【愛情】關於我一覺瞓醒發現喺初戀屋企⋯！: 65. 承諾
「落地鏡好似有啲⋯嘥位？」我望住鏡中嘅阿立講道，然後先緩緩咁將目光由鏡中嘅佢轉到企喺我隔離嘅佢，「各有各好，但你覺得呢？你想要邊款？」
「主要睇你，女仔唔係成日要襯衫咩？」阿立喺我將決定權掉比佢嘅時候，佢將個波拋番比我，「你覺得邊款好似會好用啲？」
「掛牆！」我毫不猶疑咁開口搶答，「掛牆好啲，高度可以自己就，唔洗固定，你係打算放喺門口隔離？」
「嗯，好唔好？」阿立問我
「吓？嗰度係你屋企，唔係應該你睇下邊塊好睇？」我一直向前行，擰轉頭望一望佢
「我冇所謂，你應該會多啲用到。」阿立完全唔在意咁聳肩，加快腳步行到我隔離，「我屋企冇設計過，所以咩鏡都冇咩所謂。」
「咁好啦～我覺得呢塊幾好睇。」我捉住佢嘅前臂拉一拉佢，指住我面前嘅一塊黑框掛牆鏡
「咁就呢塊。」阿立盯住鏡點頭，佢又真係一啲所謂都冇
⋯
我地買完嘢就直接去搭車，有啲急不及待想番去裝塊鏡
「去唔去轉超級市場先再番去？」阿立問我
「但拎住塊鏡會唔會太重⋯？」我側住頭望住阿立手上拎住嘅紙盒，「再去超市買嘢方唔方便？」
「唔會唔方便，而且屋企啲零食好似都就嚟食晒，你唔想去入貨咩？」阿立問我，佢嘅眼神好似引緊我踩入圈套一樣
「唔⋯都好～」我同意佢嘅提議，「你唔怕拎住啲嘢重就得啦～」
「好輕咋～」阿立擺出唔在意嘅表情，「順便去埋啦，唔洗行兩轉。」
我行入超級市場嘅第一件事係拎一個籃，第二件事係直奔去放薯片嘅地方
「阿立！食唔食呢個呀？」我指住喺我面前嘅薯片，「買一包？」
「好呀，買囉～」拎住睇起嚟好重嘅鏡嘅佢走近我，行到我隔離嘅時候停低，「定買兩包？你唔係中意食咩？」
「都好～」我稍微思考一下我每次係唔係可以一包食晒之後拎起兩包就薯片掉到籃入面，「笑咩呀？」
我抬頭嘅時候見到佢笑，見到佢笑，我嘅嘴角都自動上揚撐
「笑你⋯」阿立完全唔打算掩飾，直接就話係笑緊我
「笑我咩？」我瞪大眼直望住佢追問
「笑我地嘅氣質大小姐宜家成個為食鬼咁～」佢無奈咁望我一眼就轉身拎起薯片掉入籃，語氣中夾雜住一絲縱容嘅感覺
「氣質大小姐」聽起嚟係一個好笑嘅形容詞，阿立以前成日都咁樣講嚟笑我，因為喺其他人面前我會好乖好靜，但喺阿立嘅面前完全係一個相反
「咩呀⋯我不嬲都係咁⋯」我跟喺阿立嘅身後行
佢行喺我前面，有時見到啱食嘅嘢會拎起轉身問我食唔食，有時我會叫住佢問佢買唔買呢個嗰個
感覺好奇怪，以前都有同佢一齊行過超級市場，但以前完全冇呢種好溫馨嘅感覺
「爸爸！我想買呢個糖！」「好呀，我地去問下媽咪比唔比先～」
我望向隔離啱啱行過嘅一家三口，再望一眼行咗去我前面嘅阿立，心入面有種好奇怪嘅感覺
可能因為宜家同我一齊行緊超級市場嘅佢，唔係同以前一樣，而係宜家嘅我地一齊住，所以感覺先會咁怪
「知珩。」阿立叫咗我一聲，我即刻回神快步跟上佢，「食唔食雪糕？要曲奇味定雲尼拿味？」
「雲尼拿。」我側着頭望住佢嘅側臉，我地嘅過去又一次自然而然咁喺腦入面浮現
「我要食一啖！」「你啱啱又話唔食？」
我見到阿立食甜筒即刻又心思思想食，但啱啱喺7仔嘅時候我因為唔想食就冇買
「一啖一啖！」我雙手捉住阿立拎住甜筒隻手，「就一啖嘛⋯！」
「真係食一啖好啦⋯」阿立放棄掙扎，將雪糕推近我
我捉住佢隻手，喺佢咬過嘅位置咬咗一啖，冰冰涼涼、入口即融嘅感覺令人好愉悅
我望向佢嘅時候，佢已經先望住我，微微上揚嘅嘴角令我直覺覺得佢有嘢想講
「咁樣算唔算間接kiss？」佢突然間咁樣講，我即刻呆咗一下唔識答佢
「唉～你睇下～你都唔敢直接錫我。」我半開玩笑咁講道
阿立居然一啲反應都冇，只係默默咁又食一啖雪糕
「冇反應！？」我當下即刻喺心入面震驚咁嗌咗出嚟，「我都暗示⋯明示得咁明顯啦⋯！」
我好奇咁又想望下阿立係咩反應，我微微側一側頭望佢嘅時候，佢將雪糕遞到我面前，雲尼拿味嘅雪糕直接掂到我嘅嘴唇
「嚇咗我一跳⋯！」我比突如其來嘅冰凍感嚇親而向後微微一縮
「下次先。」阿立對我露出我中意見到嘅笑容，輕描淡寫咁回答咗我啱啱講嘅嘢
我趁佢未將甜筒喺我面前拎走前，我又伸手捉住佢嘅手再偷食一啖雪糕
「又話一啖？」阿立望住又比我咬咗一啖嘅雪糕，「仲食唔食？」
「你對我咁好嘅～」我直接翹住阿立嘅手臂痴住佢，成個心都覺得甜絲絲，「你會唔會有一日就唔再對我咁好？」
「吓～唔會囉～」阿立搖搖頭，佢微微耷低頭望我，伸手輕輕力咁拍咗我個額頭一下，「以後都會咁好～」
以前阿立講過佢以後都會對我好，我心入面的確會有少少期待佢仲記得呢件事，但係⋯宜家嘅我，冇資格要求咁多
初次嘅心動，係對視嘅一刻已經傳嚟心臟緊縮嘅感覺，我先察覺到原來我係中意佢
「咁兩隻都買啦，你最後都係會兩隻都想食⋯」阿立無奈嘅語氣將我喺回憶入面拉番番嚟宜家呢一刻
「你又知嘅？」我微微一笑，目光從佢嘅側面上移開，望住佢從雪櫃拎出嚟嘅兩盒雪糕，我壓抑住心入面嘅緊張自然開口：「都係你對我最好。」
我知道我今次唔係衝口而出，我係諗過想講出口所以先講出嚟
我唔敢同佢對上視線，等佢回答嘅時候，我個心都噗噗跳，好似又番到去以前嗰種又緊張又期待嘅感覺咁
IG Link: https://www.instagram.com/nd_cotttoncandy/?hl=zh-tw