[GL] 重遇之後: 13—下
她的問題再度讓我愣住了。我一言不發，只是緊閉嘴唇看著眼前女生。Tracy睜了睜眼，以眼神催促我的答覆。
「做乜突然諗到咁長遠……」
「咁一齊嘅時間耐咗，終有一日都係要面對呢個問題呀。」
「唔係每段關係都需要同人交代嘅…」
「但身邊嘅人點都會察覺到啲嘢。一段關係，係無可能瞞到一世。而且…戀愛本身就係件值得開心嘅事，唔係咩？點解要怕比人知？」
語畢，Tracy轉過頭正眼看著我。我覺得有點心虛，低頭避開她的視線。
她說得一點錯也沒有，談戀愛是一件令人開心的事，更不是一件錯事。然而，我卻無法乾脆地作出回答。
「咁你呢？會唔會選擇公開？」心裡雖然明白這樣有點取巧，但我還是把問題拋回給對方。
跟我並肩走著的女生似是沒有察覺到我的主意，她低頭想了想，有點遲疑地道：「嗯…其實我都唔知。」
「點解你會咁問？」
「無啦，只係聽到你講話拍拖係兩個人嘅事，令我有感而發。」
聽到她的話，我納悶地問：「係咪我講錯咗啲咩？」
「你無講錯嘢啦！我唔係怪你，我真係只係咁啱諗到。我只係覺得…有啲感情，係需要更多勇氣去堅持。如果我哋係一男一女，應該就唔使喺度為公開與否煩惱咁耐呀。」
「唔…一男一女都可能會有佢哋嘅困難之處呀。」
「都係，不過…女仔同女仔，喺面對其他困難之前，首先要先衝破性別嘅屏障。要做到呢樣嘢一啲都唔易。好似我哋啱啱咁，設身處地咁代入個情景去諗，明明平時都覺得愛無分性別，但當遇到問題嘅係自己時，所有嘢就突然變得好難。」女生輕嘆了一口氣，微微皺著眉向我道：「想得到幸福，有時都唔係一件易事。」
她此刻的表情雖然是在笑，但這笑容看起來更似是苦笑。凝視著這邊的眼神好像流露著一種悲傷、一種無奈。我不知道這是否只是我想太多，還是因為公園的燈光太暗，令人產生錯覺。儘管如此，我仍擔心地問道：「你係咪…有咩煩惱？」
「哈哈，無啦！只係今晚見到個個都一雙一對，而自己得一個人，所以個人都變得多愁善感姐。可能係俾情人節嘅氣氛感染咗！呢一日對單身狗嚟講果然係太刺激喇~」
「……你有我呀。唔係一個人。」
「又係！多謝你，我嘅好姊妹！」
聽到我的安慰，Tracy似是稍稍釋懷，她笑著勾住我的手。我雖然感到些許安心，但她剛才的話也同時狠狠地打進我的心坎裡。我裝作聽不見那逐漸變得沉重的思緒，緩緩步往公園出口。