［搞笑］［打機］收錢幫人戒除網癮，幫到困咗喺遊戲世界: 二十九、殊途同歸

「睇蛇仔明算啦，我攰喇。」我笑笑口同烏鴉講。

唔好誤會，我地兩個唔係唔關心蛇仔明，只係一啲唔擔心佢嘅實力唔夠，仲好悠閒咁同Angel共享畫面。我哋相信，佢應該會摸到一套自己嘅勝利方法出嚟，引領個戰局。

呢次紅玉圍獵唔算太多高手出現，如果要搵人擔起大旗，一定非蛇仔明莫屬。

近戰巫女已經察覺到遠攻巫女戰死，戰鬥方式都變得浮躁起嚟，本身同佢拉扯緊嘅人都略為吃力，招架不住。大家眼見目標只得一個，都咬住牙關慢慢刀仔鋸大樹。

不過，稍有不慎就會俾近戰巫女打出致命傷，死前仲要受烈火嘅折磨。大家始終打得唔夠放，喺近戰巫女一波又一波攻勢之下，慢慢冇乜人敢再向前。





呢個時候，蛇仔明大步流星咁行出去。我知道，在場嘅人一定覺得佢已經痴咗線，因為佢哋好少見法師會咁樣同戰士拉近距離。即使蛇仔明有返咁上下實力，都改變唔到佢較為脆皮嘅事實。

實際上，我都覺得佢癲咗，如果我在場一定會叫佢離莉排遠啲。

Angel冇出聲，佢只係默默睇住蛇仔明，似乎係時刻準備緊幫佢防守。

「你哋殺咗我公會既人，唔好以為自己可以活得過今晚。」我好少見蛇仔明充滿殺意，畢竟佢嘅理念就係打機要輕鬆。

莿姐係Snake嘅元老會員，由公會成立初期已經喺入面，仲幫蛇仔明招攬咗好多成員，平時鍾意同其他成員吹水，又會好細心咁照顧新加入嘅成員。





雖然佢唔算好好打，但佢喺公會入面嘅地位非常高，而且講嘢好有牙力，出面嘅人都唔會點招惹佢，而且大部分人叫佢嘅時候，都會出於敬意加個姐字。

在場嘅Snake成員都係充滿怒火，但佢哋知道無需出手，亦冇能力出手，蛇仔明會親手解決公會嘅敵人。

喺蛇仔明眼中，荊姐係好重要嘅存在。

同我素未謀面嘅蛇仔明，竟然同莿姐線下出過無數次街，據佢所講，佢哋好似有數不盡嘅話題咁。荊姐作為喺IG有幾萬follower嘅KOL，同蛇仔明竟然係無所不談嘅熟人，天下真係無奇不有。

「你班人類都殺咗我唯一嘅親人，唔通你哋覺得我又會俾機會你地走咩？」





近戰巫女又講得不無道理，對佢嚟講好重要嘅人都俾我哋殺左。

我哋覺得佢兩位係大仆街，但可能對佢哋黎講，我地都係一班大仆街。

就係咁樣，兩個喺呢晚失去重要拍檔嘅人迎來今晚最後一戰。

蛇仔明一反常態，佢並冇打算係空中遠距離作戰，反而仲留喺地面。

Angel嘅視線一刻都冇離開蛇仔明身上，所以我睇得相當清楚。

佢係真係唔打算飛上天。

「武器複製。」

「吓？」我同烏鴉下意識吓左出聲，我哋以為佢行咁近只係虛張聲勢，冇諗住佢真係要用魔法複製人哋把武器，再上去硬撼。