【愛情】如地下情一樣嘅癮，係我對你嘅定義: 44. 投餵
星期六嘅朝早，江清懿同黎昕淇按照約定一齊食早餐，江清懿po咗個寫住「番朝早好眼瞓」嘅story，黎昕淇都有repo佢呢個story
「真係好攰⋯」黎昕淇成個人都未醒晒，平時9點嘅時候，佢個人仲灘喺床未醒，「下星期唔好再編我番朝早⋯」
「早啲開工早啲收工。」江清懿樂觀咁用叉拮起多士，「晏晝去街街～」
「又約女仔去街街啦花心男。」黎昕淇反咗個白眼
「我自己去街唔得嘅？」江清懿用一個白眼回敬道，「你地唔好對我有咁深嘅誤會得唔得？」
「個個都係咁講。」黎昕淇聳肩解釋道
「只係啲真實度等於零嘅流言蜚語⋯多啲女仔朋友都會比人話我花心，我真係嘅話都算，重點係我唔係⋯！」江清懿雖然對於呢啲傳聞習以為常，不過喺朋友面前都係要澄清一下，「但大家堅持，我都無言以對。」
「都係⋯傳聞嘅嘢一傳開就好麻煩⋯」黎昕淇默默咁點頭
「澄清番，我同個個都係好自然好光明正大咁相處，亦冇同好多個人曖昧，我唔花心。」江清懿忍唔住再對黎昕淇再澄清、再抱怨一下
「傳聞係咁㗎啦，一個傳一個，傳多幾個就似模似樣，邊有人追究真定假？」黎昕淇對呢件事深有同感，「大家都係當茶餘飯後嘅話題。」
正因為唔想比人當成茶餘飯後嘅話題，加上唔想麻煩同破壞咗佢地原有嘅關係，佢更加唔想比人知道，比人討論，令佢地嘅關係變得唔自然
黎昕淇邊睇手機邊食早餐，睇影片睇到一半嘅時候，上方彈咗一個message
「係喎⋯佢平時都係咁早起⋯」黎昕淇望到係陸修然嘅message之後冇太意外，默默咁㩒咗入去
「今日番咁早，仲食埋早餐」陸修然嘅message係reply緊黎昕淇repo嘅story
「唔食飽點番工？」黎昕淇影咗一張只有半邊面嘅自拍過去，再回覆，「你食咗早餐未」
「食緊」「一齊食緊早餐」
「唔係，我喺屋企食緊，你喺茶記食緊」陸修然嘅回覆令黎昕淇無奈
「做咩要喺呢啲位咁執著⋯」黎昕淇默默咁嘆一口氣，單手喺鍵盤上打字：「都一樣啫」
望住冇再彈新message嘅對話框，黎昕淇莫名其妙咁諗起上次陸修然話佢唔公平
「陣間佢會唔會又唔高興？」黎昕淇無奈一笑，不過佢唔太討厭呢種感覺，「會唔會話我同江清懿食嘢就唔戴cap帽，同佢食就戴。」
黎昕淇忍唔住偷笑咗一下，抬眼望向江清懿嘅時候發現江清懿冇見到，即刻就收起笑容當冇事發生繼續食嘢
晏晝3點收工番到屋企門口嘅時候，黎昕淇一如既往咁拎出鎖匙開門，但鎖匙都未插到入鎖孔，門已經「咔」一聲打開
「媽、阿姨。」黎昕淇望住拉開門行出嚟嘅兩人
「收工啦？」黎媽媽將黎昕淇由下而上打量，「我地出去買嘢呀，阿然喺廚房幫手切緊嘢，你得閒就去幫下佢啦。」
「哦，好呀。」黎昕淇微微點頭，行入屋除鞋換上拖鞋之後，第一件事係行到廚房，「陸修然。」
「嗨。」陸修然回頭望咗一眼，又繼續專心切蔥
「阿姨落咗嚟嘅？搵我媽咪拎食譜？」黎昕淇企喺陸修然隔離望住佢切蔥
「上次阿姨整嗰個醃肉好食，我媽特登嚟偷師。」陸修然將切好嘅蔥送到碗中，又拎一條新嘅蔥出嚟切
黎昕淇換番衫再一次行入廚房，打開櫥櫃煮個撈麵做午餐；黎昕淇煮完麵嘅時候，陸修然啱啱好切好晒所有要切嘅嘢
「好肚餓啦⋯」黎昕淇感覺到自己個肚就嚟要打鼓，快速咁落埋醬撈好個麵，唔等拎出廳，直接先食一啖，「食唔食？」
黎昕淇夾起唔多唔少嘅一啖遞到陸修然嘅面前，陸修然仲洗緊手，手上都係番梘泡
「未洗完手。」陸修然望向黎昕淇，佢嘅手都未沖乾淨
「要凍啦。」黎昕淇平靜咁講，直接就將麵夾住放到陸修然嘅嘴邊
陸修然無奈咁張開口，黎昕淇將麵一段一段夾到陸修然口中，陸修然閂水摸到隔離嘅抹手布，順手抽咗張紙巾抹嘴
陸修然坐喺梳化上睇手機，黎昕淇坐喺梳化前嘅圓型茶几前享用佢嘅午餐；黎昕淇一邊食一邊將垂落嚟嘅頭髮往後撥
陸修然將手機放喺梳化上，起身望開座位，黎昕淇默默咁望咗一眼之後繼續邊睇手機邊食佢嘅午餐
喺陸修然行完一轉番嚟之後，佢坐低喺黎昕淇身後嘅位置，捉起黎昕淇嘅頭髮徒手梳起馬尾，用髮圈綁好
黎昕淇愣咗一下，感覺到頭髮梳好之後佢擰轉頭，帶住壓抑唔住而微微上揚嘅嘴角望向陸修然
「做咩？」陸修然眼見黎昕淇望住自己笑，下意識笑一下
「冇。」黎昕淇伸手摸一摸髮圈綁嘅位置，然後拎起手機，用手機殼嘅鏡面照住睇清楚
黎昕淇睇完覺得滿意，耷低頭繼續食嘢，啱啱綁頭髮嘅一刻感覺到自己嘅心跳頻率上升咗少少
坐喺後面嘅陸修然將黎昕淇嘅一舉一動都睇喺眼中，見到黎昕淇滿意，佢心入面有種成功感冒出
一直到夜晚嘅時候，黎媽媽見到黎昕淇仲綁住馬尾冇將頭髮放落嚟
「你沖涼未？」黎媽媽問，「仲綁住頭髮。」
「宜家沖。」黎昕淇行到廁所，企喺鏡前嘅時候猶疑咗一下先將髮圈解開
睡房閂晒燈，黎昕淇一直攬住攬枕輾轉反側瞓唔著
「唉⋯1點⋯」黎昕淇望一眼放喺床邊嘅時鐘，然後平瞓喺床上望住天花板，今日嘅佢嘅睡意冇準時到達，「做咩會瞓唔著⋯」
黎昕淇伸手拎起放喺枱上嘅手機，send咗個message比陸修然：「瞓咗未？」
「呢個時間應該瞓咗啦⋯」黎昕淇望住冇變已讀嘅訊息狀態自言自語，「唉⋯」
IG Link: https://www.instagram.com/nd_cotttoncandy/?hl=zh-tw