【愛情】關於我一覺瞓醒發現喺初戀屋企⋯！: 93. 見面
「未，做咩？」阿逸望過嚟，又望到樂恩拎住嘅三文治，「你要比我食？」
「嗯，明益你啦～我食唔晒。」樂恩點頭，視線一直停喺阿逸嘅身上
「咁好益我？」阿逸行過嚟拎走樂恩手上嘅三文治，樂恩定睛望住阿逸，期待緊有人稱讚佢一樣，「係你食唔落，定你唔中意食呢個呀？」
「我食唔落！你咁睇我㗎！」樂恩嘅不滿都寫晒喺臉上，伸手就阿逸嘅心口上打咗一拳，「難得人地對你咁好問你食咗早餐未！」
「係係係⋯你好好，咁多謝你份早餐啦～」阿逸對住樂恩真係冇咩勝算可言
「唔洗多謝，我都知我好。」樂恩傲嬌咁哼一聲
明明佢就係想將份三文治比阿逸食，但係又唔好意思直接問佢，唯有問咗我先再問阿逸，女仔嘅心思都係咁樣嘛～
中午嘅時候比較忙，排隊嘅人都比較多，而且一直有人出出入入
「唔該來要一杯檸檬特飲～」
「小姐，你嘅Latte同芝士蛋糕。」
「唔該～想問下係喺邊度比錢呀？」
「你好呀，我想要一件芝士蛋糕、一件綠茶千層蛋糕、同兩件青提芝士塔拎走。」
今日忙到我地個個都冇停手，本來喺水吧嘅樂恩都要出去外面幫手，我嘅餘光都可以見到樂恩行得好快，好似有殘影咁樣快速閃過
忙咗差唔多成三個鐘，人流先慢慢減少，我呢個位明明冷氣可以吹到，但我都覺得背脊有啲出緊汗嘅感覺
「執埋啲枱就可以休息一陣啦⋯」樂恩拎住托盤喺水吧經過嘅時候疲倦咁講道
我喺水吧位嘅單都做晒，總算可以休息一陣，我擰轉身拎起水杯飲啖水嘅時候，忽然聽到廚房嗰邊有啲嘈
「哐！」「你冷靜啲先⋯！」
我聽到阿逸有啲慌張嘅語氣，以為發生咩事，即刻蓋上水杯嘅蓋擰轉頭望向廚房嗰邊
「有冇整到？」阿逸望住樂恩，地上面係銀色嘅托盤同埋啲餐具，仲有兩隻不鏽鋼碟
「冇⋯」樂恩似乎都比啱啱鬆一鬆手嚇親，有啲恍惚咁搖頭，「只係有啲手軟⋯」
「你入休息室坐一坐先啦。」阿逸拍一拍樂恩嘅膊頭，「呢度我執。」
「嗯⋯」樂恩微微點頭，轉身行去休息室
可能上星期太得閒，今個星期突然咁忙，搞到一時又有啲難適應，而且樂恩今日真係喺最忙嘅時候chur到盡，攰都係情有可原
「樂恩樽水係唔係喺度？」阿逸行過嚟問我
「哦係呀，呢樽。」我喺架上面拎咗樂恩嘅水樽落嚟，連同一包熊仔軟糖遞比阿逸，「佢今日真係chur到盡啦⋯」
「所以咪比佢休息陣。」阿逸接過兩樣嘢就行咗入休息室，但只係推開半道門，探頭入去同樂恩講嘢
⋯
去到收工嘅時候，阿逸喺收到我嘅拒絕之後，冇再送我番屋企
佢最近又開始係同樂恩一齊走，我一個人搭車番去，去到地鐵站出閘嘅時候，就會見到阿立企喺唔離嘅地方等我
「拜拜啦知珩～」「拜拜。」
我地講聲再見，然後又各自番屋企，我望咗佢地兩人嘅身影一眼，然後就行入地鐵站搭車番去食飯
⋯
⋯
⋯
我唔知點解，會揀咗喺呢度等我嘅靚姐姐⋯我點解會揀喺人地公司樓下等⋯？
「聽日見啦～」我聽到我認識嘅人嘅聲音，然後又有一把唔熟悉嘅聲音緊接
「哦～新仔喎，之前冇見過～」「睇起嚟好細個喎姐姐～」
「又唔係上次嗰個啦喎～」「果然浩宜嘅功力都仲喺度啦～」
「好煩呀你地，快啲走啦！」浩宜撥一撥手，「嚇親人，陣間人地以為我地公司啲人都係咁。」
「好囉～拜拜～」「拜拜～玩得開心啦～」
浩宜朝我嘅方向行嚟，今日佢著咗件深藍色嘅短身裇衫，下身著咗條比較貼身嘅白色褲，著住波鞋，同上次見佢嘅時候完全係兩種感覺
「咁早到嘅？」佢行到我面前停低，提手望一望手錶，「我地唔係約6點半？」
「咁我冇理由要你等我㗎嘛⋯」我微笑道，但總覺得我嘅微笑有啲唔自然，「而且我都係到咗一陣⋯」
「好啦，我地行啦～」浩宜轉身指一指另一方向，「我地慢慢行過去應該差唔多啦。」
「嗯，好⋯」我都係有啲拘謹，可能因為同佢未係好熟，所以先有啲唔自然
微風吹過，佢髮尾微卷嘅長髮比風吹起，佢好似怕會吹亂個頭一樣，好快就伸手將吹起嘅髮絲繞到耳背
而且隨住微風吹過，一陣清新嘅香味撲鼻而嚟，我嘅直覺就覺得係從佢身上而嚟⋯
佢比我行前半個身位，佢散發住嘅感覺應該同我好唔一樣，佢啲同事話我睇起嚟好細個，咁對佢嚟講，我應該都⋯
「諗緊咩呀？」佢擰轉頭望向我，對我禮貌咁微笑，「唔洗介意佢地講啲咩，佢地成日都係咁。」
「冇介意呀～」我搖搖頭，然後用半開玩笑嘅語氣問：「我睇起嚟真係有好細個咩？」
「唔⋯」浩宜將我由頭到腳打量一次，然後點點頭，「對我地呢啲就嚟30嘅人嚟講係幾細個嘅～」
「但都唔係真係好細個啫，我地都係差⋯三、四年。」我連忙笑一笑，然後抓一抓頭髮，下意識就覺得係髮型令我顯得好細個好稚嫩
「三、四年呀？都一個gap啦～」浩宜對我一笑，我嘅心臟又收縮咗一下
「年齡都係數字啫～你睇起嚟都係好後生。」我認真咁將佢打量一番後講道
「你咁識講嘢嘅？氹女仔一定好叻啦。」浩宜聽到我咁講就忍唔住笑
「呀⋯？冇呀，我氹女仔唔叻㗎⋯！」我即刻就否認，「以前嘅女朋友成日話我唔氹佢又唔識氹佢⋯」
我以前嘅女朋友，成日都話我唔氹佢，但我覺得明明冇嘢好嬲呀⋯只係一啲小事，但佢都會嬲我一大輪，氹又要氹好耐⋯
其實我唔氹番佢係唔係就代表佢對我嚟講唔重要？唔係，只係我覺得小事上冇咩氹嘅必要，然後我又發現我同佢對大小事嘅定義又唔太一樣⋯
最後佢就講咗分手飛咗我，我又唔會覺得比人飛好冇面嘅，只係大家唔夾，我又做唔到佢想我做嘅嘢⋯
IG Link: https://www.instagram.com/nd_cotttoncandy/?hl=zh-tw