【愛情】關於我一覺瞓醒發現喺初戀屋企⋯！: 104. 心深處的
「咩呀咩呀？」樂恩嘅好奇心即時湧上嚟，「我要聽！」
「陣間做晒嘢先啦⋯」我搖搖頭，除咗因為宜家有人排緊隊之外，仲因為阿立本人喺度
我嘅餘光見到阿立落完單，樂恩偷偷地擰轉頭望我一眼，我抬起頭偷望一眼，阿立企喺吧枱嘅後面貼住牆企
阿立企喺牆前睇手機，喺我抬頭偷望佢嘅時候，佢好似feel到我望佢，佢抬眼不抬頭咁望過嚟，同我對視，我抿住唇想令自己嘅笑意唔好咁明顯
「053。」我拎起單嗌道，然後就見到阿立起行行到嚟吧枱前面
「你嘅Latte～」我將咖啡遞比佢
「唔該。」我立接過咖啡，然後只有我同佢先聽到嘅聲量講咗一句：「今晚見。」
我笑而不語，餘光見到佢直行去門口推門出去，佢又番去繼續工作，我亦喺呢度繼續我嘅工作
喺晏小小嘅時間人流冇咁多，樂恩即刻急不及待咁行過嚟拉住我，我手上要放好嘅杯先放咗幾隻
「所以所以，係咩呀？」樂恩笑盈盈咁問我，「關於你同佢嘅事。」
「八卦妹⋯」我無奈咁望佢一眼，然後繼續將杯放番上杯架，「我同佢係中學同學，除咗咁樣之外，我地以前係男女朋友，不過後來分開咗。」
「Oh my God～好有緣呀你地～」樂恩擺出一個羨慕嘅表情，雙眼都就嚟要發光，「仲有冇呀？我仲想聽呀～」
「我地係小學同學，後來係中學同學，然後一齊咗又分開咗，再然後就係遇番，就⋯一齊番。」我將我同阿立十幾年嘅時間線，用最簡單嘅方法解釋晒
「嘩～好浪漫～」樂恩嘅雙眼閃閃發光，「所以你地過咗咁耐，都係最中意對方呀？」
「嗯。」我肯定咁點頭
「係唔係就係小說講嗰啲「第一眼見到就中意嘅人，無論隔幾耐再見都會心動」？」樂恩激動咁拉住我問
「係唔係睇小說睇到上晒腦呀？」我無奈咁輕拍佢嘅額頭一下，「不過可以再見都係一種緣份嚟嘅。」
「難怪咁快就同居啦～」樂恩低聲笑道，講嘅時候仲要特登擰轉頭望一眼廚房，然後拉住我低聲講道，「所以我都話佢冇機會啦⋯」
我冇太過訝異，因為樂恩本來都知道呢件事，我估，佢宜家已經知道咗阿逸表白嘅事⋯
「呀⋯我知呀我知呀，我知佢中意你⋯」樂恩拎住拎起兩隻杯，幫我掛上架同時低聲道，「不過我都知道，你中意你嗰個中學同學，眼神，第一次就睇得出～唉～都話咗佢⋯」
樂恩突然嘅坦白令我有啲不知所措，我要講啲咩先啱⋯？好似講咩都唔太啱⋯
「佢應該同咗你講啦？」樂恩帶住微笑望向我，「我係唔係應該，努力啲⋯？」
「你對佢好，佢會知道。」我默默咁講道，「我覺得你已經好努力，佢同你一齊應該會好開心。」
「好羨慕你⋯」樂恩忽然講道，「覺得你咩都好好～生得靚、性格又好、有一個人肯等你⋯」
「等我呀⋯？」我稍微思考一下，然後輕輕一笑：「我地冇等對方，只係將最心動嘅感情留比對方。」
「好浪漫，真係！」樂恩笑道
「你都好好，唔洗羨慕我，佢會見到你嘅好。」我微笑道，「人心都唔係一下就可以烘暖，都要時間。」
「佢就係個大叔，都唔明人地做咁多為咩⋯」樂恩扁起嘴，一個委屈嘅樣，「我就應該趁佢比你拒絕咗呢段傷心嘅時間，好好咁表現！」
「快啲用你嘅活潑去融化佢嘅心啦！」我用膊頭輕輕咁撞咗樂恩嘅膊頭一下笑道
我感覺到放喺圍裙袋嘅手機震咗一下，我拎出嚟睇，見到係媽咪嘅message：「你今晚番唔番嚟食？」
⋯
「你緊張呀？」我望住企都企得唔自在嘅阿立，不禁笑起嚟
「都唔係嘅⋯」阿立搖搖頭，「只係，嗯⋯好耐冇見，有啲唔知點好⋯」
「哦，我㩒鐘啦～」我笑道，都唔理佢緊唔緊張、準備好未，直接就㩒鐘
我聽到入面傳嚟急步走近嘅聲音，門「咔」一聲就打開
「嗨爸爸～」「叔叔⋯」
阿立比起啱啱，睇起嚟更拘謹，我更想笑，阿立偷偷地拍我一下示意我唔好笑佢
「好耐冇見你啦。」爸爸見到阿立，雙手捉住佢嘅膊頭，然後拍兩下
「搬咗之後都冇見過啦⋯」阿立禮貌咁笑道，下一秒佢終於記得自己手上拎住嘅嘢，「呀，我買咗小小嘢上嚟。」
「哎～唔洗咁客氣啦！」爸爸有啲唔好意思咁接過阿立手上嘅嘢
「都要嘅～」阿立笑道，「我拎入廚房。」
阿立前腳一行入廚房，爸爸即刻拉住我行後兩步：「開心啦你，見番啦。」
「咩呀⋯！」我即刻幾手抵喺唇前，示意我爸講得細聲啲，「你細聲啲啦！陣間阿立聽到呀！」
「佢聽唔聽到有咩所謂？你呀，今次唔好咁任性啦，中意就捉實啦！」爸爸語重心長咁講，佢嗰份認真會令人誤會我係唔係聽日出嫁，「唔係咁多人，可以分開咗咁耐再見，都可以有緣一齊。」
「我知呀⋯」我點點頭，偷望入去廚房一眼，阿立同我媽唔知講緊咩，氹到我媽眉開眼笑，「你唔洗講到好似你已經要嫁女咁⋯」
「你幾歲呀？你話你冇諗要結婚，我都唔信啦⋯！當你阿爸我係三歲呀？」爸爸沒好氣咁講，「唉，我去幫手先，陣間你媽又話我唔幫佢⋯」
我望住我爸行入廚房，同阿立講咗兩句，阿立就轉身行番出嚟
「講咗咩呀？」我細聲咁問阿立
「冇咩，佢叫我陪你。」阿立笑道，「係呢，你個鐵盒裝咗咩？睇唔睇得？」
「哦，比你睇囉～」我淡然咁講道，然後拉住阿立行入我房，將門虛掩住
我蹲喺櫃前，將放喺櫃底嘅盒拎咗出嚟，順手用濕紙巾抹一抹盒面嘅塵
「都真係收到好底⋯」阿立望住白變灰咗一層嘅濕紙巾輕皺起眉頭
IG Link: https://www.instagram.com/nd_cotttoncandy/?hl=zh-tw