咁慌張
過咗lunchtime同teatime嘅時間之後，cafe嘅人流都慢慢少起嚟，客人食完嘢都唔多停留太耐，傾多兩句、飲埋杯嘢飲就走
「呼⋯又忙完一大輪啦⋯」樂恩手上捧住枱上嘅杯碟行去廚房
「呼～」阿逸都鬆咗一口氣，行入嚟水吧，拎起佢自己嘅水樽飲水
「啱啱唔該你⋯」我為啱啱佢出口嘅事同佢講聲唔該
IG Link: https://www.instagram.com/nd_cotttoncandy/?hl=zh-tw