［搞笑］［打機］收錢幫人戒除網癮，幫到困咗喺遊戲世界: 十五、死裡逃生

蛇仔明確保護盾擋晒啲攻擊之後，即時將護盾收起，以減少冇用嘅魔力消耗，再喺一瞬間用盡魔力全力加速。

佢冒險飛到龍王身邊，兩手從後用力抱起佢，一股作氣飛上天。

因為蛇仔明著到成身黑色，係蔚藍嘅天空中好顯眼，再加上護盾只係一時間掩蓋咗龍王嘅氣味，紅玉龍雖然呆咗一吓，一時跟甩咗佢地，但都只會係一時間既事。

「仆你個臭街，除左佢！」蛇仔明確認龍暫時冇跟嚟之後，極速帶龍王飛入森林，我同烏鴉都飛去同佢地會合，落地之後，蛇仔明即刻將龍王身上所有屠龍戰利品除落嚟，之後埋咗佢哋。

因為被逼要放棄自己嘅戰利品，龍王成塊面乸埋一舊。好彩嘅係，龍王既戰利品猜咩實際作用，唔太影響佢嘅實力，反而仲輕盈咗，方便移動。





為咗保險起見，蛇仔明帶我哋兜去附近一個泥氹，一手推龍王落去。龍王冇反抗，因為佢清楚呢個舉動係為咗消除佢嘅氣味，一身嘅泥漿而家反而係龍王嘅護身符。

龍對周圍嘅感知力本身已經好強，另外，佢對氣味好敏感。

一啲較普通嘅味道，例如泥土、草、野花嘅味道，唔會提高佢嘅警覺，因為龍會認為佢地係大自然既一部分，所以，佢如果唔集中精神，好難發現我哋喺泥土入面埋咗龍嘅戰利品。

但人自帶嘅體香、汗臭、身上防具用嘅獸皮、龍骨都有唔同既味道，只要近身接觸過，龍就可以記得一個人身上氣味嘅組合，當佢感知到呢個特定組合喺同一個位置出現嘅時候，佢就可以探知到嗰個人嘅位置。

同樣原理，而家龍王身上原有嘅味道都被泥漿臭味遮蓋，氣味組合已經有變，紅玉龍冇辦法憑氣味搵到佢，除非佢同龍再次埋身肉博，俾龍辨識到佢新嘅氣味組合。





「唔該晒你。」或者係受驚過度，龍王少有地收起一副囂張樣，似返個𡃁仔。

「你唔使唔該我，你唔該魚仔啦，如果唔係佢交低，我都廢事理你。」