【愛情】關於我一覺瞓醒發現喺初戀屋企⋯！: 56. 萌芽

知珩望住我嗰個略帶點迷惘嘅眼神，好似講緊佢都係諗緊呢樣嘢，但佢唔想開口提起呢件事

「氣唔順。」知珩低聲咁講咗一句，「而且你一早就知我討厭佢，所以更加討厭。」

「所以，我地重新開始，好唔好？」我挺直腰板坐好，以表示我認真嘅提議

「唔要⋯暫時。」知珩小幅度咁搖頭，「我唔知道你係真心想同我重新開始，定只係因為我地啱啱又見番面所以⋯有新鮮感⋯」

我沉默不語，知珩安靜咗兩秒之後，朝我伸出手，將手托喺我下巴，然後又緩緩開口：「而且，重新開始係兩個人嘅事，我都要睇清咗自己先得⋯」





知珩由以前開始就係咁，一時好依賴我，一時比我更清醒，但佢本來就係呢種獨立嘅人

「咁所以你同唔同我一齊去？女班長嘅婚禮。」我伸手捉住佢嘅手腕，佢輕捏咗我嘅下巴一下

「遲啲答你～」知珩笑一笑，拎條薯條就塞入我口入面，佢根本係特登

「好好好，你點話點好啦～」我見佢笑番，我都自然咁跟住佢露出笑容

「咁就乖啦～」知珩望向我笑一笑





有時佢好似好識捉我心理一樣，可能真係因為小學就識，都算係由細一齊玩到大

我望住佢嘅側面，有時我先係睇唔清佢嗰個

嗰陣同佢表白嘅時候，佢睇起嚟好似一早知我中意佢一樣，好似只有我猶疑咗好耐、諗咗好耐

「你做咩咁識捉我心理？」我以半開玩笑嘅語氣問知珩

「因為⋯」佢拎起汽水，特登猶疑咗一下先望過嚟我度，「因為我地都中意過對方囉～」





「宜家聽起嚟，咁樣講好似好曖昧。」我側身面向知珩坐，托住頭望佢

「咳咳！再曖昧嘅樣又唔係冇講過⋯」知珩嘅神色略帶點尷尬，「以前都講好多啦⋯」

未一齊嘅時候，講嘅每一句都係試探，由反應到嘴角嘅弧度，由眼神到微表情，每一樣嘢都特別留意

「以前同宜家又點同？以前我地都未出嚟做嘢。」我默默咁觀察住知珩嘅表情，我伏低喺枱上面：「太多嘢變咗啦⋯」

「嗯，都係～人會變，月會圓嘛。」知珩嘅語氣聽起嚟無奈又平淡，「就係，咁老土⋯」

下一秒我就感覺到我嘅頭髮郁咗一郁，知珩嘅手放喺我嘅後尾枕玩我嘅頭髮，以前⋯佢都係一樣，好中意咁樣玩我啲頭髮

「我地冇可能同以前一樣⋯」我將頭枕喺右手，我將左手抽出嚟，輕輕咁放到佢嘅手背上將佢嘅手輕輕握住

知珩完全冇反抗，佢可以掙脫，但佢冇，所以，佢唔係完全唔想重新開始⋯？我唔敢估太多





知珩嘅手一郁，我以為佢要縮起手，但佢嘅手仍然放喺我嘅後尾枕，只係反一下，手心貼住我嘅手心，輕扣住我嘅手

知珩嘅手比我細、溫度比我低、指尖比我纖幼，曾經熟悉嘅感覺又一次輕落喺我嘅手心

第一次拖手嘅時候，心臟跳到就飛出嚟一樣，每一下心跳都好緊密，手心出汗都唔願鬆開手

「如果可以唔鬆手，我會一直拖住。」

但可惜嘅係，我地都係分開咗，我重唔重要⋯？我希望對佢嚟講我係重要

我地之間可以咁安靜但唔尷尬，可以單純咁握住對方嘅手唔出聲，我地可以去到呢個地步

我地可以安靜到默默咁喺手機刪走對方嘅電話，默默咁unfollow對方，都唔知係我地嘅默契定點⋯





放喺枱上嘅手機突然震動起嚟，我坐起身，原來係知珩電話響啦

「阿逸⋯」我瞄到手機上面嘅名，係整甜品嗰個男仔

我先一步將手鬆開，將食完嘅嘢執走將枱面清空，都算係迴避一下，人地講電話唔通我喺隔離聽住咩？

我喺廚房行出嚟就番咗房，整甜品嗰個男仔，我直覺覺得係有啲嘢

不過算啦，畢竟宜家一齊住嘅係我同知珩

⋯

⋯

⋯





「知珩？知珩？」「嗯，聽到聽到。」

我聽到阿逸叫咗我兩聲，即刻回神應佢

「Okay呀，我同樂恩調啦，我可以。」我回答

「咁你聽日放假，樂恩就番聽日。」阿逸講多一次提醒我

「好，我知啦。」我微微點願

「好啦唔阻你啦，拜拜～」「拜拜。」

收咗線之後，成個環境又即刻安靜咗落嚟，客廳就只有我一個人啦，阿立都番咗房





凝聚喺我手心嘅溫度仍然未散去，我輕握一下手心，餘溫仍然喺度；一直以嚟我隻手都比較凍，但係有阿立喺度嘅話，我隻手都會變到好暖

望住阿立，就會勾起好多以前嘅回憶，諗起好多同佢有關嘅事

「搞到我都愈嚟愈奇怪⋯」我無奈咁慨嘆一聲，「我嘅生活係唔係真係唔可以冇咗阿立⋯？」

著住校服嘅佢顯得陽光氣息滿滿，佢永遠都會早我一步喺我屋企樓下等我，由未一齊到一齊都好，一如既往

喺學校同其他男同學打鬧嘅時候，佢嘅笑容總會令我嘅視線移唔開，固定喺佢嘅身上

有時佢會偷偷地拍我一下，但冇咩特別意思，只係喺經過我隔離嘅時候習慣性咁拍我一下

放學之後我地會一齊買嘢食，笑下傾下計咁渡過番屋企嗰段路，講下我今日睇到啲咩好笑嘢，佢分享下今日佢地男仔做咗啲咩搞笑事，講下上堂嘅時候邊堂悶邊堂唔悶

人地傳我同佢嘅緋聞，我同佢都只係笑住否認，但原來感情一早喺我地冇留意嘅時候悄然萌芽

「以前嘅日子做咩咁好過⋯」我雙手托住額，「都係因為以前太開心，所以宜家先會咁樣⋯」

我都唔知道我以後會變成點，阿立同我分手嘅時候，我傷心咗好耐，獨自消沉咗一段好長嘅時間

我將房入面同阿立有關嘅所有嘢都收起晒，唔想一見到就會觸景傷情，喊到收唔到聲

嗯，係呀，嗰陣嘅我，就係有咁中意呢個人，如果滿分係100分，咁我有200分咁中意佢

「所以點可能真係話放低就放低⋯？」我自己都覺得呢種想法好好笑，邊個知道我用咗幾耐去淡忘呢個人

我望住一亮嘅手機螢幕，係阿逸嘅message，但我都冇拎起手機去睇，就算我察覺到都好，只要冇人開口講起嘅話，大家都係可以當冇事發生過

「唉⋯」我默默咁自動嘆一口氣

我宜家咩都唔想諗，只係想聽日好好咁放一日假，好好咁休息，最近cafe都太忙⋯搞到我忙完左又要忙右，Abby番嘅話，我地個個都要忙埋佢嗰份

「沖涼⋯」我拎埋手機同我一齊起身番房




IG Link: https://www.instagram.com/nd_cotttoncandy/?hl=zh-tw