【愛情】如地下情一樣嘅癮，係我對你嘅定義: 28. 瘀痕

「你呢句加油會唔會遲咗啲？」陸修然send出一個message反問道

「同你講加油仲咁多要求」黎昕淇望住手機輕哼一聲，「我冒住背叛我班嘅風險同你講加油」

陸修然回頭望一眼，黎昕淇同佢對望嘅瞬間即係露出一個冇佢咁好氣嘅表情

放學之後，黎昕淇同宋楚妍一齊走，番到屋企樓下嘅時候先喺大堂等陸修然，喺見到陸修然走近佢嘅第一時間係皺起眉頭

「你成陣汗味⋯」黎昕淇有啲嫌棄咁打量陸修然





「打完波點會冇汗味，我係冇汗腺定點？」陸修然無奈咁問，佢唔明點解出汗有少少汗味咁正常嘅事都要比黎昕淇嫌棄一番，「番去沖涼洗頭。」

黎昕淇喺陸修然沖涼嘅時候一直坐喺廳做功課，自己一個人喺屋企太悶，所以黎昕淇多數會同陸修然一齊做功課，喺對方嘅父母番嚟之前就走

有時都會喺陸修然落去黎昕淇度，不過牛奶同芝麻成日喺功課上面行嚟行去，試圖引起佢地注意，令佢地根本冇辦法集中精神

黎昕淇做完份地理功課之後起身行到窗前伸懶腰，順便眺望遠方放鬆下

「差兩層，睇嘅嘢差咁多嘅⋯」黎昕淇企喺窗前自言自語





「黎昕！」陸修然忽然喺廁所大叫，黎昕淇頓時回頭行到廁所門口

「做咩呀？」黎昕淇企喺廁所門口問

「幫我喺房拎我件衫！」陸修然企喺門口嗌道

「哦！」黎昕淇轉身行入陸修然嘅睡房，但企喺門口一眼望晒，冇佢平時著嘅白T，於是佢又番到廁所門口，「冇喎！」

「冇？」「喂！」





陸修然一下就打開門，黎昕淇嚇咗一跳，即刻用手掩住眼

「我有著褲。」陸修然淡然咁講咗句，就直接行咗去房

陸修然行入房，白T唔喺佢嘅櫈上，亦唔喺佢嘅床上，佢思考咗一陣行到床前，將被掀開，成件白T就喺度

「衫咪喺度⋯！」陸修然無奈道，黎昕淇行到陸修然嘅房門口，望住陸修然伸手拎起放喺床上嘅衫著上身

「我點知佢會比被蓋住⋯」黎昕淇無奈咁講道，邁步行入陸修然嘅睡房，伸手將被拉番好

「開心啦，你地班贏咗。」陸修然忽然道

「還好啦～」黎昕淇微微點頭，佢又唔係真係好開心，不過始終係自己班贏，所以會有少少開心都正常嘅，「做咩？你地班輸咗你唔開心呀？」

「冇呀，本身都唔係我想落場⋯」陸修然懶洋洋咁轉身坐低喺床邊，佢睇起嚟完全唔似喺學校嗰個可靠嘅會長，「你又唔同我講加油。」





「我咪同你講咗⋯」黎昕淇坐喺書枱前嘅電腦椅上，「而且，唔係有成班小迷妹喺隔離同你打氣咩？」

陸修然輕輕挑起眉、側着頭定睛凝視住黎昕淇，黎昕淇輕抿一下唇，自己講完先覺得啱啱嘅說話從自己口中講出嚟好奇怪

「聽起嚟，有人妒忌？」陸修然問道

「我冇，我只係有話直說。」黎昕淇反駁道，「我有妒忌嘅必要咩？」

「又真係冇嘅。」陸修然嘅嘴角有一抹唔明顯嘅笑意

黎昕淇因為自己講咗出口嘅奇怪說話而覺得有種尷尬喺佢嘅心底漸漸擴散，佢將臉頰微微鼓起，然後朝陸修然伸手

「嘶！」陸修然第一時間縮起手，但黎昕淇已經用力咁喺佢嘅手臂上搣咗一下，「你摵我做咩？」





陸修然喺縮手後第一件事係睇下自己嘅右手手臂，手臂上已經紅咗一塊，什至有啲紫紅色瘀咗一樣

「你冇妒忌仲搣我做咩呀⋯！」陸修然用力搓自己嘅手臂減少痛感

「冇，就係突然手痕。」黎昕淇聳一聳肩然後撇開臉

「哦⋯真係？」陸修然將電腦椅拉到自己面前，一下子將上身前傾湊近黎昕淇，雙手㩒住喺櫈嘅扶手上

黎昕淇瞄咗陸修然一眼，佢宜家無處可逃，去路都比陸修然攔住

「真係，我做咩要講大話？」黎昕淇挺直腰坐起，擰轉頭直視陸修然嘅時候，鼻尖差半分就要掂到

「冇就冇啦～」陸修然微微一笑，然後又湊前少許，鼻尖掂到黎昕淇嘅鼻尖，故意將聲線壓低再開口：「不過，你點解成日都喺啲咁明顯嘅地方留啲咁明顯嘅痕跡比我？想大家真係覺得我有女朋友？」

陸修然咁樣一講，黎昕淇先發現好似的確如此，不過佢冇特別揀啲明顯嘅位置，只係，咁啱⋯





「我唔係你女朋友⋯唔⋯」黎昕淇講嘅時候，陸修然已經湊得好近，唇已經輕碰到佢嘅唇

陸修然冇比時間佢繼續再講，直接一下子、準確無誤咁吻喺佢嘅唇上，黎昕淇本來想講嘅說話都已經直接消散得一乾二淨

陸修然雙手從扶手上移開，一隻手放喺櫈嘅坐墊上，另一隻手輕搭喺黎昕淇嘅腰上面

黎昕淇嘅手就搭喺陸修然嘅膊頭上，喺陸修然微微向後退嘅時候，黎昕淇即刻感覺到，下意識就起身邁咗半步將右腳跪到床褥上面

只有一隻腳作重心，令佢跪坐喺床上面嘅時候冇辦法好好咁平衡，上身自然咁靠喺陸修然嘅身上；陸修然怕佢跌，手輕輕托住佢嘅腰

癮嘅感覺令人有種慾罷不能嘅感覺，一旦癮起就會覺得渾身唔自在、坐立不安；一旦解藥到手，必定要緊緊咁將解藥捉住，以防解藥從手中跣走⋯

一呼一吸嘅空氣都變得愈嚟愈熾熱，好似要缺氧一樣嘅感覺愈嚟愈明顯，但係冇人有先停落嚟嘅打算





都已經搞唔清，邊個係邊個嘅癮，邊個係邊個嘅解藥⋯

「咳！咳咳！」黎昕淇喺比口水嗆到嘅瞬間推開陸修然，熾熱嘅鼻息同氣息都喺陸修然嘅頸邊輕輕掃過

陸修然拍一拍黎昕淇嘅背，黎昕淇將額靠喺自己嘅手背上，一暫停落嚟，唇就變得乾燥，失去滋潤嘅感覺

「睇起嚟，真係冇妒忌嘅必要⋯」陸修然仰起頭調整自己嘅呼吸，「嘶⋯！」

黎昕淇又偷偷地搣咗陸修然嘅大髀一下，陸修然一手捉起黎昕淇搣佢嘅手，黎昕淇抬起頭，已經慢慢回氣嘅佢一臉淡然咁望住陸修然

「你要互相傷害係唔係？」陸修然帶住半威脅嘅語氣問道，「如果聽日有人問我點解瘀咗一大塊，我一定話係你喺屋企搣我。」

「講呀，你咪講。」黎昕淇抬起下巴，擺出一副天不怕地不怕嘅模樣

「我真係講，聽日實有人問，你知啦，我係好多人仰慕嘅會長⋯」陸修然唔怕黎昕淇，佢直接肯定咁表明自己立場，「我唔怕比人知。」




IG Link: https://www.instagram.com/nd_cotttoncandy/?hl=zh-tw